Read Dagara, Northern 1 Korɛ̃tɩ 5 Bible Online

1 Korɛ̃tɩ 5 - Dagara, Northern bible

1 Korɛ̃tɩ 5

¹A nɩbɛ wone na bɛ yere a ziir za kɛ́ pɩ̃ɔ-ɩb kãw be n a nyɩ zie, ɛ́ a pɩ̃ɔ-ɩb nɛ kpɛ faa tɩ zuo. Nɩ-bʋʋr-yoru nɩbɛ tɛɛ za kʋ̃ sàw maalɩ a yel-bier ŋa tɔ ɩ. Bɛ manɛ na k'aa nyɩ kãw tɛr'ɩ a ʋ sãà pɔw ʋ ɩ a ʋ pɔw[8].

²A tɩ sɛw na k'aa ɩ kpɩɛrʋ a nyɩ zie, ɛ́ bɛ diw a nɩr ŋa tɔ bɛr a nyɩ sɔgɔ, nyɩɩm nɩ̃ɛ bɛr ɛ́ zɛwr nyɩ tʋɔra.

³Mãa ƴãw a, a ɩ̃ ƴã-gan bɛ be a nyɩ zie ɩ, ɛ́ a ɩ̃ tɩɛrʋ be n be. A sob nɛ na ɩ a ɩb ŋa tɔ a, ɩ̃ maal'ɩ ʋ nɩ a ƴɛ̀rʋ baarɩ mɛ̃ ɩ̃ be n be a.

⁴Nyɩmɛ wa ɓã taa ɛ́ a ɩ̃ tɩɛrʋ be a nyɩ sɔgɔ a, a Sore Yeezu yúor ƴãw nɩ a ʋ fãw zũú,

⁵nyɩ de a nɩr ŋa tɔ ƴãw Sɩtaana nũú a ʋ ƴã-gan kũu ƴãw, k'aa ʋ sɩ́ɛ páw a faafʋ a Sore waa bibir.

⁶A bom nɛ ƴãw nyɩ na zɛwr nyɩ tʋɔra a bɛ vɩɛl ɛ. Nyɩ bɛ bãw kɛ́ dãbɩl blãlɛ n'a mɩ́ ɩ a zɔ̃ za ìr ɛ?

⁷Nyɩ so a dãbɩl-kʋra dɛwr bɛr, tʋ̃ɔ́ ɩ zɔ̃-bu-paala bɛ na bɛ ƴãw dãbɩl a. Bʋ̃ʋ n'ʋ vɛ̃, a Kɩrɩta na ɩ a tɩ Pakɩ pele a, bɛ kʋ ʋ na[9].

⁸A na ɩ lɛ a, tɩ maalɛ a cuw, ɛcɛ tɩ ta maalɛ ʋ nɩ dãbɩl-kʋra ɩ, tɩ ta maalɛ ʋ nɩ a po-tuolu nɩ a faalʋ dãbɩl ɛ, tɩ maalɛ ʋ nɩ dipɛ̃ na bɛ ƴãw dãbɩl a: a vɩɛlʋ nɩ yel-mɩŋa dipɛ̃ na bɛ ƴãw dãbɩl a[10].

⁹Ɩ̃ sɛb nyɩ na kɛ́ nyɩ ta pɩɛlɛ a pɩ̃ɔ-yel-maalbɛ ɩ.

¹⁰A tẽ-daa ŋa pɩ̃ɔ-yel-maalbɛ bɩɩ a bɛl na mɩ́ nyɛ̃ a bɛ tɔ bom a mimir zaalɛ a, bɩɩ a tẽ-daa ŋa nyãnyuwr nɩ a tɩbɛ dem za bɛ n'a ɩ̃ yere ɩ, alɛ bɛ ɩ lɛ, a nãá fɛr'a kɛ̀ nyɩ yi zaa a tẽ-daa pʋɔ.

¹¹Ɩ̃ sɛb nyɩ na kɛ́ nyɩ ta pɩɛlɛ nɩr na dɩ kɛ́ kɩrɩta-nɩr a, ʋlɛ wa ɩ pɩ̃ɔ-yel-maalɛ, nɩr na mɩ́ nyɛ̃ a ʋ tɔ bom a mimir zaalɛ a, bɩɩ ʋlɛ wa maalɛ tɩbɛ bɩɩ ɩ gɛgɛra, dã-kuole nɩ nyãnyuge a. Nyɩ mɩ̀ ta mɩ́ lãw nɩ a nɩr ŋa tɔ dɩ bom ɛ.

¹²A bɛlɩ dem na bɛ ɩ kɩrɩta-nɩbɛ a, a bɛ yele bãwfʋ ya jɩ́rɛ mɛ̃ na bɩɩ? Bɛlɩ dem na ɩ kɩrɩta-nɩbɛ a yele bɛ n'a nyɩ bãwnɛ ɩ?

¹³A bɛl na bɛ ɩ kɩrɩta-nɩbɛ a, Naaŋmɩn n'ʋ na bãw a bɛ yele. «Nyɩ ír a nɩ-faa bɛr a nyɩ sɔgɔ[11]», mɛ̃ a lɛ a Sɛb-sõw na yel a.