Read Dagara, Northern Efɛɛzɩ 6 Bible Online

Efɛɛzɩ 6 - Dagara, Northern bible

Efɛɛzɩ 6

¹Bibiir i, nyɩ sàwr a nyɩ dɔwrbɛ nʋɔr a Sore niŋé, à ŋá n'a sɛw.

²«Ƴãwnɛ fʋ sãà nɩ fʋ mã» n'ɩ a Naaŋmɩn nɔ-ƴãwna dãw-niwn sob, a Naaŋmɩn na ƴãw lãwnɩ maalʋ nʋɔr ŋa a:

³«Kɛ́ fʋ tʋ̃ɔ́ wone nʋ̃ɔ̀ ɛ́ páw nyɔ-vʋʋr-wogo a tẽw zu[5].»

⁴Nyɩɩm dɔwrbɛ ɛ, nyɩ ta gaarɛ a nyɩ bibiir bɛrɛ ɩ, nyɩ guole bɛ nɩ wulu nɩ kpaalʋ na yi a Sore zie a.

⁵Gbãgbaar i, nyɩ sàwr a nyɩ tẽw zu ka nɩbɛ na so nyɩ a nʋɔr, nɩ ƴãwfʋ nɩ zɔba, nɩ nyɩ pʋɔ za mɛ̃ a Kɩrɩta nʋɔr'ʋ nyɩ sàwr a.

⁶Nyɩ ta ɩrɛ à à ŋá bɛ na piwre nyɩ a zũú ɛ, mɛ̃ nyɩ bɔbr'a kɛ́ nyɩ ɩrɛ a pɛlɩ nɩsaalbɛ pʋɔ a ɩ. Ɛcɛ nyɩ ɩrɛ mɛ̃ Kɩrɩta gbãgbaar na páwr a Naaŋmɩn pʋ-tɩɛrʋ maalʋ ƴãw a.

⁷Nyɩ tone nɩ pʋ-pla mɛ̃ a Sore mɩŋa n'ʋ nyɩ tone, ɛ́ a bɛ ɩ nɩsaalbɛ nɛbɛ a ɩ.

⁸Nyɩ bãwnɩ a na, bʋ̃-vla nɛ ŋa za na maalɩ a, ʋ ɩ n gbãgbaa bɩɩ nɩr na so ʋ tʋɔra a, ʋ na lɛb'a páw ʋ a Sore zie.

⁹Ɛ́ nyɩɩm na so a gbãgbaar a, nyɩ mɩ̀ ɩrɛ a lɛ a bɛ zie. Nyɩ bɛr a bɛ tanʋ. Nyɩ bãwnɩ a na, nyɩɩm nɩ a bɛl za Sore be n a saa-zu, ɛ́ ʋl bɛ tɛr owru kãw za a nɩsaalbɛ ƴãw ɛ.

¹⁰A al na cɛ a n'ɩ kɛ́ nyɩ tɛr fãw na yi nyɩɩm nɩ a Sore lãw-taa pʋɔ a, nyɩ tɛr fãw na yi a ʋ fãw na kpɛmɛ bɛ tɛr tɔ a pʋɔ.

¹¹Nyɩ de a Naaŋmɩn zɛbr bome tʋ̃ɔ́ zɛb tʋ̃ɔ́ nɩ a Gɛgɛra yã-maalʋ.

¹²Nɩsaal bɛ n'ʋ tɩ zɛbr'ɩ ɛ, niw-dierbɛ nɩ kpɛnʋ dem a, a bɛlɩ dem na so a lige tẽ-daa ŋa a, nɩ a kɔ̃tɔ̃-faar na be a salom zu a, bɛlɛ nɛbɛ tɩ zɛbr'ɩ.

¹³Alɛ so, nyɩ de a Naaŋmɩn zɛbr bome, lɛ n'a a bibi-faa bibir nyɩ kʋ̃ sàw bɛ tʋ̃ɔ́ nyɩ ɛ, ɛ́ cãà tʋ̃ɔ́ àr saaƴẽwn à á ŋá za pùorí.

¹⁴A na ɩ lɛ a, nyɩ ìr cɔbrɩ gù: nyɩ de a yel-mɩŋa sɛ sɩɛmɩ́ mɛ̃ kpàwr a, ɛ́ su a mɩnʋ mɛ̃ zɛbr-nyãa-kpale a.

¹⁵Ɛ́ a ƴã-ɓaarʋ Yel-nʋ̃ɔ̀ hieru ton na faarɛ a, ɩ nafawr nyɩ ƴãw.

¹⁶Ɛ́ baa zuo a za, nyɩ de a naaŋmɩn-sàwfʋ ʋ ɩ a zɛbr-kur-pãgala, ʋ na sõw nyɩ na nyɩ kpiiri a pime vũu a Faalʋ sob na tɛbr'ɩ nyɩ a.

¹⁷Nyɩ sàw de a faafʋ mɛ̃ kpawɔ-kpow nyɩ na vɔblɩ a, ɛ́ tɛr a Vʋʋrʋ Sõw zɛbr-sɔ-kpɛ̃ɛ, a pɛr lɛ kɛ́ a Naaŋmɩn ƴɛ̀rʋ.

¹⁸Nyɩ puore zɛlɛ à á ŋá za a Naaŋmɩn zie. A Vʋʋrʋ Sõw, ʋ sõwne nyɩ nyɩ puore kʋralɛ. A lɛ ƴãw a, nyɩ bɛr gʋ̃ɔ ɛ́ taa lɛbr pùor ɛ. Nyɩ puore kʋ̀rɛ a Naaŋmɩn nɩ-bʋʋrɛ za.

¹⁹Nyɩ mɩ̀ puore kʋ̀rɛ mɛ̃, kɛ́ Naaŋmɩn ƴãw a ƴɛ̀r-bie al na sɛw a a ɩ̃ nʋɔrɩ́, k'ɩ̃ tʋ̃ɔ́ ɓãá ƴãw manɩ a Yel-nʋ̃ɔ̀ yel-sɔwla wul ʋ sãá.

²⁰Ɩ̃ na saa be a gaso pʋɔ a, ɩ̃ cãà na ɩ nɩr bɛ na tõ a Yel-nʋ̃ɔ̀ ŋa yúor ƴãw a. Lɛ so, nyɩ puore kʋ̀rɛ mɛ̃ k'ɩ̃ tʋ̃ɔ́ ɓãá ƴãw manɛ ʋ mɛ̃ a lɛ a na fɛr k'ɩ̃ɩ ɩrɛ a.

²¹A tɩ yɛb-nɔna Tɩsɩkɩ mɩ̀ na lãwnɩ mɛ̃ tone a Sore bɛ lɛbr pùor a, ʋ na manɩ nɩ a ɩ̃ yele za kʋ̀ nyɩ nyɩ tʋ̃ɔ́ bãw lɛ a na ŋmɛ̃ a ɩ̃ zie a, nɩ bom nɛ ɩ̃ na ɩrɛ a.

²²Ɩ̃ sʋ̃ɔm'a tõ ʋ a nyɩ zie k'ʋʋ wa manɩ a tɩ yele kʋ̀ nyɩ ɛ́ mɔwlɩ nyɩ.

²³A Naaŋmɩn Sãà nɩ a Sore Yeezu Kɩrɩta, bɛ kʋ̀ a yɛbr za ƴã-ɓaarʋ, nɔ̃w-taa nɩ naaŋmɩn-sàwfʋ.

²⁴A bɛlɩ dem za na nɔnɛ a tɩ Sore Yeezu Kɩrɩta nɩ nɔ̃wfʋ na bɛ tɛr sãwfʋ a, a Naaŋmɩn maalʋ, ʋ be a bɛ zie.