Read Dagara, Northern Zozue 13 Bible Online

Zozue 13 - Dagara, Northern bible

Zozue 13

¹A Zozue tɩ kor'a nyãwnɩ a lɛn daar a Sore na tɩ yel ʋ: «Fʋ kor'a nyãwnɩ, ɛ́ a tẽw a na fɛr kɛ́ fʋ zɛb de a cãà bɛrmɛ yaga.

²Ten á ŋá n'a cãà cɛ fʋ na zɛb de: a Filisɩtɛ̃ mɩnɛ ten nɩ a Gesuur tẽw,

³a pɛr lɛ k'aa zie ʋl bɛ na de ʋ ɩ a Kanãa tẽw dem zie a. Ʋ yi n a Sɩhoor fʋɔla, a Eziptɩ tẽw tʋr-bɔw ƴãw ɛ́ tɩ sãá a Ekiron vuo pʋɔ, a saa-pɛrɩ́-gʋba-lowr. Be n'a a Filisɩtɛ̃ mɩnɛ na-mɩnɛ anũu be, so a Gaza, a Asɩdɔdɩ, a Asɩkalon, a Gatɩ nɩ a Ekiron, de nɩ a Avitɩ mɩnɛ tẽw na be

⁴a saa-pɛrɩ́-dʋrʋ-lowr a. A Kanãa tẽw mɩ̀ ɩ n bʋ̃-zɛb-diera, ʋ na tĩ a Meyara na ɩ Sɩdɔ̃ tẽw dem zie, ɛ́ tɩ sãá a Afɛkɩ, a Amoritɩ mɩnɛ tʋr-bɔw a,

⁵a Gebal vuo mɩ̀ nɩ a saa-pɛrɩ́ Libã na tĩ a Baal-Gadɩ na be a Hɛrmɔ̃ tãw sɩ̃ɛ́ a, ɛ́ tɩ tɔ a Lebo-Hamatɩ a,

⁶lãwnɩ a tan vuo ʋl na be a Libã nɩ a Misirefɔtɩ-Mayim cará a. Sɩdɔ̃ tẽw dem nɛbɛ kpɩɛr a be. A Ɩsɩrayɛl nɩbɛ na cere na, ɩ̃ɩ diwr a voru á ŋá nɩbɛ bɛrɛ a bɛ niŋé. Fʋ na ŋmɛ n gbãw põ a ziir kʋ̀ a Ɩsɩrayɛl nɩbɛ, mɛ̃ a lɛ ɩ̃ na yel kʋ̀ b a.

⁷A na ɩ à ŋá a, põ a ten á ŋá kʋ̀ a dɔwlʋ piwaɩ al, nɩ a Manase dɔwlʋ ŋmãa na bɛ páw bom sɛr a.»

⁸A Zurdɛ̃ gãwn saa-pɛrɩ́ a, a Moyiir tɩ põ nɩ a tẽsɔwr kʋ̀ a Manase dɔwlʋ ŋmãa na cɛ a, nɩ a Urubɛn dɔwlʋ nɩbɛ, nɩ a Gadɩ dɔwlʋ nɩbɛ. A Sore tõ-tõ-bie Moyiir'ʋ tɩ kʋ̀ bɛ a ziir á ŋá, a ɩ a bɛ sób.

⁹A Arowɛɛr na be a Arnon fʋɔla nʋɔr a tɩ n'ɩ a bɛ tʋr-bɔw a saa-pɛrɩ́-dʋrʋ-lowr, nɩ a tẽ-kpɛ̃ɛ ʋl na be a Arowɛɛr fʋɔla sɔwlɩsɔw a. A bɛ zie tɩ n'ɩ a Medeva tã-sɛr za, tɩ tɔ n a Divon,

¹⁰nɩ a Amoritɩ mɩnɛ nãà Sihon tẽ-bɛrɛ. Ʋ tɩ dɩrɛ nɩ a naalʋ a Hɛsɩbon, a vuo ʋl na cen tɩ tɔ a Amɔ̃ tẽw dem tʋr-bɔw a zu.

¹¹A bɛ zie mɩ̀ tɩ cãà n'ɩ a Galaadɩ tẽw, a Gesuur tẽw nɩ a Maaka tẽw, lãwnɩ a Hɛrmɔ̃ tãw za nɩ a Basan za tɩ tɔ n a Salka.

¹²A Ɔgɩ naalʋ-tẽw, a Basan, mɩ̀ tɩ pʋɔ nɩ a bɛ zie pʋɔ. Erefayitɩ bʋʋrɛ nɩ-pɛ-baara kãw tɩ n'ɩ a Ɔgɩ, ɛ́ Asɩtarɔtɩ nɩ Edɩrɛyɩ n'a ʋ tɩ dɩrɛ a naalʋ. A Moyiir tɩ zɛb'a tʋ̃ɔ́ a voru á ŋá nɩbɛ, ɛ́ de a bɛ ten.

¹³Ɛcɛ a Ɩsɩrayɛl nɩbɛ bɛ tɩ diw a Gesuur tẽw dem nɩ a Maaka bʋʋrɛ ɩ, lɛ n'a bɛ tɩ kpɩɛr a Ɩsɩrayɛl nɩbɛ sɔgɔ wa tɩ tɔ a dɩ̃a.

¹⁴Ɛcɛ a Moyiir bɛ tɩ kʋ̀ zie a Levi dɔwlʋ nɩbɛ, ʋ ɩ a bɛ sób ɛ: a de-kʋ̀b bome bɛ na mɩ́ kʋ̀ a Sore, a Ɩsɩrayɛl Naaŋmɩn a, alɛ tɩ n'ɩ a bom bɛ na so a, mɛ̃ a lɛ a Sore tɔr za na tɩ yel a.

¹⁵A Moyiir tɩ kʋ̀ n a Urubɛn dɔwlʋ zie, mɛ̃ a lɛ a bɛ yie na ɩ a.

¹⁶Bɛ tɩ páw nɩ zie, a saa-pɛrɩ́-dʋrʋ-lowr tʋr-bɔw na tɩ n'ɩ a Arowɛɛr tẽ-kpɛ̃ɛ na be a Arnon fʋɔla nʋɔr a, nɩ a tẽ-kpɛ̃ɛ ʋl na be a Arnon fʋɔla pʋɔ a. A zie nɛ tɩ n'ɩ a tã-sɛr na jil koli a Medeva a,

¹⁷ʋlɛ mɩ̀ cãà tɩ n'ɩ a Hɛsɩbon nɩ a tã-sɛr tẽ-bɛrɛ á ŋá za: Divon, Bamɔtɩ-Baal, Bɛtɩ-Baal-Mewon,

¹⁸Yahasɩ, Kedemɔtɩ, Mefaatɩ,

¹⁹Kiriyatayim, Sivima, Serɛtɩ-Sahaar, a fʋɔla tãw zu,

²⁰Bɛtɩ-Pewɔɔr, a Pisiga tã-sɩ́ɩr nɩ Bɛtɩ-Yesimɔtɩ,

²¹a tã-sɛr tẽ-bɛrɛ za, a Amoritɩ mɩnɛ nãà Sihon na tɩ dɩrɛ naalʋ a Hɛsɩbon a, naalʋ-tẽw za. A Moyiir tɩ zɛb'a tʋ̃ɔ́ a Sihon nɩ a Madian nɩ-bɛrɛ, a Sihon na tɩ so, ɛ́ bɛ kpɩɛr a tẽw pʋɔ a: Ewi, Ɛrekɛm, Suur, Huur nɩ Ereva.

²²A Bewɔɔr bidɛb, Balaam, na ɩ bàwr-bʋwrɛ a tɩ pʋɔ nɩ a nɩbɛ bɛl pʋɔ a Ɩsɩrayɛl nɩbɛ na tɩ kʋ a lɛn daar a.

²³A Zurdɛ̃ nɩ a ʋ tẽ-kpɔwlɩ tɩ n'ɩ a Urubɛn dɔwlʋ nɩbɛ tʋr-bɔw. A ten nɩ a ziir á ŋá na sɔ́r a tɩ n'ɩ a zie bɛ na so a, mɛ̃ a lɛ a bɛ yie na ɩ a.

²⁴A Moyiir tɩ kʋ̀ n zie a Gadɩ dɔwlʋ yie, mɛ̃ a lɛ a bɛ yie na ɩ a.

²⁵A bɛ zie tɩ n'ɩ a Yazɛɛr tẽw, a Galaadɩ tẽ-bɛrɛ za, nɩ a Amɔ̃ biir tẽw põ-zɛ̃-taa, tɩ tɔ n a Arowɛɛr na tori a Araba a.

²⁶Al pùorí, ʋ lɛb yi a Hɛsɩbon tɩ tɔ a Aramatɩ-Misɩpe nɩ a Betonim, ɛ́ yi a Mahanayim tɩ tɔ a Lodevaar tʋr-bɔw.

²⁷A Zurdɛ̃ fʋɔla pʋɔ a, bɛlɛ tɩ so Bɛtɩ-Haram, Bɛtɩ-Nɩmɩra, Sukotɩ, Safon, nɩ a Hɛsɩbon nãà Sihon naalʋ-tẽw ʋl na cɛ a, lãwnɩ a Zurdɛ̃ nɩ a ʋ tẽ-kpɔwlɩ, tɩ tɔ a Zenezarɛtɩ kʋ̃ɔ-kpɛ̃ɛ baarʋ zie, a Zurdɛ̃ gãwn, a saa-pɛrɩ́.

²⁸A tẽ-bɛrɛ nɩ a ziir á ŋá na sɔ́r a tɩ n'ɩ a zie a Gadɩ dɔwlʋ nɩbɛ na so a, mɛ̃ a lɛ a bɛ yie na ɩ a.

²⁹A Moyiir tɩ kʋ̀ n zie a Manase dɔwlʋ ŋmãa yie, mɛ̃ a lɛ a bɛ yie na ɩ a.

³⁰A bɛ zie tʋr-bɔw a saa-pɛrɩ́-dʋrʋ-lowr tɩ n'ɩ a Mahanayim, ɛ́ a bɛ tẽw tɩ n'ɩ a Basan za, a Basan tẽw nãà Ɔgɩ naalʋ-tẽw za, nɩ a Yayiir tẽli lɩz'a ata na be a vuo ʋl pʋɔ a.

³¹A bɛ zie mɩ̀ cãà tɩ n'ɩ a Galaadɩ tẽw põ-zɛ̃-taa zie, a Asɩtarɔtɩ nɩ a Edɩrɛyɩ tẽ-bɛrɛ, na tɩ dãw ɩ a Basan nãà Ɔgɩ tẽ-bɛrɛ a. A zie ŋa za n'ʋ bɛ tɩ kʋ̀ a Manase bidɛb, Makɩɩr bʋʋrɛ yie põ-zɛ̃-taa zie.

³²A Moyiir tɩ põ nɩ a ziir á ŋá vuo na be a Zeriko nɩ a Zurdɛ̃ saa-pɛrɩ́ a, a lɛn daar ʋ na tɩ be a Mowab tĩtalɛ pʋɔ a.

³³Ɛcɛ a Moyiir bɛ tɩ kʋ̀ zie a Levi dɔwlʋ nɩbɛ, bɛ so ʋ ɛ. A Sore, a Ɩsɩrayɛl Naaŋmɩn, tɩ n'ɩ a bom bɛ na so a, mɛ̃ a lɛ ʋ na tɩ yel kʋ̀ bɛ a.