Read Dagara, Northern Filib 4 Bible Online

Filib 4 - Dagara, Northern bible

Filib 4

¹A na ŋmɛ̃ à ŋá a, ɩ̃ yɛb-nɔnɩ ɩ̃ na bɔbr k'ɩ̃ɩ lɛb nyɛ̃ tuo tuo a, nyɩɩm na ɩ a ɩ̃ nʋ̃ɔ̀ nɩ a ɩ̃ dɛpaal-bom a, nyɩ ƴãw fãw tɛr nyɩ tʋɔra vla à à ŋá lãwnɩ a Sore, ɩ̃ nɩ-nɔnɩ i.

²Ɩ̃ zɛlɛ nɩ a Evodi nɩ a Sɛ̃tisi yãayãa, kɛ́ bɛ tɛr wõ-taa lãwnɩ a Sore.

³Ɛ́ a fʋ̃ʋ na ɩ a ɩ̃ lãw-tõ-tɔ mɩŋa a, ɩ̃ zɛlɛ fʋ na: sõw bɛ, bʋ̃ʋ n'ʋ vɛ̃, bɛ lãw nɩ mɛ̃ na tɩ zɛb a Yel-nʋ̃ɔ̀ ƴãw, lãwnɩ a Kilimã nɩ a ɩ̃ lãw-tõ-taabɛ bɛl za na cɛ a. A bɛ yée sɛb'a ƴãw a nyɔ-vʋʋrʋ sɛbɛ pʋɔ.

⁴Nyɩ cɩlɛ kʋralɛ nyɩ na lãw nɩ a Sore a, ɩ̃ lɛb'a yere: nyɩ cɩlɛ.

⁵Nyɩ ɩ a nyɩ nɔ̃wfʋ-ɩb sãá nɩbɛ za nyɛ̃. A Sore pɩɛl'a.

⁶Nyɩ ɓãá ƴãw bɛr tɩɛrʋ, ɛ́ a yele za pʋɔ a, nyɩ mɩ́ puore zɛlɛ nɩ a Naaŋmɩn yãayãa ɛ́ lãwnɩ barka puoru, ʋ tʋ̃ɔ́ mɩ́ bãw a nyɩ bʋ̃-bɔbra.

⁷Lɛ n'a a Naaŋmɩn ƴã-ɓaarʋ na zuo a nɩsaal yã a, na gù a nyɩ socie nɩ a nyɩ tɩɛrʋ a lãw nɩ a Yeezu Kɩrɩta.

⁸Alɛ saa ŋmɛ̃ ŋmɩŋmɩn za a, yɛbr i, bom za na ɩ sɩza ɛ́ sɛw taa nɩ a, bom za na tu yel-mɩŋa ɛ́ bɛ tɛr dɛwr a, bom za na sɛw nɩ nɔ̃wfʋ nɩ ƴãwfʋ a, bom nɛ za bɛ na bʋɔlɛ ɩ-vɩɛlɩ-ɩb ʋʋ maal'ɩ danʋ a, nyɩ tɛr a al za tɩɛrʋ.

⁹Bom nɛ nyɩ na zànɩ ɛ́ páw a ɩ̃ zie a, bom nɛ nyɩ na nyɛ̃ a ɩ̃ zie ɛ́ wõ a, nyɩ tɛr a ɩrɛ, ɛ́ a ƴã-ɓaarʋ Naaŋmɩn na be n a nyɩ zie.

¹⁰A ɩ m'ɩ nʋ̃ɔ̀ yaga za ɩ̃ na lãw nɩ a Sore a. Bʋ̃ʋ n'ʋ vɛ̃, nyɩ ɩ n a tɩɛrʋ nyɩ na tɛr a ɩ̃ ƴãw a ʋ pãa lɛb sãá. Sɩza, nyɩ tɛr'ɩ a ɩ̃ tɩɛrʋ, ɛcɛ vuo n'ʋ nyɩ bɛ tɩ nyɛ̃ na ɩ ʋ sãá ɩ.

¹¹A bɛ kaar mɛ̃ fɛrʋ n'a ƴãw ɩ̃ ƴɛ̀rɛ ɩ, ɩ̃ bãw nɩ ɩ̃ tʋɔra tɛrʋ a yele za pʋɔ.

¹²Ɩ̃ bãw nɩ ɩ̃ tʋɔra tɛrʋ a nã́w pʋɔ nɩ a tɛra pʋɔ. A yele za pʋɔ nɩ ziir za, ɩ̃ bãw nɩ a tɩwr nɩ a kɔ̃ tɛrʋ, a bʋ̃-dɩrɩ na ʋr a, nɩ a na bɛ nyɛrɛ a.

¹³Ɩ̃ mɩ́ tʋ̃ɔ́ nɩ bom za, a Kɩrɩta na kʋ̀rɛ mɛ̃ a fãw a zũú.

¹⁴Ɛcɛ a mɩ̀ cãà na vɩɛl, nyɩ na lãw nɩ mɛ̃ a ɩ̃ kpɩɛrʋ pʋɔ a.

¹⁵A nyɩɩm Filib tẽw kɩrɩta-biir, nyɩ mɩŋa za bãwnɩ a na, a Yel-nʋ̃ɔ̀ hieru tib daar, a lɛn daar ɩ̃ na tɩ bɛr a Masedʋan tẽw a, Lãw-yir kãw za bɛ tɩ sõw a ɩ̃ wʋɔ ʋ kpɛ bɩɩ ʋ bɛ kpɛ, a bɛ ɩ a nyɩɩm tɛwr ɛ.

¹⁶A lɛn daar ɩ̃ na tɩ be a Tesalonikɩ a, gb'a à ŋá za, nyɩ tɩr'ɩ a ɩ̃ bʋ̃-bɔbrɩ kʋ̀ m.

¹⁷A bɛ kaar mɛ̃ ɩ̃ bɔbr'a kɛ́ nyɩ kʋ̀rɛ mɛ̃ bome ɩ. Bom nɛ ɩ̃ na bɔbr'a n'ɩ kɛ́ bɛ sɔ́r a ɩ-vɩɛlɩ wɔmɛ á ŋá ƴãw a nyɩ tɛra pʋɔ.

¹⁸Mɔ̃ mɩ̀, ɩ̃ tɛr'ɩ bom za a na sɛw k'ɩ̃ɩ tɛr a, ɛ́ tɛr dɔwlɩ mɩ̀. Bom bɛ cɛ m ɛ, ɩ̃ na páw a bom ʋl nyɩ na kʋ̀ a Epafoditɩ k'ʋʋ wa kʋ̀ m a. A ɩ na mɛ̃ parfɛ̃ na nyùur vla vla a, ɛ́ ɩ bàwr na nʋmɛ a Naaŋmɩn zie ʋ sàw de a.

¹⁹A ɩ̃ Naaŋmɩn na sõw nyɩ nɩ vla za nɩ a ʋ maalʋ na yi a Yeezu Kɩrɩta zie a, nyɩ páw a nyɩ bʋ̃-bɔbrɩ za kpɛ̃lɛ̃kpɛ̃lɛ̃.

²⁰A Naaŋmɩn tɩ Sãà so yúor-vɩɛlʋ-danʋ a yome yome za, amɛn.

²¹Nyɩ puori a kɩrɩta-nɩbɛ za been been a Yeezu Kɩrɩta yúor ƴãw. A yɛbr na be a ɩ̃ zie a puore nyɩ na.

²²A kɩrɩta-nɩbɛ za puore nyɩ na, baa zuo a za a bɛl na tone a Ʋrɔm tẽw na-kpɛ̃ɛ tome a.

²³A Sore Yeezu Kɩrɩta maalʋ, ʋ be a nyɩ za zie.