Read Dagara, Northern Zozue 17 Bible Online

Zozue 17 - Dagara, Northern bible

Zozue 17

¹A Zuzɛb bidɛb-dãw Manase bʋʋrɛ mɩ̀ tɩ páw nɩ a bɛ zie. A Manase bidɛb-dãw, Makɩɩr, na ɩ a Galaadɩ sãà a tɩ páw nɩ a Galaadɩ tẽw nɩ a Basan, bʋ̃ʋ n'ʋ vɛ̃, ʋ tɩ ɩ n zɛbr-nɩr.

²Bɛ tɩ kʋ̀ n ziir a Manase dɔwlʋ ŋmãa al na cɛ a. A dɔwlʋ al tɩ n'ɩ a Aviezɛɛr, a Helɛkɩ, a Asiriyɛl, a Sekɛm, a Hefɛɛr nɩ Semida dɔwlʋ. Bɛ za tɩ ɩ n a Zuzɛb bidɛb Manase bʋʋrɛ.

³Hefɛɛr bidɛb Selofeadɩ, na ɩ a Galaadɩ yãw a, ɛ́ a Galaadɩ tɔr za ɩ Makɩɩr bidɛb nɩ Manase yãw a, bɛ tɩ dɔw dɛb ɛ, pɔwbɛ tɛwr'a ʋ tɩ dɔw. A bɛ yée n'ɩ á ŋá: Mala, Nowa, Hogɩla, Mɩlka nɩ Tɩrsa.

⁴Bɛ tɩ wa na wa páw a bàwr-maalɛ Eleazaar nɩ a Nun bidɛb Zozue nɩ a Ɩsɩrayɛl nɩbɛ nɩ-bɛrɛ yel bɛ à ŋá: «A Sore tɩ yel'ɩ a Moyiir k'ʋʋ kʋ̀ tɩ zie, ʋ ɩ a tɩ sób, mɛ̃ a tɩ dɔwlʋ pʋɔ dɛbr za a.» Bɛ tɩ kʋ̀ bɛ nɩ zie, ʋ ɩ a bɛ sób, mɛ̃ a bɛ dɔwlʋ pʋɔ dɛbr za a, a tu a lɛ a Sore na yel a.

⁵Lɛ n'a a Manase dɔwlʋ tɩ páw ziir pie, de nɩ a Galaadɩ nɩ a Basan na be a Zurdɛ̃ saa-pɛrɩ́ a.

⁶Bʋ̃ʋ n'ʋ vɛ̃, a Manase dɔwlʋ pɔwbɛ mɩ̀ tɩ páw nɩ zie, ʋ ɩ a bɛ sób a Manase dɔwlʋ dɛbr sɔgɔ, ɛcɛ a Manase bidɛbr na cɛ a tɩ so a Galaadɩ tẽw.

⁷A Manase tẽw tʋr-bɔw tɩ yi n a Asɛɛr, cen tɩ ta a Mikɩmetatɩ na tori a Sɩsɛm a. Ʋ tɩ tu n Yamin lowr, Yasɩvʋ lowr nɩ Ɛɩn-Tapuwa lowr.

⁸A Manase tɩ so a Tapuwa tẽw vuo, ɛcɛ a Tapuwa tẽw tɔr za a tʋr-bɔw ƴãw tɩ ɩ n Efarayim biir sób.

⁹A tʋr-bɔw tɩ cãà na siw tɩ tɔ a Kana fʋɔla saa-pɛrɩ́-dʋrʋ-lowr. Ɛcɛ a Efarayim biir tɩ so a tẽ-bɛrɛ al na be a fʋɔla saa-pɛrɩ́-dʋrʋ-lowr a, a tẽ-bɛrɛ á ŋá na saa tɩ be a Manase tẽw pʋɔ a. A Manase tẽw tʋr-bɔw tɩ tɔl'ɩ a fʋɔla saa-pɛrɩ́-gʋba-lowr, tɩ ta a Mediterane kʋ̃ɔ-kpɛ̃ɛ.

¹⁰A Efarayim dɔwlʋ zie tɩ be n a saa-pɛrɩ́-dʋrʋ-lowr, ɛ́ a Manase dem be a saa-pɛrɩ́-gʋba-lowr. A Mediterane kʋ̃ɔ-kpɛ̃ɛ tɩ n'ɩ a bɛ tʋr-bɔw a mʋ̃tɔ̃w-kpɛb-lowr. Bɛ tɩ tɔ n a Asɛɛr dɔwlʋ a saa-pɛrɩ́-gʋba-lowr, ɛ́ tɔ a Ɩsakaar dɔwlʋ a saa-pɛrɩ́.

¹¹A Ɩsakaar nɩ a Asɛɛr ten pʋɔ a, a Manase tɩ páw nɩ Bɛtɩ-Sean, Yivileam, Door, Ɛɩn-Door, Taanakɩ, a Megido nɩ a tẽ-kpɔwlɩ a pɛr lɛ kɛ́ a Door voru.

¹²Ɛcɛ a Manase biir bɛ tɩ tʋ̃ɔ́ zɛb de a tẽ-bɛrɛ á ŋá a Kanãa tẽw dem zie ɩ, lɛ so a Kanãa tẽw dem tɩ cãà kpɩɛr a tẽ-bɛrɛ á ŋá.

¹³A Ɩsɩrayɛl nɩbɛ na saa tɩ wa kpɛmɛ dɔwlɩ a, bɛ bɛ tɩ tʋ̃ɔ́ diw a Kanãa tẽw dem ɛ, bɛ tɩ ƴãw bɛ nɩ gbãgba-tome.

¹⁴A Zuzɛb bʋʋrɛ tɩ ƴɛ̀r'ɩ à ŋá a Zozue zie: «Bʋ̃ʋ n'ʋ so fʋ kʋ̀ tɩ zi-been, ʋ ɩ a tɩ sób, tɩɩm a Sore na maalɩ, ɩ tɩ yãwmɛ yaga yaga a?»

¹⁵A Zozue tɩ yel bɛ na: «Nyɩmɛ wa yãwmɛ sɛw à ŋá a Efarayim tãw vuo bɛ saalɛ nyɩ a, nyɩɩm cen tɩ pɛl zie a Perizitɩ mɩnɛ nɩ a Erefayitɩ mɩnɛ tuwr pʋɔ.»

¹⁶A Zuzɛb bʋʋrɛ tɩ yel ʋ na: «Sɩza n'a a tãw vuo bɛ saalɛ tɩ ɛ, ɛcɛ a Kanãa tẽw dem na kpɩɛr a zi-tɩ̃talɛ pʋɔ a, tɛr'ɩ kure zɛbr-torkori, a bɛl na be a Bɛtɩ-Sean tẽw nɩ a ʋ tẽ-kpɔwlɩ pʋɔ a, nɩ a bɛl na be a Izireyɛl zi-tɩ̃tal pʋɔ a.»

¹⁷Lɛ n'a a Zozue tɩ yel a Zuzɛb bʋʋrɛ — a Efarayim dɔwlʋ nɩ a Manase dɔwlʋ —: «Sɩza n'a, nyɩ yãwmɛ na, ɛ́ lɛb kpɛmɛ. Lɛ so nyɩ kʋ̃ tɛr zi-been yõ a tẽw pʋɔ ɩ:

¹⁸a tãw vuo na ɩ tuw ʋ za a na ɩ n a nyɩ sób. Nyɩ na pɛl ʋ na, ɛ́ so ʋ. Nyɩ na diw nɩ a Kanãa tẽw dem, bɛ na saa tɛr kure zɛbr-torkori, ɛ́ kpɛmɛ a.»