Read Dagara, Northern 1 Korɛ̃tɩ 3 Bible Online

1 Korɛ̃tɩ 3 - Dagara, Northern bible

1 Korɛ̃tɩ 3

¹Yɛbr i, ɩ̃ bɛ tʋ̃ɔ́ ƴɛ̀r a nyɩ zie mɛ̃ nɩbɛ na tɛr a Naaŋmɩn Vʋʋrʋ a ɩ. Ɩ̃ ƴɛ̀r'ɩ a nyɩ zie mɛ̃ nɩbɛ na ɩ nɩsaalbɛ tɛwr a, mɛ̃ bibi-pʋrmɛ a naaŋmɩn-sàw-deb pʋɔ a.

²Bʋ̀rʋ n'a ɩ̃ kʋ̀ nyɩ nyɩ nyũ, bʋ̃-dɩ-tɩbrʋ bɛ n'a ɩ: nyɩ kʋ̃ʋ tɩ tʋ̃ɔ́ a tɛr ɛ. Ɛ́ a dɩ̃a mɩ̀ a, nyɩ cãà kʋ̃ tʋ̃ɔ́ a ɩ,

³nyɩ na cãà ɩ nɩsaalbɛ tɛwr a ƴãw. Nyuur nɩ taw-taa na be a nyɩ cará a ƴãw, nɩsaalʋ nɩbɛ bɛ n'ɩ nyɩ ɛ? Ɛ́ nɩsaalʋ ɩb tɛwr bɛ n'a nyɩ ɩrɛ ɩ?

⁴Kãw na mɩ́ wa yel kɛ́: «Pol so m», ɛ́ kãw kɛ́: «Apɔlɔsɩ so m» a, nɩsaalbɛ ɩb tɛwr bɛ n'a nyɩ mɩ́ ɩrɛ ɩ?

⁵A ɩ lɛ ãa n'ɩ a Apɔlɔsɩ? Ãa n'ɩ a Pol? Tɩ ɩ n tõ-tõ-biir na ɩ nyɩ páw a naaŋmɩn-sàw-deb a. Tɩ kãw za tõ n a ʋ tome tu n a maalʋ a Sore na kʋ̀ ʋ a.

⁶Mãa sɛl'ɩ a tɩɛ, Apɔlɔsɩ cɔ̀r, ɛcɛ Naaŋmɩn n'ʋ tɩ ɩrɛ ʋ kɛrɛ.

⁷A na ɩ à ŋá a, a sob nɛ na sɛl a nɩ a sob nɛ na cɔ̀r a, bɛ ɩ bom ɛ, Naaŋmɩn yõ n'ʋ ɩ bom, ʋl na ɩrɛ a tɩɛ ʋ kɛrɛ a.

⁸A sob nɛ na sɛl a nɩ a sob nɛ na cɔ̀r a ɩ n been, ɛ́ ŋa za na páw nɩ a ʋ sã-ya sɛw taa nɩ a ʋ tome.

⁹Naaŋmɩn lãw-tõ-taabɛ n'ɩ tɩ, ɛ́ nyɩmɛ nɛbɛ ɩ a Naaŋmɩn púo. Nyɩmɛ nɛbɛ mɩ̀ ɩ a yir a Naaŋmɩn na mɩɛr a.

¹⁰Mɛ̃ a lɛ a Naaŋmɩn na kʋ̀ m a maalʋ a, ɩ̃ sʋ̃ɔ́ nɩ a yir pɛr mɛ̃ nɩr na sɩrɩ bãw a yir ŋmãafʋ yele a, ɛ́ nɩ-yũo mɩɛr dɔwlɛ. Ɛcɛ ŋa za, ʋ mɩ́ gù vla a lɛ ʋ na mɩɛr a.

¹¹Ɛ́ a yir pɛr a, nɩr kʋ̃ tʋ̃ɔ́ sʋ̃ɔ́ kãw ƴãw pʋɔ a ʋl na be be a ƴãw ɛ: a pɛr lɛ kɛ́ a Yeezu Kɩrɩta.

¹²Salm-pla bɩɩ salm-zɩɛ n'a bɛ mɩɛr'ɩ dɔwlɛ a yir pɛr ŋa zuo o, kʋsɛ-vɩɛlɩ bɩɩ daar'a o, mʋ̃ɔ bɩɩ kɛkɛɛ n'a o,

¹³ŋa za tome nãà sãá nɩ cãàmɩlɛ. A ƴɛ̀rʋ-maalʋ bibir na ɩ na bɛ bãw à ŋà za tome, vũu na n'a mɩ́ ɩ a bibir ŋa ʋ sãá a ƴãw, ɛ́ a vũu na ɩ n ŋa za tome kaa, bãw a ŋmɛ̃a.

¹⁴Sob nɛ mɩɛrʋ ton bɛ wa dɩ vũu a, ʋ na páw nɩ sã-ya.

¹⁵Ɛ́ sob nɛ mɩɛrʋ ton wa dɩ vũu a, ʋ kʋ̃ páw sã-ya ɩ. A ʋl tɔr za na páw nɩ a faafʋ, ɛcɛ a na ɩ na mɛ̃ a lɛ bɛ na mɩ́ tu tɔl a vũu pʋɔ páw a faafʋ a.

¹⁶Nyɩ bɛ bãw kɛ́ nyɩ ɩ n a Naaŋmɩn yir, nɩ k'aa Naaŋmɩn Vʋʋrʋ kpɩɛr'ɩ a nyɩ pʋɔ ɩ?

¹⁷Nɩr wa sãw a Naaŋmɩn yir bɛr a, Naaŋmɩn mɩ̀ na sãw nɩ a ʋ sob bɛr. Bʋ̃ʋ n'ʋ vɛ̃, a Naaŋmɩn yir ɩ n sõw, ɛ́ nyɩmɛ n'ɩ a yir ŋa.

¹⁸Nɩr kãw za taa wa nanɩ bɛ̀lɛ ʋ tʋɔra ɩ: nɩr wa be a nyɩ pʋɔ tɩɛrɛ k'ʋʋ ɩ n yã-bãwnɛ a tẽw ŋa zu a, ʋ lɩɛbɩ gẽgemi sob, tʋ̃ɔ́ ɩ yã-bãwnɛ,

¹⁹bʋ̃ʋ n'ʋ vɛ̃, a tẽw ŋa zu yã-bãwfʋ ɩ n gẽgemi Naaŋmɩn zie. A Sɛb-sõw sɩrɩ na yel à ŋá: «Naaŋmɩn mɩ́ nyɔw nɩ a yã-bãwnbɛ a bɛ cɩbɛ pʋɔ[5]»,

²⁰lɛ nɩ kɛ́: «A Sore bãw nɩ a yã-bãwnbɛ pʋ-tɩɛrʋ, ʋ bãwnɩ a na a na ɩ tɩɛr-zawlɛ a.[6]»

²¹A na ɩ à ŋá a, nɩr za taa wa zɛwr ʋ tʋɔra nɩsaalbɛ ƴãw ɛ. Nyɩmɛ sɩrɩ so bom za:

²²Pol, Apɔlɔsɩ bɩɩ Pɩɛr, a tẽ-daa, a nyɔ-vʋʋrʋ bɩɩ a kũu, a dɩ̃a bɩɩ a nɩdaar, nyɩmɛ so a za,

²³ɛcɛ a Kɩrɩta so nyɩ, ɛ́ Naaŋmɩn so a Kɩrɩta.