Read Dagara, Northern 2 Korɛ̃tɩ 1 Bible Online

2 Korɛ̃tɩ 1 - Dagara, Northern bible

2 Korɛ̃tɩ 1

¹A mãa Pol, a Naaŋmɩn na nɔ̃w yã ƴãw ɩ̃ ɩ a Kɩrɩta Yeezu nɩ-tona a, mãa nɩ a tɩ yɛb Timote, tɩmɛ nɛbɛ kʋ̀rɛ a sɛbɛ ŋa a Naaŋmɩn Lãw-yir na be a Korɛ̃tɩ tẽw a, lãwnɩ a kɩrɩta-nɩbɛ za na be a Akayi a.

²A Naaŋmɩn tɩ Sãà nɩ a Sore Yeezu Kɩrɩta maalʋ nɩ ƴã-ɓaarʋ, a be a nyɩ zie.

³A Naaŋmɩn, tɩ Sore Yeezu Kɩrɩta Sãà, su-ɓaarʋ Sãà nɩ mɔwlʋ za Naaŋmɩn tɛr'ɩ puoru!

⁴Ʋ mɩ́ mɔwlɛ tɩ nɩ a tɩ kpɩɛrʋ za pʋɔ, kɛ́ tɩ mɩ̀ tʋ̃ɔ́ mɔwlɛ a bɛlɩ dem za na be kpɩɛrʋ pʋɔ a, a mɔwlʋ a tɩɩm mɩŋa na páwr a Naaŋmɩn zie a ƴãw.

⁵Mɛ̃ a lɛ tɩ na pʋɔ a Kɩrɩta tuo pʋɔ yaga za a, lɛ mɩ̀ n'a tɩ mɩ́ páw mɔwlʋ yaga za a Kɩrɩta ƴãw.

⁶Tɩ be n kpɩɛrʋ pʋɔ bɩɩ? A nyɩ mɔwlʋ nɩ a nyɩ faafʋ ƴãw n'a. Tɩ nyɛ̃ nɩ mɔwlʋ bɩɩ? A nyɩ mɔwlʋ n'a, kɛ́ nyɩ tʋ̃ɔ́ sàw de a tuo al tɛɛ za tɩ mɩ̀ na wone a.

⁷Ɛ́ a tɩɛrʋ tɩ na tɛr a nyɩ ƴãw a bɩ na, tɩ bãwnɩ a na: nyɩ na lãw nɩ tɩ a tuo pʋɔ a, nyɩ mɩ̀ lãw nɩ tɩ nɩ a mɔwlʋ pʋɔ.

⁸Bʋ̃ʋ n'ʋ vɛ̃, yɛbr i, tɩ bɛ bɔbr kɛ́ nyɩ ɩ zɔn a kpɩɛrʋ na ta tɩ a Azi a ƴãw ɛ: a kpɛ tɩ na tɩ gãw a tɩ fãw, ɛ̀ tɩ bɛ tɩ tɩɛrɛ kɛ́ tɩ na cãà na vʋʋrɛ ɩ.

⁹Tɩɩm tɛɛ za ƴãw a, tɩ tɩ yel'a kɛ́ tɩ kpi na baarɩ, lɛ so tɩ bɛ tɩ cãà ƴãw a tɩ tɩɛrʋ a tɩɩm mɩŋa ƴãw ɛ, tɩ tɩ de nɩ a tɩ tɩɛrʋ ƴãw a Naaŋmɩn ƴãw, ʋl na mɩ́ ɩ a kũuni bɛ lɛb yi a.

¹⁰Ʋlɛ n'ʋ faa tɩ a kũu ŋa tɔ ƴãw, ɛ́ na cãà faa tɩ. Ʋl ƴãw n'a tɩ ƴãw a tɩ tɩɛrʋ, ʋ na cãà na faa tɩ.

¹¹Ɛ́ a nyɩɩm tɛɛ za mɩ̀ sõwne tɩ na nɩ a nyɩ puoru, k'aa maalʋ tɩ na na páw a nɩ-yaga puoru zũú a, ɩ nɩ-yaga puore a Naaŋmɩn yãanɩ a tɩ ƴãw.

¹²A dãsɩɛ ŋa a tɩ tɩɛrʋ na dɩ a tɩ ƴãw a n'ɩ a tɩ dɛpaal-bom: a tɩ ɩb a tẽw zu a, baa zuo a za a nyɩ zie a, bɛ tɩ tɛr a mɩnɛ kãw ɛ, ɛ́ ɩ vɩɛlʋ tɛwr, ɛ́ a za yi a Naaŋmɩn zie. Nɩsaal yã-bãwfʋ bɛ n'a tɩ tɩ ɩrɛ nɩ ɛ, Naaŋmɩn maalʋ n'a.

¹³Tɩ bɛ sɛbr nyɩ bʋ̃-yoru kãw za, a bɛ ɩ a al tɔr za nyɩ na kanɛ ɛ́ wone a ɩ. Ɩ̃ɩ tɩɛrɛ na kɛ́ nyɩ na tʋ̃ɔ́ na bãw a yel ŋa pɛr za,

¹⁴ʋl nyɩ na bãw cɛ ŋmãa a ƴɛrɛŋa a: a tɩ Sore Yeezu waa bibir a, tɩ na ɩ n a nyɩ dɛpaal-bom, mɛ̃ a lɛ nyɩ na ɩ a tɩ dɛpaal-bom a.

¹⁵A tɩɛrʋ ŋa na bɛ bʋ́nɛ a zũú n'a, ɩ̃ tɩ de niwn yel k'ɩ̃ɩ na wa n a nyɩ zie wa ɩ nyɩ páw maalʋ gb'a ayi dɔwlɩ,

¹⁶ɩ̃ɩ yi a nyɩ zie cen Masedʋan, ɛ́ pãa tɩ yi a Masedʋan lɛb wa a nyɩ zie, nyɩ wa sõw mɛ̃ ɩ̃ cen a Zude.

¹⁷À à ŋá ɩ̃ na tɩ tɩɛr k'ɩ̃ɩ ɩ a, ɩ̃ bɛ tɩ tɩɛrɩ tɔ bɩɩ? Bɩɩ a lɛ ɩ̃ na tɩɛrɩ k'ɩ̃ɩ maalɩ a ɩ n nɩsaalbɛ pʋ-tɩɛrʋ tɛwr? A ɩ lɛ ɩ̃ mɩ́ lãw yel a «ʋ̃ʋ» nɩ a «ʋ̃ʋ'hʋ̃» ʋ?

¹⁸A Naaŋmɩn dɩ n a ɩ̃ dãsɩɛ k'aa tɩ ƴɛ̀rʋ a nyɩ zie bɛ tɩ ɩ «ʋ̃ʋ» nɩ «ʋ̃ʋ'hʋ̃» ɛ.

¹⁹Bʋ̃ʋ n'ʋ vɛ̃, a Naaŋmɩn Bie Yeezu Kɩrɩta tɩ na hieri yel kʋ̀ nyɩ a, mãa nɩ a Sɩlvɛ̃ nɩ a Timote a, ʋ bɛ tɩ ɩ «ʋ̃ʋ» nɩ «ʋ̃ʋ'hʋ̃» ɛ, ʋ tɩ ɩ n «ʋ̃ʋ» tɛwr kʋralɛ.

²⁰A maalʋ al za a Naaŋmɩn na yel k'ʋʋ na tɩr a a, a ʋ pʋɔ n'a a za «ʋ̃ʋ» be. A na ɩ lɛ a, a Yeezu Kɩrɩta n'ʋ so tɩ mɩ́ sɔw «Amɛn», a Naaŋmɩn yúor-vɩɛlʋ-danʋ ƴãw.

²¹A sob nɛ na mɩ́ ɩ tɩ kpɛmɛ lãwnɩ nyɩ ɛ́ lãwnɩ a Kɩrɩta, ʋʋ zɛ tɩ a kãá-sõw a, a Naaŋmɩn n'ʋ,

²²ʋl na ŋmãa a ʋ bãwfʋ ƴãw tɩ, ɛ́ ƴãw a Vʋʋrʋ Sõw a tɩ socie pʋɔ, ʋ ɩ a maalʋ tɩ nãà páw a bãwfʋ a.

²³Mãa a, Naaŋmɩn n'ɩ a ɩ̃ dãsɩɛ sob, ʋ ɩ ɩ̃ kpi mãa wa ŋmarɛ ziri a: a nyɩ vla ƴãw n'a ɩ̃ bɛ lɛb wa a Korɛ̃tɩ ɛ.

²⁴Tɩ bɛ bɔbr kɛ́ tɩ fɛrɛ nyɩ a nyɩ naaŋmɩn-sàw-deb pʋɔ ɩ, bʋ̃ʋ n'ʋ vɛ̃, nyɩ kpɛmɛ nɩ a sàw-deb pʋɔ. Ɛcɛ tɩ bɔbr'a kɛ́ tɩ lãw nɩ nyɩ tone kɛ̀ nyɩ wone nʋ̃ɔ̀.