Read Dagara, Northern 1 Korɛ̃tɩ 11 Bible Online

1 Korɛ̃tɩ 11 - Dagara, Northern bible

1 Korɛ̃tɩ 11

¹Nyɩ cɔwrɛ mɛ̃, mɛ̃ a lɛ mãa mɩŋa na cɔwrɛ a Kɩrɩta a.

²Ɩ̃ mʋʋrɛ nyɩ na nyɩ na tɛr a ɩ̃ tɩɛrʋ a yele za pʋɔ a, ɛ́ maal tuur a wulu ɩ̃ na lʋɔrɩ kʋ̀ nyɩ a.

³Ɛcɛ, ɩ̃ bɔbr'a kɛ́ nyɩ bãw a yel ŋa pɛr vla: dɛb za zu-sob'ɩ a Kɩrɩta, a pɔw zu-sob'ɩ a dɛb, ɛ́ a Kɩrɩta zu-sob'ɩ a Naaŋmɩn.

⁴Dɛb za na puore bɩɩ ƴɛ̀rɛ naaŋmɩn-ƴɛ̀r-manɛ ƴɛ̀rʋ ɛ́ 'lẽ a ʋ zu pàw a, ʋ bɛ ƴãwnɛ a ʋ zu-sob ɛ.

⁵Ɛcɛ pɔw za na puore bɩɩ ƴɛ̀rɛ naaŋmɩn-ƴɛ̀r-manɛ ƴɛ̀rʋ ɛ́ bɛ 'lẽ bom pàw a ʋ zu a, ʋ bɛ ƴãwnɛ a ʋ zu-sob ɛ, bʋ̃ʋ n'ʋ vɛ̃, a ɩ na mɛ̃ ʋ fɔr'ɩ a zu a.

⁶A pɔw bɛ wa 'lene fãtara a, ʋʋ ƴãw bɛ põ ʋ a zu. Ɛcɛ a zu pob bɩɩ a zu fɔrʋ wa ɩrɛ vĩ pɔw zie a, ʋ̃ʋ 'lẽ fãtara.

⁷Dɛb ʋl a, ʋ bɛ tɛr sɔ́r na 'lẽ a ʋ zu pàw ɛ, ʋ ɩ n a Naaŋmɩn ŋmaarʋ nɩ a ʋ yúor-vɩɛlʋ-danʋ, ɛ́ a pɔw ɩ a dɛb yúor-vɩɛlʋ-danʋ.

⁸Bʋ̃ʋ n'ʋ vɛ̃, dɛb bɛ n'ʋ bɛ ír a pɔw pʋɔ ɩ, pɔw n'ʋ bɛ ír a dɛb pʋɔ.

⁹Ɛ́ pɔw ƴãw bɛ n'a bɛ ír a dɛb ɛ, dɛb ƴãw n'a bɛ ír a pɔw.

¹⁰Alɛ so a fɛr kɛ́ a pɔw ƴãw a ʋl mɩŋa nɩ-kpɛ̃ɛnʋ bãwfʋ a ʋ zũú, a malkɩ mɩnɛ ƴãw.

¹¹Ɛcɛ tɩɩm nɩ a Sore lãw-taa pʋɔ a, a dɛb nɩ a pɔw bɛ be za na bʋ́r taa ɩ.

¹²Bʋ̃ʋ n'ʋ vɛ̃, mɛ̃ a lɛ a pɔw na yi a dɛb zie a, lɛ mɩ̀ n'a a pɔw mɩ̀ dɔw a dɛb, ɛ́ a za yi a Naaŋmɩn zie[23].

¹³Nyɩɩm tɛɛ za nyɩ jieli nyɛ̃ a: a sɛw na kɛ́ pɔw puore Naaŋmɩn ɛ́ bɛ 'lẽ a ʋ zu pàw bɩɩ?

¹⁴A yele na ɩrɛ a lɛ a bɛ tʋ̃ɔ́ wule nyɩ kɛ́ dɛb na tɛr zukɔbr wowr a, bɛ ƴãwnɛ ʋ tʋɔra ɩ,

¹⁵ɛcɛ a pɔw zie, a ɩ dɛpaalʋ ɛ? Bʋ̃ʋ n'ʋ vɛ̃, bɛ kʋ̀ ʋ nɩ a zukɔbr wowr k'aa ɩ a ʋ fãtara.

¹⁶Ɛ́ nɩr wa cãà bɔbr k'ʋʋ ŋmɩɛr nɔkpɛn a yel ŋa ƴãw a, ʋ̃ʋ bãw k'aa tɩɩm nɩ a Naaŋmɩn Lãw-yie bɛ lɛb tɛr tub a mɩnɛ kãw a puoru yele ƴãw ɛ.

¹⁷A yel ŋa na gã zi-been baar'a, a nyɩ kpaa-taar ƴãw a, ɩ̃ bɛ mʋʋrɛ nyɩ ɛ. Bʋ̃ʋ n'ʋ vɛ̃, a sɛw na k'aa maalɛ nyɩ, ɛcɛ a nɩ̃ɛ na sãwnɛ nyɩ bɛ dɩ vuo ɩ.

¹⁸A yel dãw-niwn sob'ɩ ŋa: bɛ yel'a kʋ̀ m kɛ́ nyɩ na mɩ́ wa ɓã taa a, ɛ́ bʋ́r-taa mɩ́ be n a nyɩ cara pʋɔ, ɩ̃ɩ tɩɛr kɛ́ à à ŋá bɛ na yel a, a mɩnɛ ɩ n yel-mɩŋa.

¹⁹Mɔ̃ mɩ̀, a sɛw na kɛ́ bʋ́r-taa be a nyɩ sɔgɔ, kɛ̀ bɛ tʋ̃ɔ́ bãw a bɛlɩ dem na sɩrɩ bɛ lɛbr pùor a nyɩ pʋɔ a.

²⁰Nyɩ na mɩ́ wa ɓã taa a, a Sore dɩb bɛ n'ʋ nyɩ mɩ́ dɩrɛ ɩ.

²¹Bʋ̃ʋ n'ʋ vɛ̃, a dɩb daar na mɩ́ wa ta a, ŋa za mɩ́ màw na dɩ a ʋ dem, kɛ̀ kɔ̃ mɩ́ kpɩɛr kãw ɛ́ ƴen sob kuole.

²²A ɩ lɛ nyɩ dɛ bɛ tɛr yie na mɩ́ zɩ̃ a be dɩrɛ ɛ́ nyúur bɩɩ? Bɩɩ a Naaŋmɩn Lãw-yir'ʋ nyɩ bɛ bʋɔlɛ bom, ɛ́ bɔbr kɛ́ nyɩ tʋʋr a bɛlɩ dem na bɛ tɛr bom a? Ɩ̃ pãa yel kɛ́ bʋnʋ kʋ̀ nyɩ a? Ɩ̃ mʋʋrɩ nyɩ bɩɩ? Towtow! À á ŋá ƴãw a, ɩ̃ bɛ mʋʋrɛ nyɩ ɛ.

²³Bʋ̃ʋ n'ʋ vɛ̃, yel ŋa n'ʋ ɩ̃ páw a Sore zie ɛ́ mɩ̀ lʋɔrɩ kʋ̀ nyɩ: a ʋlɩ tɩ̃ɩsɔw nɛ bɛ na tɩ nyɔw a Sore Yeezu tɩr a, ʋ tɩ de nɩ dipɛ̃,

²⁴ʋʋ na wa puori a Naaŋmɩn yãanɩ baar'a, ʋ nyɔw ʋ na ŋma ɛ́ yel: «À ŋà ɩ n a ɩ̃ ƴã-gan a nyɩ ƴãw, nyɩ maalɛ à á ŋá tɩɛrɛ nɩ a ɩ̃ yele.»

²⁵A dɩb pùorí, ʋ mɩ̀ tɩ ɩ n a lɛ a koli-nyúura ƴãw yere nɩ: «A koli-nyúura ŋa ɩ n a Wõ-ta-paala na bin nɩ a ɩ̃ zɩ̃ɩ a, nyɩ mɩ́ maalɛ à á ŋá tɩɛrɛ nɩ a ɩ̃ yele, lɛn daar za nyɩ na mɩ́ wa nyúur a a.»

²⁶Bʋ̃ʋ n'ʋ vɛ̃, lɛn daar za nyɩ na mɩ́ 'wɔbr a dipɛ̃ ŋa ɛ́ nyúur a koli-nyúura ŋa pʋɔ divɛ̃ a, a Sore kũu n'a nyɩ mɩ́ yere gùre nɩ a ʋ waa.

²⁷Alɛ so, sob nɛ nãà wa 'wɔbr a Sore dipɛ̃, 'wɔbrʋ na bɛ sɛw a, ɛ́ nyúur a koli-nyúura pʋɔ divɛ̃, nyub na bɛ sɛw taa nɩ a, na ƴãw na ʋ mɩŋa ɩ sãwna sob a Sore ƴã-gan nɩ a ʋ zɩ̃ɩ ƴãw.

²⁸A na ɩ à ŋá a, ŋa za, ʋ mɩ́ sowr'ʋ tʋɔra kaa ɛ́ bãw 'wɔb a dipɛ̃ ŋa, ɛ́ nyũ a divɛ̃ à ŋá,

²⁹bʋ̃ʋ n'ʋ vɛ̃, sob nɛ na 'wɔbr a dipɛ̃ ɛ́ nyúur a koli-nyúura pʋɔ divɛ̃, ɛ́ bɛ tɩɛrɩ bãw k'aa Sore ƴã-gan n'ʋ a, a ʋ sob bɔbr'ɩ ƴɛ̀rʋ ƴãwnɛ ʋ tʋɔra.

³⁰Alɛ n'a so a bàalbɛ nɩ a nɩ-kɔwr bɛ dɩ vuo a nyɩ pʋɔ ɩ, ɛ́ yaga kpi.

³¹Tɩmɛ mɩ́ tɩ sowri tɩ tʋɔra kaa a, bɛ kʋ̃ʋ wa tɩ maalɛ nɩ tɩ ƴɛ̀rʋ ɛ.

³²Ɛcɛ a Sore mɩ́ maal'ɩ tɩ nɩ ƴɛ̀rʋ ɛ́ kpãa tɩ, kɛ́ tɩ taa wa lãwnɩ a tẽ-daa nyɛ̃ dɔwrʋ ɛ.

³³A na ɩ à ŋá a, yɛbr i, nyɩmɛ mɩ́ wa ɓã taa a Sore dɩb ƴãw a, nyɩ mɩ́ zɩ̃ gù taa.

³⁴Kɔ̃ wa kpɩɛr nɩr a, ʋ̃ʋ dɩ a ʋ yir, a nyɩ ɓã-taa ta mɩ́ ɩ a nyɩ dɔwrʋ ƴãw ɛ. Ɛ́ a yele al na cɛ a, ɩ̃ na maal'a na mãa wa ta a nyɩ zie a.