Read Dagara, Northern Zozue 16 Bible Online

Zozue 16 - Dagara, Northern bible

Zozue 16

¹A zie bɛ na tɩ ŋmɛ a gbãw ír kʋ̀ a Zuzɛb bʋʋrɛ a, a tʋr-bɔw tɩ tĩ nɩ a Zurdɛ̃ na pɩɛlɩ a Zeriko a ƴãw, a bul-nʋɔr ʋl na kʋ̀rɛ a kʋ̃ɔ a tẽw a saa-pɛrɩ́. Ʋ tɩ yi n a Zeriko, ɛ́ tu tɔl a wɛja-kpalɛ pʋɔ do a Betɛl tan vuo pʋɔ.

²Ʋ tɩ yi n a be cere Luuzɩ lowr, ɛ́ tu tɔl Atarɔtɩ, a Arkitɩ mɩnɛ tẽ-kpɛ̃ɛ.

³Al pùorí, ʋ siwr a mʋ̃tɔ̃w-kpɛb-lowr, a Yafiletitɩ mɩnɛ vuo pʋɔ. Ʋʋ na wa tu tɔl a Bɛtɩ-Horon-le-Ba nɩ a Gezɛɛr a, ʋ cen na tɩ tɔ a Mediterane kʋ̃ɔ-kpɛ̃ɛ.

⁴À ŋá n'a a Zuzɛb bʋʋrɛ, a Manase nɩ a Efarayim dɔwlʋ, tɩ páw a bɛ zie.

⁵A Efarayim dɔwlʋ, mɛ̃ a lɛ a bɛ yie na ɩ a, tẽw tʋr-bɔw tɩ n'ɩ ŋa: a saa-pɛrɩ́ a, a zie bɛ na so a tʋr-bɔw tɩ yi n a Atɩrɔtɩ-Adaar tɩ tɔ a Bɛtɩ-Horon-le-Ho.

⁶A mʋ̃tɔ̃w-kpɛb-lowr a, a tʋr-bɔw tɩ cow na tɩ tɔ a Mikɩmetatɩ a saa-pɛrɩ́-gʋba-lowr, ɛ́ lɩɛbɩ a saa-pɛrɩ́ a Taanatɩ-Silo, zuo ʋ bɛr a saa-pɛrɩ́ a Yanoa lowr.

⁷Al pùorí, ʋ yi a Yanoa siwr Atarɔtɩ nɩ Naarata, cen tɩ nyɔw a Zeriko, ɛ́ cow cen tɩ tɔ a Zurdɛ̃.

⁸A tʋr-bɔw na tɩ yi a Tapuwa a tɩ cen nɩ a mʋ̃tɔ̃w-kpɛb-lowr tɩ tɔ a Kana fʋɔla, ɛ́ tɩ sãá a Mediterane kʋ̃ɔ-kpɛ̃ɛ. A Efarayim biir dɔwlʋ zie bɛ na tɩ so a, mɛ̃ a lɛ a bɛ yie na ɩ a, tɩ n'ɩ à ŋà,

⁹lãwnɩ a tẽ-bɛrɛ al nɩ a tẽli bɛ na tɩ kʋ̀ bɛ a Manase biir dɔwlʋ zie pʋɔ a.

¹⁰Ɛcɛ a Efarayim biir bɛ tɩ diw a Kanãa tẽw dem na tɩ kpɩɛr a Gezɛɛr a ɩ. Lɛ so a Kanãa tẽw dem cãà kpɩɛr a Efarayim nɩbɛ sɔgɔ nɩ dɩ̃a, ɛcɛ bɛlɛ tɩ so a gbãgba-tome.