Read Dagara, Northern Efɛɛzɩ 4 Bible Online

Efɛɛzɩ 4 - Dagara, Northern bible

Efɛɛzɩ 4

¹A mãa na be a gaso pʋɔ a Sore yúor ƴãw a, ɩ̃ zɛlɛ nyɩ na, nyɩɩm a Naaŋmɩn na bʋɔlɩ a, kɛ́ nyɩ vʋʋrɛ nyɔ-vʋʋrʋ na sɛw taa nɩ a bʋɔlʋ ŋa nyɩ na wõ a.

²Nyɩ tɛr nyɩ tʋɔra-siwru yaga, nyɩ tɛr su-baalʋ nɩ su-nyɔwra, nyɩ dier taa sãwna bɛrɛ nɩ nɔ̃wfʋ.

³A lãw-taa a Vʋʋrʋ Sõw na tɩrɛ a, nyɩ ƴãw fãw tɛr ʋ vla, a ƴã-ɓaarʋ na lãw nyɩ taa a zũú.

⁴Mɛ̃ a lɛ a nyɩ bʋɔlʋ na bʋɔlɩ nyɩ tɩɛr-been páwfʋ ƴãw a, lɛ n'a ƴã-gã-been yõ be, Vʋʋrʋ been yõ mɩ̀ be.

⁵Sore been yõ n'ʋ be, naaŋmɩn-sàwfʋ been yõ, suob been yõ,

⁶Naaŋmɩn-been yõ na ɩ a bɛ za Sãà a, na so bɛ za a, na tone bɛ za zie, ɛ́ lãw nɩ bɛ za a.

⁷Ɛcɛ a maalʋ al a Kɩrɩta na tɩr a, tɩ za been been páw nɩ maalʋ kãw a pʋɔ.

⁸Lɛ so a Sɛb-sõw ƴɛ̀r-bir ŋa yel: «Ʋ na do a saa-zu a, ʋ nyɔw nɩ nɩbɛ bɛ ɩ gaso nɩbɛ, ʋʋ kʋ̀ bʋ̃-kʋ̀rɩ a nɩsaalbɛ[2].»

⁹A «ʋ do na» ŋa pɛr'ɩ bo? Alɛ bɛ ɩ k'ʋʋ mɩ̀ siw nɩ a tẽw pʋ̃ɔmɩ za?

¹⁰A sob nɛ na siw a, mɩ̀ cãà n'ɩ a sob nɛ na do tɩ gãw bom za a saa-zu, k'ʋʋ tʋ̃ɔ́ paalɩ bom za a.

¹¹Ɛ́ a bʋ̃-kʋ̀rɩ ʋ na tɩr a n'ɩ a nɩ-toni nɩ a naaŋmɩn-ƴɛ̀r-manbɛ, a Yel-nʋ̃ɔ̀ hierbɛ nɩ a nɩbɛ kaarbɛ nɩ a wul-wulbɛ,

¹²k'ʋʋ tʋ̃ɔ́ cɔbrɩ a kɩrɩta-biir vla a bɛ tome ƴãw: a Kɩrɩta ƴã-gan mɛb ƴãw,

¹³gùre nɩ a lɛn daar tɩ za na na lãw taa ɩ been a naaŋmɩn-sàwfʋ pʋɔ ɛ́ bãw a Naaŋmɩn Bie a, a lɛn daar tɩ na na ɩ nɩ-bɛrɛ, ta mɛ̃ a Kɩrɩta na ta a ʋ tab za a.

¹⁴Lɛ n'a tɩ kʋ̃ cãà ɩ bibiir wul-pɛ-bʋʋrɛ za sɛsɛb-pɩl nɩ kʋ̃ɔ-mie na darɛ viire nɩ, ɛ́ a nɩsaalbɛ nɩ a bɛ cɩbɛ bɛ̀lɛ ƴãwn tulu pʋɔ a ɩ.

¹⁵Tɩmɛ nɩ̃ɛ wa yere a yel-mɩŋa nɩ nɔ̃wfʋ a, tɩ na kɛrɛ nɩ a yele za pʋɔ tarɛ a Kɩrɩta na ɩ a zu a.

¹⁶A ʋl zũú n'a a ƴã-gan ɓã taa ɩ been ɛ́ kpɛmɛ, a kɔbɛ tuor-taa ziir na ɩ a ziir za nyɔw taa vla vla a ƴãw. A na ɩ à ŋá a, a ƴã-gã-ɓɛrmɛ za wa tone vla a, a nɩr ƴã-gan za mɩ́ bɩrɛ na ɛ́ tarɛ a nɔ̃wfʋ zũú.

¹⁷A na ɩ à ŋá a, bom ŋa n'ʋ ɩ̃ yere kʋ̀rɛ nyɩ lãwnɩ kpaalʋ a Sore yúor ƴãw: nyɩ ta cãà ɩrɛ mɛ̃ a nɩ-bʋʋr-yoru na tuur a bɛ tɩɛr-zawlɛ a ɩ.

¹⁸Lige liw na pàw a bɛ yã. Bɛ bɛ pʋɔ a nyɔ-vʋʋrʋ a Naaŋmɩn na tɩrɛ a pʋɔ ɩ, bʋ̃ʋ n'ʋ vɛ̃, a bɛ zɔnʋ kpawl'ɩ a bɛ socie.

¹⁹Bɛ bɛ cãà bãw bʋ̃ʋ n'ɩ vĩ ɛ, alɛ so bɛ so pɩ̃ɔ-yele tɛwr maalɛ, mɩ́ nyɔw bɛ tʋɔra gù ɩ-fa-bʋʋrɛ za maalʋ ƴãw.

²⁰A nyɩɩm a, à ŋá bɛ n'a bɛ wul nyɩ a Kɩrɩta nyɩ bãw ɛ.

²¹A ʋ yele n'a nyɩ wõ, ɛ́ ʋlɛ n'ʋ bɛ wul nyɩ a tu a yel-mɩŋa na be a Yeezu pʋɔ a.

²²A koro za ɩ-ɩrɩ n'a a fɛr kɛ́ nyɩ bɛr, ɛ́ ír a nɩsaal kʋra bɛr, a ʋ bɛ̀lʋ tɩɛrʋ ɩ na ʋ wɩɛr a loba.

²³Nyɩ sàw bɛ ɩ nyɩ lɩɛbɩ nɩ-paalɛ a nyɩ yã pʋɔ nɩ a nyɩ tɩɛrʋ pʋɔ.

²⁴Nyɩ de a nɩ-paala ɩ-ɩrɩ, a ʋl a Naaŋmɩn na ír ʋ ŋmɛ̃ taa nɩ ʋ, ɛ́ mɩ́ sãá nyɔ-vʋʋrʋ na tu sɔ́r ɛ́ ɩ sõw a pʋɔ, ɛ́ yi yel-mɩŋa zie a.

²⁵A na ɩ à ŋá a, nyɩ bɛr a ziri: ŋa za mɩ́ yel a yel-mɩŋa kʋ̀ a ʋ tɔ sob, tɩ za na ɩ ƴã-gã-been ɓɛrmɛ a ƴãw.

²⁶Nyɩ ya nyɛ̃ nɩ suur bɩɩ? Nyɩ taa maalɛ yel-bier ɛ. Mʋ̃tɔ̃w ta kpɛ ɛ́ a nyɩ suur cãà bɛ ɓãá ɩ.

²⁷Nyɩ ta bɛr vuo kʋ̀ a Gɛgɛra ʋ so nyɩ ɛ.

²⁸Sob nɛ na tɩ dãw zure a, ʋ bɛr a nyãnyuwlu ɛ́ nɩ̃ɛ ƴãw fãw tone nɩ a ʋ nuru, mɛ̃ a lɛ a na sɛw a, tʋ̃ɔ́ mɩ́ páw bom ɩ kʋ̀ sob nɛ na bɛ tɛr a.

²⁹Ƴɛ̀r-faa za bɛ sɛw k'ʋʋ yi a nyɩ nʋɔrɩ́ ɛ, ɛcɛ nyɩ ƴɛ̀rɛ ƴɛ̀r-bie na tɛr yel-ɩra na na tʋ̃ɔ́ sõw ɛ́ wa n maalʋ a bɛlɩ dem na bɛrɛ wone nyɩ a zie a.

³⁰Nyɩ ta ɩ a Vʋʋrʋ Sõw tɛr pʋ-sãwna ɩ, ʋlɛ n'ɩ a bãwfʋ a Naaŋmɩn na ƴãw nyɩ, gùre nɩ a faafʋ bibir nãà wa vɩɛ a.

³¹Bom nɛ za na ɩ pʋ-sãwna, suur, su-ɩb, zɛbr-gɔmɛ bɩɩ zʋmɛ a, nyɩ ɩ a za bɔr a nyɩ zie, lãwnɩ a po-tuolu bʋʋrɛ za.

³²Nyɩ ɩ nɩ-vɩɛlɩ a nyɩ cara pʋɔ, ɛ́ zɔrɛ taa nɩbaalʋ dɩrɛ nɩ suur kʋ̀rɛ taa, mɛ̃ a lɛ a Naaŋmɩn na dɩ suur kʋ̀ nyɩ a Kɩrɩta ƴãw a.