Read Dagara, Northern 1 Tesalonikɩ 5 Bible Online

1 Tesalonikɩ 5 - Dagara, Northern bible

1 Tesalonikɩ 5

¹A daar ʋl tɔr za nɩ a vuo ʋl pʋɔ a yele á ŋá za na na ɩ a, yɛbr i, a bɛ tɛr kɛ́ bɛ sɛbr nyɩ a al ƴãw ɛ.

²Bʋ̃ʋ n'ʋ vɛ̃, nyɩ mɩŋa za bãwnɩ a nɩ vla vla a Sore bibir na na vɩɛ mɛ̃ nyãnyuge na mɩ́ wa tɩ̃ɩsɔw a.

³A lɛn daar a nɩbɛ nãà wa yere: «Ƴã-ɓaarʋ bɔkɔɔ! Damnʋ za yee!» Lɛn daar'a a yele na ùr sãw a bɛ zie mɛ̃ 'wɔbrʋ na nyɔw pɔw-pʋɔ a, ɛ́ bɛ kʋ̃ tʋ̃ɔ́ zɔ cɩ̃ɛ ɩ.

⁴Ɛcɛ nyɩɩm a, yɛbr i, nyɩ bɛ be lige pʋɔ a bibir ŋa nãà wa ùr nyɩ mɛ̃ nyãnyuge a ɩ.

⁵Bʋ̃ʋ n'ʋ vɛ̃, nyɩ za ɩ n cãà bibiir nɩ mʋ̃tɔ̃w daarɩ́ bibiir, tɩ̃ɩsɔw nɩ lige bɛ so tɩ ɛ.

⁶A na ɩ à ŋá a, tɩ ta gúre mɛ̃ a bɛl na cɛ a ɩ, tɩ bɛr gʋ̃ɔ ɛ́ tɛr maal-ɩrɛ a dɩb nɩ a nyub ƴãw.

⁷A gʋ̃ɔ-gúrbɛ a, tɩ̃ɩsɔw n'a bɛ mɩ́ gúre, ɛ́ a dã-kuolbɛ a, tɩ̃ɩsɔw n'a bɛ mɩ́ kuoli a dãa.

⁸Ɛcɛ tɩɩm na ɩ mʋ̃tɔ̃w daarɩ́ nɩbɛ a, nyɩ ɩ tɩ mɩ́ nyɔw tɩ tʋɔra a dɩb nɩ a nyub ƴãw. Tɩ de a naaŋmɩn-sàw-deb nɩ a nɔ̃wfʋ a ɩ mɛ̃ a zɛbr kparʋ na mɩ́ pàw a nyãa tɩ tɔ a sɩɛ a, ɛ́ de a faafʋ tɩɛrʋ mɛ̃ zɛbr-kpawɔ-kpow a.

⁹Bʋ̃ʋ n'ʋ vɛ̃, a Naaŋmɩn bɛ ír tɩ ƴãw a ʋ suur ƴãw ɛ, ʋ ír tɩ na ƴãw kɛ́ tɩ wa páw a faafʋ a tɩ Sore Yeezu Kɩrɩta ƴãw.

¹⁰A Kɩrɩta kpi n a tɩ ƴãw k'ʋʋ ɩ tɩ lãw nɩ ʋ vʋʋrɛ, tɩmɛ saa kpi bɩɩ cãà vʋʋrɛ a.

¹¹Lɛ so, nyɩ mɔwlɛ taa a sàw-deb pʋɔ, mɛ̃ a lɛ nyɩ na ɩrɛ baar'a.

¹²Yɛbr i, tɩ zɛlɛ nyɩ na, nyɩ ƴãwnɛ a bɛlɩ dem na hanɛ a nyɩ sɔgɔ, ɛ́ a Sore mɩ́ ƴãw bɛ kaarɛ a nyɩ zie ɛ́ kpãanɛ nyɩ a.

¹³Nyɩ de a bɛ yele vla, ɛ́ nɔnɛ bɛ a bɛ tõ-nʋɔr zũú. Nyɩ tɛr ƴã-ɓaarʋ a nyɩ cara pʋɔ.

¹⁴Yɛbr i, tɩ kpaalɛ nyɩ na: nyɩ kpãanɛ a ƴã-to-dem, nyɩ mɩ́ yel a bɛlɩ dem na zɔrɛ dɛ̃bɩ̃ɛ a, kɛ́ bɛ ƴãw fãw bɛr a dɛ̃bɩ̃ɛ, nyɩ sõwne a bãbàalbɛ, nyɩ tɛr su-nyɔwra a nɩbɛ za zie.

¹⁵Nyɩ gù vla nɩr za taa mɩ́ wa maalɛ faa yaarɛ nɩ a faa san ɛ. Ɛcɛ nyɩ nɩ̃ɛ mɩ́ ƴãw fãw maalɛ a vla kʋralɛ, a nyɩ cara pʋɔ nɩ a nɩbɛ za zie.

¹⁶Nyɩ cɩlɛ kʋralɛ,

¹⁷nyɩ puore kʋralɛ,

¹⁸nyɩ puore Naaŋmɩn yãanɩ bom za ƴãw. A Naaŋmɩn pʋ-tɩɛrʋ n'ɩ à à ŋá a nyɩ zie, nyɩ na lãw nɩ a Yeezu Kɩrɩta a.

¹⁹Nyɩ ta piwr a Vʋʋrʋ Sõw tome ɩ.

²⁰Nyɩ ta dier a naaŋmɩn-ƴɛ̀r-manbɛ ƴɛ̀rʋ a ɩ bʋ̃-zawlɛ ɩ.

²¹Ɛcɛ, nyɩ mɩ́ jɛl bom za kaa ɛ́ kaa ír a ʋl na vɩɛl a tɛr,

²²ɛ́ gùre nyɩ tʋɔra vla yel-faa bʋʋrɛ kãw za ƴãw.

²³A ƴã-ɓaarʋ Naaŋmɩn tɔr za, ʋ ɩ nyɩ ɩ son nyɩ za, ʋ gù a nyɩ nɩɩlʋ za, a tɩɛrʋ, a sɩ́ɛ nɩ a ƴã-gan, ʋ taa wa tɛr sãwna bɛ yere a tɩ Sore Yeezu Kɩrɩta waa daar ɛ.

²⁴A sob nɛ na bʋɔlɛ nyɩ a ŋmɛ̃ n ʋ ŋmɛ̃a, ʋ na maal'ɩ à á ŋá za.

²⁵Yɛbr i, nyɩ mɩ̀ puore kʋ̀rɛ tɩ.

²⁶Nyɩ weri a yɛbr za puori bɛ.

²⁷Ɩ̃ zɛlɛ nyɩ nɩ yãayãa a Sore yúor ƴãw, nyɩ kanɩ a sɛbɛ ŋa kʋ̀ a yɛbr za.

²⁸A tɩ Sore Yeezu Kɩrɩta maalʋ, ʋ be a nyɩ zie.