Read Dagara, Northern Efɛɛzɩ 1 Bible Online

Efɛɛzɩ 1 - Dagara, Northern bible

Efɛɛzɩ 1

¹A mãa Pol, Naaŋmɩn na nɔ̃w yã ƴãw ɩ̃ ɩ a Yeezu Kɩrɩta nɩ-tona a, mãa n'ʋ sɛbr a kɩrɩta-nɩbɛ na be a Efɛɛzɩ tẽw ɛ́ sàw de a Yeezu Kɩrɩta bɛ lɛbr pùor a.

²A Naaŋmɩn tɩ Sãà nɩ a Sore Yeezu Kɩrɩta kʋ̀ nyɩ maalʋ nɩ ƴã-ɓaarʋ.

³A Naaŋmɩn, tɩ Sore Yeezu Kɩrɩta Sãà, tɛr'ɩ puoru. Tɩ na lãw nɩ a Kɩrɩta a, ʋ maalɩ tɩ nɩ a tẽ-vla pʋɔ nɩ maal-pɛ-bʋʋrɛ za a Vʋʋrʋ Sõw na tɩrɛ a.

⁴Ʋ bɛ tɩ ír a tẽ-daa sɛr ɛ, ɛ́ de niwn kaa ír tɩ a Kɩrɩta ƴãw, kɛ́ tɩ wa lɩɛbɩ nɩ-son na bɛ tɛr sãwna bɛ yere a, a ʋ nɔ̃wfʋ pʋɔ, a ʋ niŋé.

⁵Ʋ tɩ de nɩ niwn bãwnɩ tɩ, k'ʋʋ wa de tɩ tɩ ɩ a ʋ bibiir a Yeezu Kɩrɩta ƴãw. À ŋá n'a ʋ tɩ nɔnɛ ɛ́ bɔbr.

⁶A na ɩ à ŋá a, nyɩ ɩ tɩ danɛ a Naaŋmɩn na ƴãw a ʋ Bi-nɔna kʋ̀ tɩ a maalʋ sɛw à ŋá zawlalɛ a.

⁷A Kɩrɩta zɩ̃ɩ n'a cir yaarɩ faa tɩ, ɛ̀ tɩ páw a tɩ sãwna suur. À ŋá n'a a Naaŋmɩn wul k'aa ʋ maalʋ bɛ tɛr manʋ ɛ.

⁸A Naaŋmɩn maalʋ ŋa pʋɔ n'a ʋ paalɩ tɩ nɩ a yã-bãwfʋ za, nɩ a yã za:

⁹ʋ ɩ na tɩ bãw a ʋ yel-sɔwla za ʋ na tɩ dãw nɔnɛ cɔbrɩ, k'aa Kɩrɩta wa tu

¹⁰a tɩ faafʋ tome daar nãà wa ta a. Ʋ tɩ tɩɛrɛ na k'ʋʋ ɓã bom za na be a salom zu nɩ a tẽw zu a taa, ʋ ɓã a za taa na-kpɛ̃ɛ been pile na ɩ a Kɩrɩta a.

¹¹Tɩ na lãw nɩ a Kɩrɩta a, tɩ páw nɩ a bom ʋl a Naaŋmɩn na ƴãw nʋɔr k'ʋʋ na kʋ̀ tɩ na a: bʋ̃ʋ n'ʋ vɛ̃, ʋ tɩ de nɩ niwn kaa ír tɩ a tu a lɛ ʋ na cɔbrɩ a yele bin a. Ɛ́ a Naaŋmɩn mɩ́ maal'ɩ a yele za mɛ̃ a lɛ ʋ na yel ɛ́ bɔbr a.

¹²A na ɩ à ŋá a, nyɩ ɩ tɩ danɛ a Naaŋmɩn yúor-vɩɛlʋ-danʋ, tɩɩm na ɩ a de niwn dem na ƴãw a tɩ tɩɛrʋ a Kɩrɩta ƴãw a.

¹³A Kɩrɩta nyɩ na lãw nɩ a ƴãw n'a nyɩ wõ a yel-mɩŋa ƴɛ̀rʋ, a Yel-nʋ̃ɔ̀ na faarɛ nyɩ a. A ʋl nyɩ na lãw nɩ a ƴãw mɩ̀ cãà n'a nyɩ sàw de, ɛ́ bɛ ŋmãa a Vʋʋrʋ a Naaŋmɩn na tɩr a bãwfʋ ƴãw nyɩ, a Vʋʋrʋ Sõw na ɩ

¹⁴a tɩ gbã-dɩ-bom bʋ̃-dãw tɩ páw sɛr, gùre nɩ a faafʋ za tɩ nãà wa páw a Naaŋmɩn yúor-vɩɛlʋ-danʋ ƴãw a.

¹⁵Alɛ n'a so, a mãa mɩ̀ na wõ kɛ́ nyɩ sàw na de a Sore Yeezu ɛ́ nɔnɛ a kɩrɩta-biir za a,

¹⁶ɩ̃ puore a Naaŋmɩn yãanɩ kʋralɛ, ɩ̃ na mɩ́ wa tɛr a nyɩ tɩɛrʋ a ɩ̃ puoru pʋɔ a.

¹⁷A tɩ Sore Yeezu Kɩrɩta Naaŋmɩn, ʋl na ɩ Sãà so yúor-vɩɛlʋ-danʋ za a, ʋ kʋ̀ nyɩ yã-bãwfʋ nɩ yel-sɔwlɩ bãwfʋ yã, kɛ̀ nyɩ tʋ̃ɔ́ bãw ʋ sɩza.

¹⁸Ʋ sàw caalɩ a nyɩ socie nɩ a ʋ cãà, nyɩ tʋ̃ɔ́ bãw a tɩɛrʋ ʋl a ʋ bʋɔlʋ na ɩ kɛ́ nyɩ tɛr a, nɩ a ʋ gbã-dɩ-bom na vɩɛl bɛ tɛr tɔ, ʋ na cɔbrɩ cɛlɛ nɩ a ʋ nɩ-sori a.

¹⁹Ʋ ɩ nyɩ bãw a ʋ kpɛnʋ ʋl na ɩ kpɛ̃ɛ bɛ tɛr manʋ, ʋ na wul ʋ sãá a tɩɩm na sàw de a ƴãw a. A ʋ fãw tome a, a ʋ kpɛnʋ na bɛ dɩ vuo a, ʋ ɩ na a sãá a Kɩrɩta zie,

²⁰a lɛn daar ʋ na ɩ a Kɩrɩta lɛb yi a kũuni pʋɔ, ʋʋ ƴãw ʋ zɩ̃ a ʋ dʋrʋ lowr a tẽ-vla pʋɔ,

²¹do gãw a naalʋ-dɩb za, fãw za, kpɛnʋ za nɩ zie sób za, nɩ bom za na tɛr yúor bɛ pore a dɩ̃a zie ŋa pʋɔ nɩ a nɩdaar zie pʋɔ a.

²²Naaŋmɩn dĩ nɩ bom za bin a Kɩrɩta pile, ɛ́ ƴãw ʋ do tɩ be bom za zu-sɔw, ɩ a Lãw-yir zu.

²³A Lãw-yir'ɩ a Kɩrɩta ƴã-gan ʋ na paalɩ ʋ za a, ɛ́ a Naaŋmɩn mɩ̀ paalɩ a Kɩrɩta ʋ za.