Read Dagara, Northern Zozue 14 Bible Online

Zozue 14 - Dagara, Northern bible

Zozue 14

¹Nyɛ̃ a ziir a Ɩsɩrayɛl nɩbɛ na tɩ páw, a ɩ a ziir bɛ so, a Kanãa tẽw pʋɔ a. A bàwr-maalɛ Eleazaar nɩ a Nun bidɛb Zozue, nɩ a Ɩsɩrayɛl nɩbɛ dɔwlʋ yie nɩ-bɛrɛ tɩ kʋ̀ bɛ na bɛ so a.

²Gbãw n'ʋ bɛ tɩ ŋmɛ põ a ziir kʋ̀ a dɔwlʋ piwaɩ nɩ ŋmãa al na bɛ tɩ tɛr zie sɛr a, mɛ̃ a lɛ a Sore na tɩ yel kʋ̀ a Moyiir a.

³Bʋ̃ʋ n'ʋ vɛ̃, a Moyiir tɩ kʋ̀ n zie a dɔwlʋ ayi nɩ ŋmãa al, a Zurdɛ̃ gãwn, ɛcɛ ʋ bɛ tɩ kʋ̀ zie a levitɩ mɩnɛ bɛ so, a dɔwlʋ á ŋá sɔgɔ ɩ.

⁴Ɛcɛ a Zuzɛb bibiir tɩ ɩ n dɔwlʋ ayi, a Manase nɩ a Efarayim dɔwlʋ. A levitɩ mɩnɛ bɛl bɛ tɩ páw zie kãw za a bɛ ɩ tẽ-bɛrɛ bɛ na na kpɩɛr a, nɩ a ziir na jil koli a a, a bɛ dʋn nɩ a bɛ bʋ̃-tɛrɩ ƴãw a.

⁵À ŋá n'a a Ɩsɩrayɛl nɩbɛ ɩ põ a tẽw, mɛ̃ a lɛ a Sore na tɩ yel kʋ̀ a Moyiir a.

⁶Bibir kãw, Zuda dɔwlʋ nɩbɛ kãw tɩ wa na wa páw a Zozue a Gilgal. Kenaazɩ dɔwlʋ, Yefune bidɛb, Kalɛb, tɩ yel'ɩ a Zozue: «Fʋ mɩŋa za bãw nɩ a lɛ a Sore na yel kʋ̀ a Naaŋmɩn nɩr Moyiir, a ɩ̃ ƴãw nɩ a fʋ ƴãw a Kadɛsɩ-Barneya a.

⁷Ɩ̃ tɩ tɛr'ɩ yome lɩz'a ayi a lɛn daar a Sore tõ-tõ-bie Moyiir na tɩ tõ m, ɩ̃ yi a Kadɛsɩ-Barneya, ɛ́ cen tɩ piwri a tẽw a. Ɩ̃ na tɩ lɛb wa a, ɩ̃ tɩ man nɩ a yele kʋ̀ ʋ, nɩ ɩ̃ pʋɔ za.

⁸A ɩ̃ yɛbr na tɩ páw mɛ̃ cen a tɩ ɩ na a nɩbɛ kanyir baarɩ, ɛcɛ mãa a, a Sore ɩ̃ Naaŋmɩn n'ʋ ɩ̃ tɩ tu bɛ lɛb pùor ɛ.

⁹A ʋlɩ bibir a, a Moyiir tɩ pɔ n à ŋá: “Ɩ̃ pɔ na k'aa tẽw fʋ na cɔlɩ a na ɩ n a zie fʋ na so a, nɩ a zie a fʋ bibiir na na so kʋralɛ a, fʋ na tu a Sore fʋ Naaŋmɩn bɛ lɛb pùor a ƴãw.”

¹⁰Yome lɩz'a ayi nɩ anũu n'ɩ à ŋá a Sore na tɩ yel à à ŋá kʋ̀ a Moyiir a, a lɛn daar a Ɩsɩrayɛl nɩbɛ na tɩ tɔlɛ a wɛja-kpalɛ pʋɔ a. A lɛn daar za n'a a Sore gù a ɩ̃ nyɔ-vʋʋrʋ, mɛ̃ a lɛ ʋ na tɩ yel a, ɛ́ mãa n'ɩ ŋan tɛr yome lɩz'a anaar nɩ a anũu dɩ̃a.

¹¹Ɛcɛ ɩ̃ cãà na tɛr fãw a sɛw, mɛ̃ a lɛn daar a Moyiir na tɩ tõ m, k'ɩ̃ɩ tɩ piwri a tẽw a. A ɩ̃ ƴɛrɛŋa fãw cãà na ta a lɛn daar dem, a zɛbr ƴãw n'a bɩɩ ton kãw za ƴãw n'a a.

¹²A na ɩ à ŋá a, kʋ̀ m a tãw vuo ŋa, a Sore na tɩ ƴɛ̀r a ƴɛ̀rʋ a ʋlɩ bibir nɛ a, bʋ̃ʋ n'ʋ vɛ̃, fʋ mɩŋa za tɩ wõ n a ʋlɩ bibir nɛ, kɛ́ Anakɩ bʋʋrɛ nɛbɛ be a be, kpɩɛr tẽ-bɛrɛ nɩ tẽ-kpɛn kpɛn pʋɔ. A mɩnɛ kãw, a Sore na be n a ɩ̃ zie, ɩ̃ɩ na zɛb'a de a, mɛ̃ a lɛ a Sore na tɩ yel kʋ̀ m a.»

¹³A Zozue tɩ ƴɛ̀r'ɩ nɔ-vla kʋ̀ a Yefune bidɛb, Kalɛb, ɛ́ kʋ̀ ʋ a Ebrɔ̃ ʋ so ʋ.

¹⁴Alɛ n'a so a Kenaazɩ dɔwlʋ Yefune bidɛb, Kalɛb, páw a Ebrɔ̃, ʋ ɩ a zie ʋ na so a, cãà wa tɩ tɔ a dɩ̃a, ʋ na tɩ tu a Sore, a Ɩsɩrayɛl Naaŋmɩn, bɛ lɛb pùor a ƴãw.

¹⁵A Ebrɔ̃ yúor tɩ dãw na dɩ kɛ́ Kɩrɩyatɩ-Arba. A Anakɩ bʋʋrɛ pʋɔ nɩ-yúor za tɩ n'ɩ a Arba. Lɛ n'a a tẽw tɩ pɩ̃ɛnɩ nɩ a zɛbr.