Read Dagara, Northern 2 Korɛ̃tɩ 8 Bible Online

2 Korɛ̃tɩ 8 - Dagara, Northern bible

2 Korɛ̃tɩ 8

¹Yɛbr i, tɩ bɔbr'a kɛ́ tɩ ɩ nyɩ bãw a maalʋ a Naaŋmɩn na kʋ̀ a Masedʋan Lãw-yie a.

²Kpɩɛrʋ ta n a be kɩrɩta-nɩbɛ yaga za, ɛcɛ bɛ tɩ cãà cɩlɛ yaga za ɛ́ tɩr a bɛ bʋ̃-tɛrɩ yaga yaga zawlalɛ, bɛ na saa bɛ tɩ tɛr a a.

³Ɩ̃ dɩ n a bɛ dãsɩɛ, bɛ tɩr'a mɛ̃ a lɛ bɛ na tʋ̃ɔ́ a, ɛ́ tɩr gãw lɛ mɔ̃ mɩ̀, ɛ́ nyɛ̃ bɛ tʋɔra tɩr.

⁴Bɛ lɔb'ɩ nuru zɛlɩ nɩ tɩ yãayãa, kɛ́ tɩ sàw bɛ pʋɔ sõw kɛ̀ bɛ tɩr bom kʋ̀ a Zude tẽw kɩrɩta-nɩbɛ.

⁵Bɛ ɩ na gãw a lɛ tɩ na tɩ tɩɛrɛ a: bɛ de nɩ niwn de bɛ tʋɔra kʋ̀ a Naaŋmɩn, al pùorí, Naaŋmɩn sàw bɛ mɩ́ de bɛ tʋɔra za kʋ̀ tɩ.

⁶Alɛ n'a so tɩ zɛlɩ a Títɩ̀ k'ʋʋ sõw a nɔ̃wfʋ ton ŋa tʋ̃ɔ́ tõ vla a nyɩ zie, mɛ̃ a lɛ ʋ na tɩ tĩ ʋ a.

⁷Ɛ́ bom za na ʋr a nyɩ zie a: a naaŋmɩn-sàw-deb, a ƴɛ̀rʋ bãwfʋ, a yele bãwfʋ, yele ƴãw nyɩ na tʋlɛ bɛ tɛr bɛ́rʋ, lãwnɩ a nɔ̃wfʋ tɩ na wul nyɩ a, à á ŋá za na ʋr a nyɩ zie a, nyɩ mɩ̀ sàw tɩr yaga za a yel ŋa ƴãw.

⁸Ɩ̃ bɛ ƴãwnɛ nʋɔr kʋ̀rɛ nyɩ a ka ɩ, ɛcɛ ɩ̃ manɛ nɩ lɛ ŋmaarɛ bɛ mɩnɛ na tʋlɛ a, k'ɩ̃ɩ zaw a nyɩ tɩɛrʋ nyɩ mɩ̀ tʋ̃ɔ́ wul k'aa nyɩ nɔ̃wfʋ ɩ n sɩza.

⁹Nyɩ bãw nɩ a lɛ a tɩ Sore Yeezu Kɩrɩta na maalɩ tɩ a, ʋl na tɩ kpɛ bom za naalʋ a, ʋ lɩɛb'ɩ nã́w sob a nyɩɩm ƴãw, k'ʋʋ ɩ nyɩ kpɛ naalʋ nɩ a ʋ nã́w.

¹⁰Mãa na nyɛ̃ lɛ a n'a ɩ̃ yere kʋ̀rɛ nyɩ a yel ŋa ƴãw: à ŋá n'a sɛwnɩ nyɩ, nyɩmɛ na nɛbɛ dɩyã de niwn tone a ton ŋa, ɛ́ mɩ̀ tɩ de niwn yel kɛ́ nyɩ na tõ ʋ na a.

¹¹A na ɩ à ŋá a, ƴɛrɛŋa a, nyɩ tõ ʋ tɩ ɓɩɩlɩ, lɛ n'a a nyɩ tɩɛr-vɩɛlɩ na man taa nɩ a ɩ-ɩrɩ nyɩ na ɩ mɛ̃ a lɛ nyɩ na tʋ̃ɔ́ a.

¹²Bʋ̃ʋ n'ʋ vɛ̃, a fʋ tɩɛrʋ wa sɩrɩ vɩɛl a, Naaŋmɩn mɩ́ sàw na de a bʋ̃-kʋ̀ra ɛ́ bɛ sowre bom fʋ na bɛ tɛr a ɩ, a lɛ fʋ na tɛr a n'a ʋ mɩ́ jɩ́rɛ.

¹³Bɛ bɛ yel kɛ́ nyɩ wɩ̀ɛ a nyɩ taabɛ ɛ́ ƴãw nyɩ tʋɔra fɛrʋ pʋɔ ɩ, ɛcɛ ɩ k'a sɛw taa yele n'a.

¹⁴A ƴɛrɛŋa a, a nyɩ tɛra dɔwlɛ na sõw nɩ a bɛ bom-bɛ-tɛrʋ. Lɛ n'a bibir kãw, a bɛ tɛra dɔwlɛ mɩ̀ na sõw a nyɩ bom-bɛ-tɛrʋ, lɛ n'a a tɛra na sɛw taa,

¹⁵a tu à à ŋá a Sɛb-sõw na tɩ yel a: «Ʋlɩ sob na tɩ wob yaga a, bɛ tɩ tɛr a dɔwlɩ ɛ, ɛ́ sob nɛ na wob pʋrɩ a, bɛ tɩ bɔ bom gù ɛ[9].»

¹⁶Naaŋmɩn tɛr'ɩ puoru, ʋl na ƴãw a Títɩ̀ ʋ mɩ̀ tʋlɛ a nyɩ ƴãw a.

¹⁷Ʋ sàw nɩ a tɩ zɛlʋ, ɛ́ tʋlɛ a tome ƴãw tɩ zuo, lɛ so ʋ nyɛ̃ ʋ tʋɔra wa a nyɩ zie.

¹⁸Tɩ tõ ʋ na, ʋlɛ nɩ a yɛb ʋl a Lãw-yie za na mʋʋrɛ a Yel-nʋ̃ɔ̀ tome ʋ na tone a zũú.

¹⁹Ɛ́ lɛb waar, a Lãw-yie kaa na ír ʋ, k'ʋʋ lãw nɩ tɩ yi lo a sɔ́r a nɔ̃wfʋ ton ŋa pʋɔ, a ton ŋa tɩ na tone a Sore tɔr za yúor-vɩɛlʋ-danʋ ƴãw a, nɩ kɛ́ tɩ wul a tɩ pʋ-tɩɛr-vɩɛlɩ a.

²⁰Tɩ bɛ bɔbr kɛ́ nɩr kãw za wa yere tɩ, kɛ́ tɩ bɛ maal tɛr a libi-yaga á ŋá bɛ na kʋ̀ tɩ a ɩ.

²¹Tɩ bɛ bɔbr a vla maalʋ Sore yõ zie ɩ, tɩ mɩ̀ bɔbr'ɩ a lɛ a nɩsaalbɛ zie.

²²Tɩ tone nɩ a tɩ yɛb lãwnɩ bɛ. Gb'a a ŋmɩn za, tɩ ɩ ʋ na kaa, ʋʋ wul ʋ na tʋlɛ a tome ƴãw a. Ƴɛrɛŋa a, ʋ tʋlɛ nɩ a tome ƴãw zuo lɛ, ʋ na de a nyɩ yele yaga za a ƴãw.

²³A Títɩ̀ ʋl a, ʋ ɩ n a ɩ̃ tu-ta-tɔ nɩ a ɩ̃ lãw-tõ-tɔ na be a nyɩ zie a. ɛ́ a yɛbr bɛl na bɩɛlɩ ʋ a, a Lãw-yie n'a tõ bɛ, ɛ́ bɛ tone k'aa Kɩrɩta páw yúor-vɩɛlʋ-danʋ.

²⁴A na ɩ à ŋá a, nyɩ wul bɛ kɛ́ nyɩ nɔnɛ bɛ nɩ yel-mɩŋa, nɩ kɛ́ nyɩmɛ nɛbɛ ɩ a tɩ nyʋʋr bom a bɛ zie a Lãw-yie niŋé.