Read Dagara, Northern 2 Korɛ̃tɩ 12 Bible Online

2 Korɛ̃tɩ 12 - Dagara, Northern bible

2 Korɛ̃tɩ 12

¹A na ɩ à ŋá a, alɛ saa bɛ tɛr pɛr a, ɩ̃ mɩ̀ na zɛw nɩ ɩ̃ tʋɔra. Ƴɛrɛŋa a, a bʋ̃-nyɛrɩ a Sore na ƴãw ɩ̃ nyɛ̃ a, nɩ a yel-wuli ʋ na wul mɛ̃ a, al ƴɛ̀rʋ n'a ɩ̃ na ƴɛ̀r.

²Ɩ̃ bãw nɩ kɩrɩta-nɩr kãw, yome pie nɩ anaar'ɩ dɩ̃a, bɛ na ír ʋ do n tɩ gãw nɩ a salom a. Ɩ̃ bɛ bãw a ʋ ƴã-gan n'ʋ bɛ ír'ɩ ʋ do n bɩɩ a ʋ ƴã-gan bɛ n'ʋ a, Naaŋmɩn yõ n'ʋ bãw.

³Ɩ̃ bãwnɩ a na, a nɩr ŋa a, bɛ ír ʋ na do n nɩ a ʋ ƴã-gan, bɩɩ bɛ bɛ ír ʋ do n nɩ a ʋ ƴã-gan a, Naaŋmɩn yõ n'ʋ bãw,

⁴bɛ ír ʋ na do n tɩ ta n a tẽ-vla, be n'a ʋ wõ ƴɛ̀r-bie ʋ na kʋ̃ tʋ̃ɔ́ manɩ a, ɛ́ nɩsaal bɛ tɛr sɔ́r k'ʋʋ lɛb yel a.

⁵A nɩr ŋa ƴãw a, ɩ̃ na zɛwr'ɩ ɩ̃ tʋɔra. Ɛcɛ, mãa a, a ɩ̃ bãbàalʋ ƴãw n'a ɩ̃ na zɛwr ɩ̃ tʋɔra.

⁶Bʋ̃ʋ pãa ɩ! Mãa tɩ bɔbr k'ɩ̃ɩ zɛwr ɩ̃ tʋɔra a, a kʋ̃ʋ ɩ yãyaar'a ɩ, a nãá ɩ n yel-mɩŋa tɛwr ɩ̃ yere, ɛcɛ ɩ̃ bɛ ɩrɛ a lɛ ɩ, ɩ̃ na bɛ bɔbr kɛ́ bɛ tɛr tɩɛrʋ a ɩ̃ ƴãw, ʋ zuo a lɛ bɛ na nyɛ̃ m ɩ̃ ɩrɛ a, bɩɩ ʋ zuo a lɛ bɛ na wone ɩ̃ yere a ɩ.

⁷Ɛ́ a yele á ŋá bɛ na wul mɛ̃ ɩ̃ nyɛ̃ a, a na tɩ ɩ nɔ-ɓãa-yele a zũú n'a bɛ ƴãw 'wɔbrʋ kãw a ɩ̃ ƴã-ganɩ́: Sɩtaana malkɩ bɛ na ƴãw k'ʋʋ ŋmɩɛr mɛ̃ k'ɩ̃ɩ taa wa nanɩ zɛwr ɩ̃ tʋɔra a.

⁸Gb'a ata za n'a ɩ̃ zɛlɩ a Sore k'ʋʋ ír a 'wɔbrʋ ŋa bɛr mɛ̃.

⁹Ɛcɛ ʋ tɩ yel mɛ̃ na: «A ɩ̃ maalʋ sɛw fʋ na, a bãbàalʋ pʋɔ n'a a ɩ̃ fãw mɩ́ sãá ʋ za bɛ nyɛ̃.» Lɛ so ɩ̃ na nɩ̃ɛ zɛwr ɩ̃ tʋɔra a ɩ̃ bãbàalʋ ƴãw, k'aa Kɩrɩta fãw tʋ̃ɔ́ be a ɩ̃ zie.

¹⁰Lɛ zũú n'a nʋ̃ɔ̀ cãà kpɩɛr mɛ̃ a bãbàalʋ, a zʋmɛ nɩ a yel-fɛrɩ pʋɔ, a dɔwrʋ nɩ a pʋl-vʋ̃ɔ pʋɔ, ɩ̃ na sàw de a Kɩrɩta a ƴãw. Bʋ̃ʋ n'ʋ vɛ̃, a lɛn daar ɩ̃ na mɩ́ ɩ bãbàal a, lɛn daar a, ɩ̃ mɩ́ kpɛmɛ.

¹¹Mãa n'ɩ ŋan ƴɛ̀rɛ yãya-ƴɛ̀rʋ, ɛcɛ nyɩmɛ nɛbɛ fɛr mɛ̃ ƴãw. Nyɩmɛ nɛbɛ a tɩ sɛw kɛ́ nyɩ manɛ a ɩ̃ ɩ-vɩɛlɩ. Bʋ̃ʋ n'ʋ vɛ̃, ɩ̃ na saa bɛ ɩ nɩr a, a nɩ-ton-gãdaar bɛ ŋa kãw za bɛ zuo mɛ̃ bom kãw za ƴãw ɛ.

¹²A yele al na wul k'ɩ̃ɩ ɩ n nɩ-tona a, a maal'ɩ a nyɩ sɔgɔ nɩ tʋɔra nyɔwfʋ na vɩɛl bɛ cɛ a: yele na ɩ bãwfʋ sãá a, yel-bãw-guuri nɩ nɔ-ɓãa-yele.

¹³Bʋ̃ʋ n'ʋ a Lãw-yie al na cɛ a tɛr zuo nyɩ? Alɛ bɛ ɩ ɩ̃ na bɛ ƴãw nyɩ hanɩ a ɩ̃ ƴãw a? Nyɩ dɩ suur kʋ̀ m a yel ŋa na bɛ tu sɔ́r a ƴãw.

¹⁴Mãa n'ɩ ŋan cɔbrɩ a nyɩ zie waa baarɩ, ɩ̃ na na wa a gb'a ata sob a, ɛcɛ ɩ̃ cãà kʋ̃ ƴãw nyɩ hanɩ a ɩ̃ ƴãw ɛ. Bʋ̃ʋ n'ʋ vɛ̃, a nyɩ bʋ̃-tɛrɩ bɛ n'a ɩ̃ bɔbr ɛ, a nyɩɩm tɛɛ za n'a ɩ̃ bɔbr. Bibiir bɛ nɛbɛ a fɛrɛ kɛ́ bɛ bɔbr bine a dɔwrbɛ ƴãw ɛ, dɔwrbɛ nɛbɛ a fɛr kɛ́ bɛ ɩrɛ a lɛ a bibiir ƴãw.

¹⁵Ɛ́ mãa a, mãa saa na sãw a ɩ̃ bʋ̃-tɛrɩ za bɛr a nyɩ ƴãw, ɛ́ de ɩ̃ tʋɔra za tɩr a nyɩ ƴãw a, nʋ̃ɔ̀ na kpɩɛr mɛ̃ na. Mãa wa nɔnɛ nyɩ sɛw à ŋá a, nyɩ na sàw na bɛ nɔ̃w mɛ̃ man a lɛ bɩɩ?

¹⁶A na ɩ lɛ a, nyɩ sàw na kɛ́ nyɩ bɛ hanɩ a ɩ̃ ƴãw ɛ. Ɛcɛ bɛ na yel'a k'ɩ̃ɩ na ɩ nɩ-bɛlɛ a, kɛ́ yã n'a ɩ̃ maalɩ nyɔw nɩ nyɩ.

¹⁷A nɩbɛ bɛl ɩ̃ na tõ a nyɩ zie a, ɩ̃ ƴãw nɩ bɛ kãw nɛb nyɩ a ɩ̃ ƴãw bɩɩ?

¹⁸Ɩ̃ zɛlɩ nɩ yãayãa k'aa Títɩ̀ wa a nyɩ zie, ɩ̃ɩ tõ ʋ na ʋlɛ nɩ a yɛb ʋl ƴɛ̀rʋ ɩ̃ na ƴɛ̀r a. A Títɩ̀ nɛb nyɩ na bɩɩ? Yã-been bɛ n'ʋ mãa nɩ a ʋl tɩ tɛr vʋʋr'ɩ a nyɩ zie ɩ? Sɔr-been bɛ n'ʋ tɩ tu ɛ?

¹⁹A mɩnɛ kãw, nyɩ tɩɛrɛ nɩ koro za, kɛ́ tɩ bɔbr'a kɛ́ tɩ manɩ a tɩ yel-mɩŋa a nyɩ niŋé. Lɛ bɛ n'a ɩ, Naaŋmɩn niŋé n'a tɩ lãw nɩ a Kɩrɩta ƴɛ̀rɛ. Ɛ́ à á ŋá za a, ɩ̃ nɩ-nɔnɩ i, a nyɩ maalʋ ƴãw n'a.

²⁰Ɩ̃ zɔrɛ nɩ dɛ̃bɩ̃ɛ ɩ̃ nãà wa ta a nyɩ zie nyɛ̃ nyɩ, nyɩ bɛ ŋmɛ̃ a lɛ ɩ̃ na bɔbr a ɩ, ɛ́ nyɩ mɩ̀ nyɛ̃ m ɩ̃ bɛ ŋmɛ̃ a lɛ nyɩ na bɔbr a ɩ. Ɩ̃ zɔrɛ nɩ dɛ̃bɩ̃ɛ ɩ̃ nãà wa ta a nyɩ zie nyɛ̃ taw-taa nɩ nyuur, suur nɩ cier-taa, tʋ-taa nɩ zu-yel-taa, nyʋʋr nɩ damnʋ a.

²¹Ɩ̃ zɔrɛ nɩ dɛ̃bɩ̃ɛ ɩ̃ nãà lɛb wa a be, a ɩ̃ Naaŋmɩn wa ɩ ɩ̃ nyɛ̃ vĩ a nyɩ niŋé, ɛ́ a fɛr k'ɩ̃ɩ kõ a nyɩ yaga ƴãw a, a bɛl na dãw maalɩ a yel-bier ɛ́ bɛ lɩɛbɩ a bɛ ɩb so a bɛ dɛwr bɛr, ɛ́ bɛ zawrɩ a pɩ̃ɔ-yele nɩ a faalʋ bɛr a.