Read Dagara, Northern 1 Korɛ̃tɩ 14 Bible Online

1 Korɛ̃tɩ 14 - Dagara, Northern bible

1 Korɛ̃tɩ 14

¹Nyɩ bɔbr a nɔ̃wfʋ. Nyɩ mɩ̀ bɔbr a maalʋ a Vʋʋrʋ Sõw na tɩrɛ a, baa zuo a za a naaŋmɩn-ƴɛ̀r-manɛ tome maalʋ.

²Bʋ̃ʋ n'ʋ vɛ̃ ʋlɩ sob na ƴɛ̀rɛ ƴɛ̀rʋ nɩr na bɛ wone a, nɩsaalbɛ zie bɛ n'a ʋ ƴɛ̀rɛ ɩ, Naaŋmɩn zie n'a, nɩr za na bɛ wone a ʋ ƴɛ̀rʋ a ƴãw. A Vʋʋrʋ Sõw mɩ́ ƴãw ʋ nɩ yã ʋ manɛ yele nɩsaal yã na kʋ̃ tʋ̃ɔ́ bãw tɔ a.

³Ɛcɛ sob nɛ na ƴɛ̀rɛ naaŋmɩn-ƴɛ̀r-manɛ ƴɛ̀rʋ a, ʋ ƴɛ̀rɛ nɩ a nɩsaalbɛ zie, k'ʋʋ ɩ a bɛ naaŋmɩn-sàw-deb kɛrɛ dɔwlɛ, k'ʋʋ kpaalɩ bɛ, k'ʋʋ mɔwlɩ bɛ.

⁴Ʋlɩ sob na ƴɛ̀rɛ ƴɛ̀rʋ nɩr na bɛ wone a, ʋ yõ n'ʋ nyɛrɛ a tɔnɛ, ɛcɛ sob nɛ na ƴɛ̀rɛ a naaŋmɩn-ƴɛ̀r-manɛ ƴɛ̀rʋ a, a lãw nɩbɛ za nɛbɛ nyɛrɛ a tɔnɛ.

⁵Mãa zie a, ɩ̃ tɩ bɔbr'a kɛ́ nyɩ za nãá ƴɛ̀rɛ ƴɛ̀rʋ nɩr na bɛ wone a, ɛcɛ nyɩ ƴɛ̀rɛ naaŋmɩn-ƴɛ̀r-manɛ ƴɛ̀rʋ, alɛ n'a ɩ̃ nɔnɛ zuo. A sob nɛ na ƴɛ̀rɛ ƴɛ̀rʋ nɩr na bɛ wone a, ʋlɛ bɛ mɩ́ wa ír a pɛr a lãw nɩbɛ tʋ̃ɔ́ nyɛ̃ tɔnɛ a, a sob nɛ na ƴɛ̀rɛ a naaŋmɩn-ƴɛ̀r-manɛ ƴɛ̀rʋ a zuo ʋ na.

⁶Yɛbr i, alɛ ɩ mɛ̃ ɩ̃ wa n a nyɩ nyɛ́b a ƴɛrɛŋa, wa ta ƴɛ̀rɛ ƴɛ̀rʋ nɩr na bɛ wone a, bʋ̃ʋ yel-ɩra n'ʋ ɩ̃ na tɛr a nyɩ zie? A ɩ̃ ƴɛ̀rʋ bɛ wa manɩ yel-sɔwla kãw kʋ̀ nyɩ a, ʋlɛ bɛ wa wa n bãwfʋ kãw a, bɛ ƴɛ̀r naaŋmɩn-ƴɛ̀r-manɛ ƴɛ̀rʋ kʋ̀ nyɩ bɩɩ kʋ̀ nyɩ wulu kãw a, bʋ̃ʋ yel-ɩra n'ʋ ɩ̃ na tɛr a nyɩ zie?

⁷Lɛ n'a a mɩ̀ ŋmɛ̃ a yielu bome zie. Mɛ̃ à ŋá a, a wele nɩ a korijom kɔkɛɛ bɛ wa yire dẽdeni a, ŋmɩŋmɩn n'a bɛ na bãw ʋlɩ bom a weli-pɛblɛ na pɛblɛ a, bɩɩ a korijom ŋmɩɛrɛ na ŋmɩɛr a?

⁸A wɩ-pɛblɛ bɛ wa pɛblɩ a wɩ́ɛ ʋ yi vla a, ãa n'ʋ na cɔbrɩ gù a zɛbr?

⁹Lɛ mɩ̀ n'a a nyɩ zie. A nyɩ nʋɔr wa ƴɛ̀rɛ ƴɛ̀r-bie nɩr na kʋ̃ tʋ̃ɔ́ bãw a, ŋmɩŋmɩn n'a bɛ na bãw a nyɩ ƴɛ̀rʋ pɛr? Nyɩ na dɛ na ƴɛ̀rɛ bɛrɛ vuo pʋɔ.

¹⁰A ƴɛ̀r-pɛ́ɛ bɛ tɛr nʋɔr a tẽ-daa zu ɛ, ɛcɛ been kãw za bɛ be be a ƴɛ̀r-bie bɛ tɛr pɛr ɛ.

¹¹Ɛcɛ mãa bɛ wa wone ƴɛ̀rʋ kãw a, ɩ̃ na ɩ n nɩ-bʋla a sob nɛ na ƴɛ̀rɛ a zie, ɛ́ a sob nɛ na ƴɛ̀rɛ a, ɩ nɩ-bʋla a ɩ̃ zie.

¹²Lɛ n'a, a nyɩɩm mɩ̀, nyɩ na ƴãw fãw bɔbr a Vʋʋrʋ Sõw maalʋ a, nyɩ bɔbr kɛ́ nyɩ kpɛ a al na sõwne a Lãw-yir mɛb ƴãw a naalʋ zuo a za.

¹³Alɛ so, sob nɛ na ƴɛ̀rɛ ƴɛ̀rʋ nɩr na bɛ wone a, a fɛr'a k'ʋʋ puore tʋ̃ɔ́ páw a ƴɛ̀rʋ á ŋá pɛ́ɛ-íru maalʋ.

¹⁴Mãa wa puore ƴɛ̀rɛ ƴɛ̀rʋ nɩr na bɛ wone a, a ɩ̃ tɩɛrʋ mɩ́ sɩrɩ na puore, ɛcɛ a ɩ̃ yã bɛ ɩrɛ bom za ɩ.

¹⁵A na ɩ à ŋá a, ɩ̃ ɩ ŋmɩn? Ɩ̃ na puore nɩ nɩ a Vʋʋrʋ Sõw, ɛ́ mɩ̀ puore nɩ a ɩ̃ yã. Ɩ̃ na yiele na nɩ a Vʋʋrʋ Sõw, ɛ́ mɩ̀ yiele nɩ a ɩ̃ yã.

¹⁶Bʋ̃ʋ n'ʋ vɛ̃, a Vʋʋrʋ Sõw yõ wa n'ʋ ƴãw fʋ puore yãanɩ puoru a, ŋmɩŋmɩn n'a a lãw pʋɔ nɩ-zawlɛ na ƴãw «Amɛn» sɔw a fʋ yãanɩ puoru, bɛ na bɛ bãw a lɛ fʋ na yere a?

¹⁷A fʋ yãanɩ puoru saa vɩɛl yaga za a, ɛcɛ a fʋ tɔ sob bɛ nyɛ̃ maalʋ a pʋɔ ɩ.

¹⁸Naaŋmɩn so yãanɩ, ɩ̃ na ƴɛ̀rɛ ƴɛ̀rʋ nɩr na bɛ wone a zuo a nyɩ za a.

¹⁹Ɛcɛ a lãw nɩbɛ sɔgɔ, ɩ̃ mɩ́ nyɛ̃ na ƴɛ̀r-bie anũu na tɛr wob a nɩbɛ zie, ɩ̃ na na ƴɛ̀r wul'ɩ bɛ a, a sa ƴɛ̀r-bie tùr-pie (10 000) ɩ̃ na na ƴɛ̀r'ɩ ƴɛ̀rʋ nɩr na bɛ wone a.

²⁰Yɛbr i, nyɩ ta tɛr bibi-yã a yele bãwfʋ ƴãw ɛ. Nyɩ ɩ bibiir a yel-faa maalʋ ƴãw, ɛcɛ a yele bãwfʋ ƴãw a, nyɩ ɩ nɩ-bɛrɛ.

²¹Bɛ sɛb'ɩ à ŋá a Naaŋmɩn wulu sɛbɛ pʋɔ: «A Sore yel'a: nɩbɛ na ƴɛ̀rɛ ƴɛ̀r-yoru a nɛbɛ ɩ̃ na ƴãw bɛ ƴɛ̀r a nɩ-bʋʋrɛ bɛ ŋa zie, nɩ-sãanbɛ nʋɔr'ʋ ɩ̃ na ƴɛ̀r'ɩ a bɛ zie, ɛ́ a lɛ mɩ̀ a, bɛ cãà kʋ̃ bɛr wõ a ɩ̃ ƴɛ̀rʋ ɛ[24].»

²²A na ɩ à ŋá a, a ƴɛ̀rʋ nɩr na bɛ wone a maalʋ bɛ ɩ bãwfʋ a naaŋmɩn-sàw-dierbɛ ƴãw ɛ, ʋ ɩ n bãwfʋ a naaŋmɩn-bɛ-sàw-dierbɛ ƴãw. A naaŋmɩn-ƴɛ̀r-manɛ maalʋ ʋl a, ʋ bɛ ɩ bãwfʋ a naaŋmɩn-bɛ-sàw-dierbɛ ƴãw ɛ, ʋ ɩ n bãwfʋ a naaŋmɩn-sàw-dierbɛ ƴãw.

²³Mɛ̃ à ŋá a, alɛ ɩ mɛ̃ a Lãw-yir nɩbɛ za ɓã n taa, ɛ́ bɛ za ƴɛ̀rɛ ƴɛ̀rʋ nɩr na bɛ wone a, a nɩ-zawlɛ bɩɩ a naaŋmɩn-bɛ-sàw-dierbɛ wa kpɩɛr a, bɛ kʋ̃ tɩɛr kɛ́ nyɩ yarɛ na ɩ?

²⁴Ɛcɛ, bɛ za nɩ̃ɛ wa ƴɛ̀rɛ naaŋmɩn-ƴɛ̀r-manɛ ƴɛ̀rʋ, ɛ́ naaŋmɩn-bɛ-sàw-diere bɩɩ nɩ-zawla wa kpɛ a, ʋ na nyɛ̃ nɩ a ʋ sãwna bɛ za na yere a, nɩ a ʋ yele bɛ za na bãwnɛ a.

²⁵A ʋ pʋ-tɩɛr-sɔwla na sãá na. Ʋ na lo n tẽw vɔblɩ muru, ʋ na puore nɩ a Naaŋmɩn nɩ ʋ tʋɔra-siwru ɛ́ yere kɛ́ a Naaŋmɩn sɩrɩ na be a nyɩ sɔgɔ.

²⁶Yɛbr i, a na ɩ à ŋá a, ɩ̃ ɩ ŋmɩn? Nyɩ na mɩ́ wa ɓã taa a, a nyɩ kãw na mɩ́ tʋ̃ɔ́ na yiele yielu, kãw tɩrɛ wulu bɩɩ yel-sɔwla kãw, kãw ƴɛ̀rɛ ƴɛ̀rʋ nɩr na bɛ wone a ɛ́ íre a pɛ́ɛ. Ɛcɛ à á ŋá za a, a ɩrɛ a lãw ʋ kɛrɛ.

²⁷Nyɩ mɩnɛ wa ƴɛ̀rɛ ƴɛ̀rʋ nɩr na bɛ wone a, bɛ ɩ nɩbɛ ayi, bɛ ta zuo nɩbɛ ata ɩ, ɛ́ ŋa mɩ́ ƴɛ̀r, ɛ́ kʋ̀ ŋa ʋ ƴɛ̀r, ɛ́ nɩr be be íre a pɛ́ɛ.

²⁸Nɩr bɛ wa ka be na íre a ƴɛ̀rʋ nɩr na bɛ wone a pɛ́ɛ a, a sob nɛ na ƴɛ̀rɛ a ƴɛ̀rʋ á ŋá a, ʋ zɩ̃ gbili a lãw pʋɔ, ʋ ƴɛ̀rɛ nɩ ʋ tʋɔra ɛ́ ƴɛ̀rɛ nɩ a Naaŋmɩn.

²⁹A naaŋmɩn-ƴɛ̀r-manɛ ƴɛ̀rʋ ƴãw a, nɩbɛ ayi bɩɩ ata mɩ́ ƴɛ̀rɛ, ɛ́ a ŋmaarɛ jiele a bɛ ƴɛ̀rʋ.

³⁰Nɩr kãw na be a lãw pʋɔ wa páw yel-sɔwla kãw bãwfʋ a, a fɛr'a k'aa ʋlɩ sob na tɩ ƴɛ̀rɛ a, ŋmãa a ʋ ƴɛ̀rʋ bɛr.

³¹Nyɩ za na tʋ̃ɔ́ na ƴɛ̀rɛ naaŋmɩn-ƴɛ̀r-manɛ ƴɛ̀rʋ, ɛcɛ, nyɩ ƴɛ̀rɛ lɩɛrɛ taa, k'aa nɩbɛ za tʋ̃ɔ́ nyɛ̃ wulu nɩ mɔwlʋ.

³²A naaŋmɩn-ƴɛ̀r-manɛ so a naaŋmɩn-ƴɛ̀r-manɛ tɩɛrʋ na ƴãw ʋ ƴɛ̀rɛ a.

³³Bʋ̃ʋ n'ʋ vɛ̃, Naaŋmɩn bɛ ɩ bʋnɛ-ɩrɛ Naaŋmɩn ɛ, ʋ ɩ n ƴã-ɓaarʋ Naaŋmɩn. Mɛ̃ a lɛ a na ɩrɛ a kɩrɩta-nɩbɛ Lãw-yie za pʋɔ a,

³⁴a pɔwbɛ, bɛ mɩ́ zɩ̃ gbili a nyɩ lãw pʋɔ: a bɛ tɛr sɔ́r kɛ́ bɛ de ƴɛ̀rʋ a be ɩ. Mɛ̃ a lɛ a Naaŋmɩn wulu na bin a, a fɛr'a kɛ́ bɛ mɩ́ tɛr nʋɔr-sàwfʋ ɛ́ zɩ̃ gbili.

³⁵Bɛlɛ wa bɔbr kɛ́ bɛ bãw yel kãw pɛr a, bɛ̃ɛ sowri a bɛ sɩr a yir. A bɛ sɛw kɛ́ pɔw ƴɛ̀rɛ a nyɩ lãw pʋɔ ɩ.

³⁶Nyɩɩm zie n'a a Naaŋmɩn ƴɛ̀rʋ tĩ bɩɩ? Nyɩɩm tɛwr nɛbɛ páw ʋ bɩɩ?

³⁷Nɩr wa tɩɛr k'ʋʋ ɩ n naaŋmɩn-ƴɛ̀r-manɛ bɩɩ k'ʋʋ tɛr'ɩ Vʋʋrʋ Sõw maalʋ kãw a, a fɛr'a k'ʋʋ nyɛ̃ Sore nɔ-ƴãwna a sɛbrʋ á ŋá ɩ̃ na kʋ̀rɛ nyɩ a pʋɔ.

³⁸Nɩr bɛ wa nyɛ̃ Sore nɔ-ƴãwna a pʋɔ a, a wul'a kɛ́ Naaŋmɩn mɩ̀ bɛ bãw ʋ ɛ.

³⁹A na ɩ lɛ a, yɛbr i, nyɩ bɔbr kɛ́ nyɩ ɩ naaŋmɩn-ƴɛ̀r-manbɛ, ɛ́ ta diwr ƴɛ̀rʋ nɩr na bɛ wone a bɛrɛ ɩ,

⁴⁰ɛcɛ a za a, a mɩ́ ɩrɛ mɛ̃ a lɛ a na sɛw a, ɛ́ ta bʋ̀nɛ ɩrɛ ɩ.