Read Dagara, Northern 2 Korɛ̃tɩ 2 Bible Online

2 Korɛ̃tɩ 2 - Dagara, Northern bible

2 Korɛ̃tɩ 2

¹A na ɩ à ŋá a, ɩ̃ yel'a k'ɩ̃ɩ bɛ lɛbr waar a nyɩ zie ɩ, ɩ̃ na bɛ bɔbr kɛ́ nyɩ lɛb tɛr pʋ-sãwna a ƴãw.

²Bʋ̃ʋ n'ʋ vɛ̃, mãa wa ɩ nyɩ tɛr pʋ-sãwna a, ãa n'ʋ na lɛb ɩ nʋ̃ɔ̀ kpɛ m, a bɛ ɩ a sob nɛ ɩ̃ na ɩ ʋ tɛr pʋ-sãwna a?

³Alɛ so ɩ̃ sɛb nyɩ à à ŋá, k'aa bɛlɩ dem nãá tɩ ƴãw mɛ̃ nʋ̃ɔ̀ a, bɛ ta ɩ pʋ-sãwna tɛr mɛ̃ a lɛn daar ɩ̃ nãà ta a nyɩ zie a ɩ. A nyɩɩm ƴãw a, ɩ̃ bɛ bʋ́nɛ ɩ, a ɩ̃ nʋ̃ɔ̀ mɩ̀ na ɩ n a nyɩ za dem.

⁴Sɩza n'a, kpɩɛrʋ nɩ pʋ-sãwna yaga tɛr mɛ̃ na, ɩ̃ sɛbr nyɩ kone nɩ marmar ƴãw pʋɔ, ɛcɛ a bɛ ɩ k'ɩ̃ɩ ɩ nyɩ tɛr pʋ-sãwna ɩ, ɛ́ ɩ k'ɩ̃ɩ ɩ nyɩ bãw ɩ̃ na nɔnɛ nyɩ bɛ tɛr manʋ a.

⁵Nɩr wa n'ʋ so pʋ-sãwna be be a, mãa bɛ n'ʋ ʋ ƴãw a pʋ-sãwna ɩ, a nyɩ za nɛbɛ, bɩɩ, tɩ ta dɔwlɩ kʋ̃ɔ ɩ, a nyɩ mɩnɛ nɛbɛ.

⁶A nyɩ yaga zie wa yel k'aa nɩr ŋa tɔ sãw na a, a man ʋ na.

⁷Ɛcɛ nyɩ nɩ̃ɛ dɩ suur kʋ̀ ʋ ɛ́ mɔwl'ʋ, k'ʋ taa wa mab tɛr pʋ-sãwna zuo ɩ.

⁸Alɛ so ɩ̃ zɛlɛ nyɩ kɛ́ nyɩ wul nɔ̃wfʋ ɩb a ʋ zie.

⁹Bom ŋa ƴãw n'a ɩ̃ tɩ sɛb nyɩ: ɩ̃ tɩ bɔbr'a k'ɩ̃ɩ ɩ nyɩ kaa nyɛ̃, nyɩ cãà na sàwr a ɩ̃ nʋɔr kʋralɛ bɩɩ.

¹⁰Sob nɛ sãwna nyɩ na mɩ́ de bɛr a baarɩ a, ɩ̃ mɩ̀ mɩ́ de na bɛr a baarɩ, sãwna wa sɩrɩ be be a fɛr k'ɩ̃ɩ de bɛr a baar'a. Ɛ́ mãa a, mãa wa de nɩr sãwna bɛr a baarɩ a, a nyɩ ƴãw n'a ɩ̃ ɩ a lɛ a Kɩrɩta niŋé,

¹¹k'aa Sɩtaana ta bɛ̀lɩ tɩ nyɔw ɛ, bʋ̃ʋ n'ʋ vɛ̃, tɩ bɛ ɩ zɔn a ʋ pʋ-tɩɛrʋ ƴãw ɛ.

¹²Ɩ̃ na tɩ ta a Tʋrʋwasɩ a Yeezu Kɩrɩta Yel-nʋ̃ɔ̀ hieru ƴãw a, a Sore na saa tɩ sàw ɩ̃ na tʋ̃ɔ́ tone vla vla za a,

¹³a ɩ̃ tɩɛrʋ bɛ tɩ gã zi-been ɛ, ɩ̃ na bɛ tɩ nyɛ̃ a ɩ̃ yɛb Títɩ̀ a zũú. Lɛ so ɩ̃ tɩ bɛr a Tʋrʋwasɩ tẽw dem ɛ́ cen a Masedʋan.

¹⁴Naaŋmɩn so yãanɩ! A Kɩrɩta ƴãw a, ʋ mɩ́ ƴãw na tɩ pʋɔ a ʋ zɛb-tʋ̃ɔ́fʋ nɩbɛ pʋɔ kʋralɛ, ɛ́ a tɩɩm zũú, ʋ ɩ bɛ bãw a Kɩrɩta ziir za mɛ̃ parfɛ̃ a nyũu na yi pàw a ziir za a.

¹⁵Sɩza n'a, a Naaŋmɩn zie a, tɩ ɩ na mɛ̃ parfɛ̃ na nyuur vla a Kɩrɩta de kʋ̀rɛ a Naaŋmɩn a. Tɩ ɩ n a lɛ a bɛlɩ dem na be a faafʋ sɔ́r zu a ƴãw, nɩ a bɛlɩ dem na bɔrɛ a ƴãw.

¹⁶Bɛ ŋa zie a, kũu nyũu na waar'ɩ kũu a n'a, ɛ́ bɛ ŋa zie a ɩ nyɔ-vʋʋrʋ nyũu na waar'ɩ nyɔ-vʋʋrʋ a. Ɛ́ ãa n'ʋ sɛw taa nɩ a ton ŋa tɔ?

¹⁷Tɩɩm bɛ ŋmɛ̃ mɛ̃ a nɩbɛ yaga zie na de a Naaŋmɩn ƴɛ̀rʋ ʋ ɩ yɛ̀rʋ́ bom a ɩ. Tɩɩm a, a Naaŋmɩn n'ʋ tõ tɩ, tɩ ƴɛ̀rɛ a ʋ ƴɛ̀rʋ nɩ yel-mɩŋa a ʋ niŋé, lãwnɩ a Kɩrɩta.