Read Dagara, Northern 1 Korɛ̃tɩ 15 Bible Online

1 Korɛ̃tɩ 15 - Dagara, Northern bible

1 Korɛ̃tɩ 15

¹Yɛbr i, ɩ̃ lɛb'a sɩ̃wnɛ a nyɩ tɩɛrʋ a Yel-nʋ̃ɔ̀ ɩ̃ na manɩ kʋ̀ nyɩ a ƴãw, a Yel-nʋ̃ɔ̀ ŋa nyɩ na wõ ɛ́ sàw de ʋ kpɛ̃w za a.

²Ʋlɛ n'ʋ na faa nyɩ, nyɩmɛ wa tɛr ʋ vla mɛ̃ a lɛ ɩ̃ na wa wa man ʋ kʋ̀ nyɩ a. Alɛ bɛ wa ɩ lɛ a, nyɩ nãà wa sàw na de zawla.

³A wulu ŋa mãa mɩŋa na tɩ páw a, ɩ̃ de nɩ niwn lʋɔr'ʋ kʋ̀ nyɩ: Kɩrɩta kpi n a tɩ yel-bebe ƴãw, mɛ̃ a lɛ a Sɛb-son na tɩ yel a.

⁴Bɛ ũù ʋ na, ʋ lɛb'a yi a kũu pʋɔ a bibie ata sob, mɛ̃ a lɛ a Sɛb-son na tɩ yel a.

⁵Ʋ wul'ɩ ʋ tʋɔra a Pɩɛr, al pùorí ʋ wul ʋ tʋɔra a nɩ-toni pie nɩ ayi.

⁶A pùorí, ʋ lɛb'a wul ʋ tʋɔra yɛbr kɔbr anũu (500) nɩ dɔwlɛ, bɛ za lãw nyɛ̃ ʋ. A bɛ yaga zie cãà na vʋʋrɛ, ɛcɛ bɛ mɩnɛ kpi na.

⁷Al pùorí ʋ wul ʋ tʋɔra Zakɩ, ɛ́ lɛb wul ʋ tʋɔra a nɩ-toni za.

⁸Ʋ na wul a ʋ tʋɔra a bɛ ŋa za baar'a, ʋ pãa mɩ̀ wa bɩɛr'a wul ʋ tʋɔra a mãa mɩ̀, mãa na ɩ mɛ̃ bɛ dɔw mɛ̃ na ɩ̃ bɛ ta a.

⁹Bʋ̃ʋ n'ʋ vɛ̃, ɩ̃ ɩ n a nɩ-toni za pʋɔ pʋrɩ woro, ɩ̃ mɩ̀ bɛ sɛw kɛ́ bɛ bʋɔlɛ mɛ̃ nɩ-tona ɩ, ɩ̃ na dɔwrɩ a Naaŋmɩn Lãw-yir a ƴãw.

¹⁰Naaŋmɩn maalʋ n'a so ɩ̃ ŋmɛ̃ à à ŋá ɩ̃ na ŋmɛ̃ a, ɛ́ a ʋ maalʋ a ɩ̃ zie bɛ ɩ zawla ɩ. Ɩ̃ nɩ̃ɛ na tõ zuo bɛ za: mãa bɛ n'ʋ ɛ, a Naaŋmɩn maalʋ na be a ɩ̃ zie a n'ʋ.

¹¹A na ɩ à ŋá a, a mãa n'ʋ o, a bɛlɛ nɛbɛ o, a yel ŋa n'ʋ tɩ hiere yere kʋ̀rɛ nyɩ, ɛ́ ʋlɛ n'ʋ nyɩ sàw de.

¹²Tɩ hiere na kɛ́ a Kɩrɩta lɛb'a yi a kũu pʋɔ, ŋmɩŋmɩn za n'a nyɩ mɩnɛ yere kɛ́ kũuni-lɛb-yibu bɛ ka?

¹³Kũuni-lɛb-yibu bɛ wa ka be a, a Kɩrɩta mɩ̀ bɛ lɛb yi a kũuni pʋɔ ɩ,

¹⁴ɛ́ a Kɩrɩta bɛ wa lɛb yi a kũu pʋɔ a, a yele tɩ na hiere yere kʋ̀rɛ nyɩ a ɩ n zawla, ɛ́ a nyɩ naaŋmɩn-sàw-deb mɩ̀ ɩ n zawla.

¹⁵Lɛb waar mɩ̀, a nɩbɛ na nyɛ̃ tɩ na tɩ ɩ Naaŋmɩn dãsɩ-ziri dem, bʋ̃ʋ n'ʋ vɛ̃, tɩ yel'a k'ʋʋ ɩ n a Kɩrɩta lɛb yi a kũu pʋɔ, zɩ̃ k'ʋʋ bɛ ɩ a lɛ ɩ, alɛ wa ɩ sɩza n'a k'aa kũuni bɛ lɛbr yire a.

¹⁶Ɛ́ a kũuni bɛ wa lɛbr yire a, a Kɩrɩta mɩ̀ bɛ lɛb yi a kũu pʋɔ ɩ.

¹⁷Ɛ́ a Kɩrɩta bɛ wa lɛb yi a, a nyɩ Naaŋmɩn sàwfʋ ɩ n zawla, ɛ́ nyɩ cãà na be a nyɩ yel-bebe pʋɔ.

¹⁸Ɛ́ alɛ wa ɩ à ŋá a, a bɛlɩ dem mɩ́ na saa sàw de a Kɩrɩta ɛ́ kpi a, bɛ wɛ na.

¹⁹Tɩmɛ wa ƴãw a tɩ tɩɛrʋ a Kɩrɩta ƴãw tẽw zu ka nyɔ-vʋʋrʋ ŋa tɛwr ƴãw a, tɩ yúor'ɩ we a nɩsaalbɛ za pʋɔ!

²⁰Ɛcɛ lɛ bɛ n'a ɩ! Kɩrɩta lɛb'a yi a kũuni pʋɔ, wul k'aa bɛlɩ dem na kpi a mɩ̀ na lɛb'a yi.

²¹Nɩ-been na n'ʋ so a kũu be a, nɩ-been n'ʋ mɩ̀ so a kũu-pʋɔ-lɛb-yibu be.

²²Mɛ̃ a lɛ a nɩsaalbɛ za na lãw nɩ a Adama kpiir a, lɛ n'a bɛ za na lãw nɩ a Kɩrɩta lɛb vʋʋrɛ,

²³ŋa za a ʋ pal pʋɔ: a dãw-niwn sob n'ɩ a Kɩrɩta, al pùorí a bɛlɩ dem na na ɩ a Kɩrɩta nɩ-sori a ʋ lɛb-waa daar a.

²⁴Al pùorí, a yele za nʋɔr na kʋ na, a lɛn daar a Kɩrɩta nãà wa sãw nɩ-kpɛ̃ɛnʋ dɩb za bɛr a, sãw fãw za nɩ kpɛ̃w bʋʋrɛ za bɛr ɛ́ de a naalʋ kʋ̀ a Naaŋmɩn Sãà a.

²⁵Bʋ̃ʋ n'ʋ vɛ̃, a fɛr'a k'aa Kɩrɩta dɩrɛ naalʋ ɛ́ gù a Naaŋmɩn wa tɩ nɛb a ʋ dɔ̃ dem za bin a ʋ pile.

²⁶A dɔ̃ sob pɛ-baara bɛ na na sãw bɛr a n'ɩ a kũu.

²⁷Bʋ̃ʋ n'ʋ vɛ̃, a Sɛb-sõw yel'a: «Naaŋmɩn nɛ̃ nɩ bom za bin a Kɩrɩta pile[25].» Ɛcɛ a Sɛb-sõw ƴɛ̀r-bie á ŋá: «Naaŋmɩn nɛ̃ nɩ bom za bin a Kɩrɩta pile», wule nɩ cãàmɩlɛ k'aa Naaŋmɩn na nɛ̃ bom za bin a Kɩrɩta pile a bɛ pʋɔ ɩ.

²⁸Ɛ́ a Bie wa so bom za a, a Naaŋmɩn na ƴãw ʋ so bom za a, mɩ̀ na so ʋ na, lɛ n'a a Naaŋmɩn na dɩrɛ naalʋ bom za zu.

²⁹Alɛ bɛ wa ɩ à ŋá a, a bɛlɩ dem na mɩ́ ƴãw bɛ kʋ̀ bɛ a suob a kũuni ƴãw a, bʋ̃ʋ n'ʋ bɛ pãa mɩ̀ tɩɛrɛ kɛ́ bɛ na páw na a? Alɛ wa ɩ sɩza n'a k'aa kũuni bɛ lɛbr yire a, bʋ̃ʋ so bɛ mɩ́ ƴãw bɛ kʋ̀ bɛ a suob a kũuni ƴãw?

³⁰Ɛ́ a tɩɩm tɛɛ za, bʋ̃ʋ so a kũu mɩ́ jɩɛrɛ tɩ kʋralɛ.

³¹Yɛbr i, bibir za n'a ɩ̃ kpiir, a yel ŋa ɩ n sɩza, mɛ̃ a lɛ nyɩ na sɩrɩ ɩ a ɩ̃ dɛpaal-bom, mãa nɩ a tɩ Sore Yeezu Kɩrɩta na lãw taa a ƴãw a.

³²Alɛ tɩ ɩ nɩsaalʋ tɛwr ƴãw n'a a, bʋ̃ʋ ƴãw n'a ɩ̃ tɩ zɛb'ɩ a wɛ-dʋn a Efɛɛzɩ? A kũuni bɛ wa lɛbr yire a, mɛ̃ a lɛ a zʋkpar na yel a, tɩ dɩrɛ ɛ́ nyúur, tɩ na na kpi bio a ƴãw[26].

³³Nyɩ ta bɛ̀lɛ nyɩ tʋɔra ɩ: a tu-taa na bɛ vɩɛl a sãwnɛ nɩ a nyɔ-vʋʋr-vla bɛrɛ.

³⁴Nyɩ ƴãw fãw lɛb bãw yã ɛ́ bɛr a yel-bier maalʋ. Ɩ̃ yel ƴãw nyɩ vĩ: nyɩ mɩnɛ bɛ bãw a Naaŋmɩn ɛ.

³⁵Ɛcɛ nɩbɛ na sowre na: «Ŋmɩŋmɩn n'a a kũuni lɛbr yire? Ƴã-gã-buor'ʋ bɛ mɩ́ lɛb yi n?»

³⁶Dãbol nɛ b! A bʋ̃-bir fʋ na mɩ́ bʋ̀r a, ʋlɛ bɛ wa kpi a, ʋ na ɩ n ŋmɩn bul?

³⁷Bʋ̃-bul bɛ n'ʋ fʋ mɩ́ bʋ̀r ɛ, bʋ̃-bir'ʋ, ka-bir bɩɩ bʋ̃-kãw bir.

³⁸A pùorí n'a a Naaŋmɩn mɩ́ ɩ a bʋ̃-bir bul tɛr a ƴã-gan ʋl a Naaŋmɩn na bɔbr a, bʋ̃-bʋʋrɛ za mɩ́ bul'a tɛr ʋ ƴã-gan.

³⁹Ƴã-gã-nɛn za be n ʋ tʋɔra: a nɩsaal ƴã-gã-nɛn nɩ a dʋn dem, nɩ a lili dem nɩ a zʋ́mɛ́ dem bɛ ɩ been ɛ.

⁴⁰Salom zu bome ƴã-gamɛ be n be, tẽw zu bome ƴã-gamɛ mɩ̀ be be, ɛ́ a vɩɛlʋ bɛ ɩ been.

⁴¹A mʋ̃tɔ̃w nyɩwrʋ be n ʋ tʋɔra, a cuw dem mɩ̀ be ʋ tʋɔra, ŋmar-bie dem mɩ̀ be ʋ tʋɔra, ŋmar-bir kãw mɩ́ nyɩwrɛ na zuo ʋ tɔ mɩ̀.

⁴²Lɛ mɩ̀ n'a a ŋmɛ̃ a bɛlɩ dem na na lɛb yi a kũuni pʋɔ a zie. Ƴã-gã-kpiira n'ʋ bɛ mɩ́ ũù, ɛ́ ʋlɛ wa lɛb yi a kũuni pʋɔ a, ʋ bɛ mɩ́ lɛb tɛr kũu daar ɛ.

⁴³Ƴã-gã-jewra n'ʋ bɛ mɩ́ ũù, ʋʋ lɛb yi n vɩɛlʋ. Bãbàalʋ ƴã-gan n'ʋ bɛ mɩ́ ũù, ʋʋ lɛb yi tɛr fãw bɛ dɩ vuo ɩ.

⁴⁴Nɩsaal ƴã-gan tɛwr'ʋ bɛ mɩ́ ũù, ʋʋ lɛb yi ɩ ƴã-gan Naaŋmɩn Vʋʋrʋ na so a. Nɩsaal ƴã-gan tɛwr be n be, ƴã-gan Vʋʋrʋ na so a mɩ̀ be be.

⁴⁵Al ƴãw n'a a Sɛb-sõw yel a ƴɛ̀r-bie á ŋá: «A nɩsaal-dãw-niwn sob, a Adama[27], ʋ tɩ ɩ n bʋ̃-vʋʋra. A Adama pɛ-baara ɩ n Vʋʋrʋ nɩr na tɩrɛ nyɔ-vʋʋrʋ a.»

⁴⁶Ɛcɛ a Vʋʋrʋ nɩr bɛ n'ɩ a dãw-niwn sob ɛ, a ʋl na ɩ nɩsaal tɛwr'a n'ʋ, a Vʋʋrʋ nɩr pãa tu.

⁴⁷A Nɩsaal-dãw-niwn sob bɛ na maal'ɩ tẽsɔw tanɛ a, ɩ n tẽsɔw bom. A nɩsaal ayi sob ʋl yi n salom zu.

⁴⁸A tẽsɔw bome ŋmɛ̃ na taa nɩ a ʋl bɛ na tɩ maal'ɩ tẽsɔw tanɛ a, ɛcɛ a salom zu bome mɩ̀ ŋmɛ̃ taa nɩ a ʋl na yi a salom zu a.

⁴⁹Mɛ̃ a lɛ tɩ na ŋmɛ̃ taa nɩ a tẽsɔw nɩr a, lɛ n'a tɩ mɩ̀ nãà ŋmɛ̃ taa nɩ a nɩr ʋl na yi a salom zu a.

⁵⁰Yel ŋa n'ʋ ɩ̃ bɔbr k'ɩ̃ɩ yel, yɛbr i: nɩsaal na ɩ ƴã-gan nɩ zɩ̃ɩ tɛwr'a kʋ̃ tʋ̃ɔ́ kpɛ a Naaŋmɩn Naalʋ pʋɔ ɩ, ɛ́ bʋ̃-kpiira kʋ̃ tʋ̃ɔ́ pʋɔ bʋ̃-bɛ-kpiira yele pʋɔ ɩ.

⁵¹Nyɩ vɛ̃ ɩ̃ yel yel-sɔwla kãw kʋ̀ nyɩ. Tɩ za bɛ kpiir ɛ, ɛcɛ tɩ za na lɩɛb'a,

⁵²daƴen daadaa, tɩ na lɩɛb'ɩ fɔ̃wlɛ a wɩ-pɛ-baara wa pɛblɩ a. Bʋ̃ʋ n'ʋ vɛ̃, a wɩ́ɛ wa pɛblɩ a, a kũuni na lɛb'a yi kʋ̃ lɛb kpi towtow ɛ, ɛ́ a tɩɩm ƴã-gamɛ na lɩɛb'a.

⁵³Bʋ̃ʋ n'ʋ vɛ̃, a fɛr'a kɛ́ a nɩr ʋl na na wɛ a, su a nɩr ʋl na bɛ wɛrɛ a. A nɩr ʋl na na kpi a, su a nɩr ʋl na bɛ kpiir a.

⁵⁴A nɩr ʋl na na wɛ a, wa su a nɩr ʋl na bɛ wɛrɛ a, ɛ́ a nɩr ʋl na na kpi a, su a nɩr ʋl na bɛ kpiir a, lɛ n'a a Sɛb-sõw ƴɛ̀r-bie á ŋá na tu: «Bɛ zɛb'a tʋ̃ɔ́ a kũu pẽlẽpẽlẽ.

⁵⁵Alɛ kũu u, nyɩn lowr'a fʋ zɛb tʋ̃ɔ́? Alɛ kũu u, a fʋ pĩi-zɛl wa mɔ̃?[28]»

⁵⁶A kũu pĩi-zɛl n'ɩ a yel-bier ɛ́ a yel-bier fãw n'ɩ a Moyiir wulu.

⁵⁷Naaŋmɩn so puoru, ʋl na ɩrɛ kɛ̀ tɩ zɛbr tʋ̃ɔ́nɛ, ɛ́ a ɩ a tɩ Sore Yeezu Kɩrɩta ƴãw n'a a.

⁵⁸A na ɩ lɛ a, ɩ̃ yɛb-nɔnɩ i, nyɩ ƴãw fãw kpɛmɛ, ɛ́ taa bãwnɛ damnʋ ɛ. Nyɩ kɛrɛ kʋralɛ a Sore tome pʋɔ, ɛ́ bãwnɩ a kɛ́ nyɩ bɛ hanɛ lãwnɛ nɩ a Sore zawla ɩ.