Read Dagara, Northern Kɔlɔsɩ 4 Bible Online

Kɔlɔsɩ 4 - Dagara, Northern bible

Kɔlɔsɩ 4

¹Nɩ-bɛrɛ ɛ, nyɩ kaarɛ a nyɩ gbãgbaar zie nɩ yel-mɩnʋ nɩ a lɛ a na sɛw a, ɛ́ mɩ̀ bãwnɩ a nyɩ na tɛr Nɩ-kpɛ̃ɛ a salom zu a.

²Nyɩ su zu a puoru ƴãw, a ɩ nyɩ bɛr gʋ̃ɔ ɛ́ puore a Naaŋmɩn barka.

³Nyɩ mɩ̀ cãà puore kʋ̀rɛ tɩ: kɛ́ a Naaŋmɩn sàw tɩ nyɛ̃ vo-vla hiere a ʋ ƴɛ̀rʋ, k'ɩ̃ɩ manɛ a Kɩrɩta sàw-deb yel-sɔwla, a ʋl ƴãw n'a ɩ̃ be a gaso pʋɔ.

⁴Nyɩ puore k'ɩ̃ɩ manɛ a yel-sɔwla ŋa pàwr a ziir za mɛ̃ a lɛ a na fɛr k'ɩ̃ɩ ɩrɛ a.

⁵Nyɩ ɩrɛ a yẽw dem zie nɩ yã-bãwfʋ, nyɩ taa bɛrɛ vo-vla za ʋ tɔlɛ ɩ.

⁶Nyɩ mɩ́ ɩ a nyɩ ƴɛ̀rʋ nʋmɛ kʋralɛ mɛ̃ bom bɛ na ƴãw nyaarʋ a, ɛ́ sõwne a nɩbɛ. Nyɩ mɩ́ bãw a sɔwfʋ sɔw vla kʋ̀ ŋa za.

⁷A ɩ̃ yɛb-nɔna Tɩsɩkɩ, na ɩ tõ-tõ-bi-dẽdele nɩ ɩ̃ lãw-tõ-tɔ a Sore tome pʋɔ a, ʋ na manɩ nɩ a ɩ̃ yele za kʋ̀ nyɩ.

⁸Ɩ̃ sʋ̃ɔm'a bul tone ʋ a nyɩ zie, k'ʋʋ wa manɩ a tɩ yele kʋ̀ nyɩ ɛ́ mɔwlɩ nyɩ.

⁹A tɩ yɛb tɔr za nɩ tɩ bá Onezim, na ɩ a nyɩ nɩr a, bɩɛlɛ ʋ na. Bɛ na manɩ nɩ bom za na ɩrɛ a ka a kʋ̀ nyɩ.

¹⁰Arɩsɩtakɩ, mãa nɩ ʋl na be a gaso pʋɔ a, puore nyɩ na lãwnɩ a Banabasɩ yɛb Markɩ. Bɛ yel'a kʋ̀ nyɩ a lɛ nyɩ na na ɩrɛ a Markɩ ƴãw a: ʋlɛ wa wa a nyɩ zie a, nyɩ de ʋ vla.

¹¹A Yeezu bɛ na bʋɔlɛ Zitisɩ a mɩ̀ puore nyɩ na. A Zifʋ mɩnɛ pʋɔ a, bɛl tɛwr nɛbɛ lãw nɩ mɛ̃ tõ a Naaŋmɩn Naalʋ tome. Bɛ mɔwlɩ mɛ̃ nɩ yaga.

¹²A Epafarasɩ na ɩ a nyɩ nɩr a, ʋ mɩ̀ puore nyɩ na. A Yeezu Kɩrɩta tõ-tõ-bie ŋa tʋlɛ nɩ a puoru ƴãw, puore kʋ̀rɛ nyɩ kʋralɛ, kɛ́ nyɩ tʋ̃ɔ́ tɛ nyɩgɛ ɛ́ bɩ nɩbɛ baar a Kɩrɩta sɔ́r pʋɔ, maalɛ a Naaŋmɩn pʋ-tɩɛrʋ za.

¹³Ɩ̃ dɩrɛ nɩ a ʋ dãsɩɛ ʋ na wone tuo a nyɩ ƴãw bɛ dɩ vuo a, nɩ a Lawdise dem nɩ a Ierapolisi dem ƴãw a.

¹⁴A tɩ bá Luka na ɩ a dɔwta a, nɩ Demasɩ puore nyɩ na.

¹⁵Nyɩ puori a yɛbr na be a Lawdise a, nɩ a Nɛ̃fa, lãwnɩ a Lãw-yir na ɓanɛ taa a ʋ yir a.

¹⁶Nyɩmɛ wa kanɩ a ɩ̃ sɛbɛ baar'a, nyɩɩm ɩ ʋ ta a Lawdise Lãw-yir pʋɔ bɛ mɩ̀ kanɩ ʋ. Ɛ́ nyɩ mɩ̀ kanɩ a Lawdise Lãw-yir sɛbɛ bɛ na na tɩr kʋ̀ nyɩ a.

¹⁷Nyɩ yel à ŋá kʋ̀ a Arsɩpʋ: «Kaarɛ a Sore ton fʋ na páw a zie vla, ɛ́ ƴãw fãw tone ʋ vla.»

¹⁸A mãa Pol nũu na sɛb a yãanɩ puoru a n'ɩ ŋa: nyɩ taa yiire ɩ̃ na be a gaso pʋɔ a ɩ. A Naaŋmɩn maalʋ, ʋ be a nyɩ zie.