Read Dagara, Northern 1 Korɛ̃tɩ 12 Bible Online

1 Korɛ̃tɩ 12 - Dagara, Northern bible

1 Korɛ̃tɩ 12

¹Yɛbr i, ɩ̃ bɛ bɔbr kɛ́ nyɩ ɩ zɔn a maalʋ a Vʋʋrʋ Sõw na tɩrɛ a ƴãw ɛ.

²Nyɩ bãwnɩ a na, a lɛn daar nyɩ na tɩ cãà ɩ a tɩbɛ nɩbɛ a, a bɛ mɩ́ tɩ tɛr nyɩ na kʋ̃ cen a tɩbɛ na bɛ tɛr nʋɔr ƴɛ̀rɛ a zie ɩ.

³Alɛ n'a so ɩ̃ bɔbr kɛ́ nyɩ bãw a yel ŋa: nɩr za Naaŋmɩn Vʋʋrʋ na ƴãw ʋ ƴɛ̀rɛ a, ʋ bɛ yere: «A Yeezu, ʋ ɩ nɩ-ŋmɛ-ƴãwna ɩ!», ɛ́ alɛ bɛ ɩ a Vʋʋrʋ Sõw zũú a, nɩr kʋ̃ tʋ̃ɔ́ yel: «A Yeezu ɩ n Sore ɩ!»

⁴A Naaŋmɩn maalʋ ɩ n tɛɛtɛɛ, ɛ́ yi a Vʋʋrʋ Sõw been zie.

⁵A tõ-nɛ́ɛ ɩ n tɛɛtɛɛ, ɛcɛ a Sore been n'ʋ bɛ tone.

⁶A yele na maalɛ a ɩ n tɛɛtɛɛ, ɛcɛ Naaŋmɩn-been n'ʋ maalɛ a za a nɩbɛ za zie.

⁷A Vʋʋrʋ Sõw maalʋ mɩ́ sãá nɩ ŋa za zie a bɛ za vla ƴãw.

⁸A kãw a, ƴɛ̀rʋ na tu yã-bãwfʋ a n'ʋ a Vʋʋrʋ Sõw kʋ̀ ʋ, ɛ́ a kãw ƴɛ̀rʋ tu zanʋ ʋ na zanɩ bãw a, ɛ́ a cãà yi a Vʋʋrʋ Sõw been nɛ zie.

⁹Naaŋmɩn-sàw-deb na bɛ tɛr ʋ tɔ a n'ʋ kãw páw a Vʋʋrʋ ŋa tɔr za zie, ɛ́ ƴen sob páw bàalbɛ sanʋ maalʋ a Vʋʋrʋ Sõw been yõ ŋa zie.

¹⁰Kãw páw nɩ nɔ-ɓãa-yele maalʋ fãw, ƴen sob páw naaŋmɩn-ƴɛ̀r-manɛ tome maalʋ, ŋa sob ʋl páw nɩ maalʋ mɩ́ bãw a vʋʋr-bɛlɛbɛlɛ nɩ a Vʋʋrʋ Sõw tɔr za, kãw páw nɩ a ƴɛ̀r-pɛ-bʋʋrɛ ƴɛ̀rʋ fãw, ɛ́ kãw bãw a ƴɛ̀rʋ á ŋá pɛ́ɛ íru.

¹¹Ɛcɛ a Vʋʋrʋ Sõw been yõ ŋa tɔr za n'ʋ maalɛ à à ŋá za. Ʋlɛ n'ʋ pone a maalʋ tɛɛtɛɛ kʋ̀rɛ a nɩbɛ been been, mɛ̃ a lɛ ʋ na bɔbr a.

¹²Mɛ̃ a lɛ a ƴã-gan na ɩ been ɛ́ tɛr ɓɛrmɛ yaga, ɛ́ a ɓɛrmɛ na saa yãwmɛ, ɓã taa ɩ ƴã-gan been yõ a, lɛ n'a a mɩ̀ ŋmɛ̃ a Kɩrɩta zie.

¹³Bʋ̃ʋ n'ʋ vɛ̃, Vʋʋrʋ been pʋɔ n'a tɩ za de a suob kɛ́ tɩ tʋ̃ɔ́ ɩ ƴã-gã-been, tɩmɛ saa ɩ Zifʋ bɩɩ bɛ ɩ a Zifʋ a, gbãgbaar bɩɩ nɩbɛ na so bɛ tʋɔra a. Ɛ́ a tɩ za a, a Vʋʋrʋ Sõw been yõ n'ʋ ɓãá a tɩ kʋ̃ɔ-nyúur.

¹⁴Ɓɛrmɛ been yõ bɛ n'ʋ a ƴã-gan mɩ́ tɛr ɛ, ɓɛrmɛ yaga n'a.

¹⁵A gbɛ́r tɩ ɩ mɛ̃ ʋ yel'a: «Ɩ̃ bɛ ɩ nũu ɛ, ɩ̃ bɛ pʋɔ a ƴã-gan pʋɔ ɩ», al ƴãw n'a ʋ kʋ̃ʋ cãà pʋɔ a ƴã-gan pʋɔ bɩɩ?

¹⁶A tobr tɩ ɩ mɛ̃ ʋ yel'a: «Ɩ̃ bɛ ɩ mimir ɛ, ɩ̃ bɛ pʋɔ a ƴã-gan pʋɔ ɩ», al ƴãw n'a ʋ kʋ̃ʋ cãà pʋɔ a ƴã-gan pʋɔ bɩɩ?

¹⁷A ƴã-gan za tɩ ɩ mimir yõ a, nyɩnɛ n'a a tobe nãá tɩ be? Ʋʋ za tɩ ɩ tobe a, nyɩnɛ n'a a nyʋɔr nãá be?

¹⁸Ɛcɛ Naaŋmɩn ƴãw nɩ a ɓɛrmɛ been been a ƴã-gan mɛ̃ a lɛ ʋ na bɔbr a.

¹⁹A za tɩ ɓã taa ɩ ɓɛrmɛ been yõ tẽtẽ a, nyɩnɛ n'a a ƴã-gan nãá be?

²⁰A na ɩ lɛ a, ɓɛrmɛ yaga n'a be be, ʋʋ ɩ ƴã-gan been yõ.

²¹A mimir kʋ̃ tʋ̃ɔ́ yel a nũu: «Ɩ̃ bɛ tɛr fʋ yel-ɩra ɩ», ɛ́ a zu mɩ̀ kʋ̃ tʋ̃ɔ́ yel a gbɛ́ɛ: «Ɩ̃ bɛ tɛr nyɩ yel-ɩra ɩ.»

²²Mɔ̃ mɩ̀, a ƴã-gan ɓɛrmɛ al na mɩ́ sãá mɛ̃ a bɛ tɛr fãw towtow a, a fɛr'a kɛ́ a be be.

²³Ɛ́ a al tɩ na mɩ́ nyɛ̃ a bɛ sɛwnɩ ƴãwfʋ yaga a, alɛ n'a tɩ nɩ̃ɛ mɩ́ ƴãwnɛ yaga. A ƴã-gã-ɓɛrmɛ al na ɩrɛ tɩ vĩ a, tɩ ƴãwnɛ a nɩ yaga,

²⁴a al na bɛ ɩrɛ tɩ vĩ a, ƴãwfʋ bɛ fɛrɛ ɩ. Naaŋmɩn maal'ɩ a ƴã-gan, kɛ́ a ɓɛrmɛ al na bɛ maal tɛr ƴãwfʋ a, nyɛrɛ ƴãwfʋ.

²⁵Ʋ ɩ n à ŋá, kɛ́ bʋ́r-taa ta be a ƴã-gan pʋɔ ɩ, ɛcɛ a ƴã-gã-ɓɛrmɛ lãw kaarɛ taa zie.

²⁶A ƴã-gã-ɓɛrmɛ kãw wa wone tuo a, a ƴã-gã-ɓɛrmɛ za lãw nɩ ʋ na wone a tuo. A ƴã-gã-ɓɛrmɛ kãw wa nyɛrɛ ƴãwfʋ a, a ƴã-gã-ɓɛrmɛ za pʋɔ nɩ a ʋ nʋ̃ɔ̀ pʋɔ.

²⁷Nyɩ ɩ n a Kɩrɩta ƴã-gan, ɛ́ ŋa za ɩ a ƴã-gan ŋa ɓɛrmɛ.

²⁸A bɛlɩ dem na be a Lãw-yir pʋɔ a, à ŋá n'a a Naaŋmɩn cɔbrɩ bɛ ƴãw: a de niwn sob a, a nɩ-toni nɛbɛ, a ayi sob a, a naaŋmɩn-ƴɛ̀r-manbɛ, ɛ́ a ata sob ɩ a wul-wulbɛ, al pùorí, a bɛlɩ dem na tɛr a nɔ-ɓãa-yele maalʋ fãw a, al pùorí a bɛl na tɛr a bàalbɛ sanʋ maalʋ a, a nɩbɛ sõwfʋ nɩ a nɩbɛ kaafʋ maalʋ a, nɩ a bɛl na tɛr a ƴɛ̀rʋ nɩr na bɛ wone a fãw a.

²⁹Bɛ za nɛbɛ ɩ nɩ-toni bɩɩ? Bɛ za nɛbɛ ɩ naaŋmɩn-ƴɛ̀r-manbɛ ɛ? Bɛ za ɩ n wul-wulbɛ ɛ? Bɛ za maalɛ nɩ nɔ-ɓãa-yele bɩɩ?

³⁰Bɛ za nɛbɛ páw a bàalbɛ sanʋ maalʋ ʋ? Bɛ za nɛbɛ ƴɛ̀rɛ a ƴɛ̀rʋ nɩr na bɛ wone a bɩɩ? Bɛ za nɛbɛ bãw a ƴɛ̀rʋ á ŋá taabɛ pɛ́ɛ íru bɩɩ?

³¹Nyɩ bɔbr a Naaŋmɩn maal-bɛrɛ bɛrɛ. Ɩ̃ɩ na cãà na wul nyɩ sɔ́r kãw na vɩɛl gãw a za a.