Read Dagara, Northern Filib 1 Bible Online

Filib 1 - Dagara, Northern bible

Filib 1

¹Pol nɩ Timote, na ɩ a Yeezu Kɩrɩta tõ-tõ-biir a, bɛlɛ nɛbɛ kʋ̀rɛ a sɛbɛ ŋa a Filib tẽw nɩbɛ bɛl za a Yeezu Kɩrɩta na ɩ bɛ pʋɔ a Naaŋmɩn nɩ-bʋʋrɛ pʋɔ a, bɛlɛ nɩ a bɛ kaarbɛ nɩ a bɛ dɩakɩr mɩnɛ.

²A Naaŋmɩn tɩ Sãà nɩ a Sore Yeezu Kɩrɩta maalʋ nɩ ƴã-ɓaarʋ, a be a nyɩ zie.

³Mãa mɩ́ wa lɛb tɩɛrɛ a nyɩ yele a, ɩ̃ mɩ́ puore nɩ a ɩ̃ Naaŋmɩn yãanɩ.

⁴Kʋralɛ mãa wa puore kʋ̀rɛ nyɩ a, ɩ̃ mɩ́ puore nɩ nɩ nʋ̃ɔ̀,

⁵nyɩ na lãw nɩ mɛ̃ a Yel-nʋ̃ɔ̀ hieru ƴãw a zũú, a pɛr-tib daar za wa tɩ tɔ a dɩ̃a a.

⁶Ɩ̃ bɛ bʋ́nɛ nɩ a yel ŋa ɩ: a Naaŋmɩn na tĩ a tõ-vla ʋl a nyɩ zie a, ʋ na cãà na cow ʋ tɩ baarɩ a Yeezu Kɩrɩta lɛb-waa bibir.

⁷A sɛw na k'ɩ̃ɩ tɛr a tɩɛrʋ á ŋá taabɛ a nyɩ za ƴãw. Ɩ̃ tɛr'ɩ a nyɩ za tɩɛrʋ a ɩ̃ socir pʋɔ, bʋ̃ʋ n'ʋ vɛ̃, nyɩ za pʋɔ nɩ a maalʋ a Naaŋmɩn na kʋ̀ m a pʋɔ, a ƴɛrɛŋa ɩ̃ na be a gaso pʋɔ a, nɩ a lɛn daar ɩ̃ na mɩ́ zɛbr a Yel-nʋ̃ɔ̀ yel-mɩŋa zɛbr a.

⁸Naaŋmɩn dɩ n a ɩ̃ dãsɩɛ k'ɩ̃ɩ nɔnɛ nyɩ na nɩ a Yeezu Kɩrɩta nɔ̃wfʋ tɔr za.

⁹Ɛ́ a ɩ̃ puoru n'ɩ ŋa: kɛ́ a nyɩ nɔ̃wfʋ kɛrɛ dɔwlɛ nɩ bãwfʋ mɩŋa nɩ nyɛrʋ na vɩɛl ʋ za a,

¹⁰nyɩ tʋ̃ɔ́ mɩ́ bãw bom nɛ na vɩɛl a. Lɛ n'a nyɩ na vɩɛl nyɩ za, ɛ́ bɛ tɛr sãwna a Kɩrɩta waa bibir ɛ.

¹¹A yel-mɩnʋ yel-vɩɛlɩ a Yeezu Kɩrɩta na maalɩ a nyɩ zie a na ɩ na nyɩ kpɛ naalʋ, a Naaŋmɩn yúor zɛwfʋ nɩ a ʋ danʋ ƴãw.

¹²Yɛbr i, ɩ̃ bɔbr'a kɛ́ nyɩ bãwnɩ a: a yele za na ta m a nɩ̃ɛ na ɩ a Yel-nʋ̃ɔ̀ hieri tɔl nidaa.

¹³A Ʋrɔm tẽw na-kpɛ̃ɛ-lɩɛrɛ yir za pʋɔ nɩ a ziir za a, nɩr za bãwnɩ a nɩ ƴɛrɛŋa, kɛ́ a Kɩrɩta ƴãw n'a ɩ̃ be a gaso pʋɔ.

¹⁴A ɩ̃ gaso pʋɔ pàwfʋ ɩ na yɛbr yaga zie ɓãá ƴãw bɛr tɩɛrʋ a Sore ƴãw, bɛ lɛb bãw ƴãw fãw bɛr dɛ̃bɩ̃ɛ za ɛ́ hiere a Naaŋmɩn ƴɛ̀rʋ.

¹⁵Sɩza n'a, nyuur'a bɛ mɩnɛ ɩrɛ nɩ mɛ̃ hiere a Kɩrɩta, tɛr'ɩ cier-taa tɩɛrʋ a ɩ̃ zie, ɛcɛ bɛ mɩnɛ hiere a Kɩrɩta nɩ tɩɛrʋ na vɩɛl a.

¹⁶A bɛ ŋa tone na nɩ nɔ̃wfʋ, bɛ bãw na k'ɩ̃ɩ be n a ka k'ɩ̃ɩ zɛb faa a Yel-nʋ̃ɔ̀.

¹⁷Ɛ́ a bɛl a, cier-taa yã n'a bɛ hiere nɩ a Kɩrɩta. A bɛ tɩɛrʋ bɛ vɩɛl ɛ, bɛ tɩɛr kɛ́ lɛ n'a bɛ na ɩ a ɩ̃ gaso pʋɔ pàwfʋ lɛb bãw wone mɛ̃.

¹⁸Ɛcɛ, a na ɩ m'ɩ ŋmɩn? Alɛ saa ŋmɛ̃ ŋmɩŋmɩn za a, tɩɛr-faar'a bɛ tɛr, bɩɩ yel-mɩŋa pʋɔ n'a bɛ be a, bɛ hier'ɩ a Kɩrɩta, ɛ́ nʋ̃ɔ̀ kpɩɛr mɛ̃ a al ƴãw. Mɔ̃ mɩ̀, ɩ̃ na cãà na cɩlɛ a al ƴãw.

¹⁹Bʋ̃ʋ n'ʋ vɛ̃, ɩ̃ bãw kɛ́ a na wa n nɩ faafʋ a ɩ̃ ƴãw a nyɩ puoru zũú, nɩ a Yeezu Kɩrɩta Vʋʋrʋ na sõwne mɛ̃ a zũú.

²⁰Mɛ̃ a lɛ ɩ̃ na tɩɛrɛ kpɛ̃w za gùre nɩ a, ɩ̃ kʋ̃ nyɛ̃ vĩ towtow ɛ. Ɩ̃ bãwnɩ a na bɛ bʋ́nɛ zaa pʋrɩ mɩ̀ ɛ, a ƴɛrɛŋa nɩ kʋralɛ, a Kɩrɩta na nyɛ̃ nɩ danʋ a ɩ̃ nɩr ɩb za pʋɔ, alɛ saa ɩ a ɩ̃ cãafʋ pʋɔ n'a, bɩɩ a ɩ̃ kũu pʋɔ n'a a.

²¹Bʋ̃ʋ n'ʋ vɛ̃, mãa ƴãw a, a nyɔ-vʋʋrʋ n'ɩ a Kɩrɩta, ɛ́ a kũu bɛ ɩ loba a ɩ̃ zie ɩ.

²²Ɛcɛ, mãa na na cãà tɛr yel-ɩra kãw a ɩ̃ cãafʋ pʋɔ a, a ka n'a ɩ̃ pãa bɛ bãw bʋ̃ʋ n'ʋ ɩ̃ na kaa ír ɛ.

²³Ziir ayi n'a ɩ̃ àr'ɩ dɛ bɛ bãw ɛ: ɩ̃ bɔbr'a k'ɩ̃ɩ nãá kpi cen tɩ lãw nɩ a Kɩrɩta, lɛ n'a nãá vɩɛl tɩ zuo.

²⁴Ɛcɛ a nyɩɩm ƴãw a, a cãà vʋʋrɛ a tẽw zu ka n'a fɛrɛ zuo.

²⁵Ɩ̃ mɩŋa za bãwnɩ a na, ɩ̃ bãw na k'ɩ̃ɩ na be n be, ɩ̃ na be n be pɩɛlɩ nyɩ za, cãà sõwne nyɩ, nyɩ kɛrɛ dɔwlɛ ɛ́ tɛr nʋ̃ɔ̀ a nyɩ naaŋmɩn-sàwfʋ pʋɔ.

²⁶Lɛ n'a mãa wa lɛb wa be a nyɩ zie a, a danʋ nyɩ na tɛr lãwnɩ a Kɩrɩta a, na kɛrɛ a mãa ƴãw.

²⁷Alɛ saa ŋmɛ̃ ŋmɩŋmɩn a, nyɩ ɩ a nyɩ nyɔ-vʋʋrʋ tuur a Kɩrɩta Yel-nʋ̃ɔ̀, kɛ̀ mãa wa wa a nyɩ nyɛ́b bɩɩ mãa bɛ wa ka be a, mãa wone kɛ́ nyɩ lãw nɩ taa tɛr tɩɛr-been kpɛ̃w za, kɛ́ nyɩ lãw nɩ soci-been zɛbr a naaŋmɩn-sàwfʋ na yi a Yel-nʋ̃ɔ̀ pʋɔ a zɛbr,

²⁸ɛ́ bɛ sàw a nyɩ dɔ̃ dem vʋ̃ɔ nyɩ pʋ̀lá zaa pʋrɩ ɛ, lɛ n'a a na wul bɛ kɛ́ bɛ bɔrɛ na, ɛcɛ a nyɩɩm be a faafʋ sɔ́r zu, ɛ́ a za yi a Naaŋmɩn zie.

²⁹Bʋ̃ʋ n'ʋ vɛ̃, ʋ kʋ̀ nyɩ nɩ a maalʋ ŋa kɛ́ nyɩ tone a Kɩrɩta tome na bɛ ɩ a ʋ sàw-deb tɛwr a, ɛ́ mɩ̀ cãà ɩ a tuo nyɩ na wone a ʋ ƴãw,

³⁰zɛbr'ɩ a zɛb-been nɛ nyɩ na nyɛ̃ ɩ̃ zɛb, ɛ́ nyɩ bãwnɩ ɩ̃ cãà zɛbr a.