Read Dagara, Northern Zozue 24 Bible Online

Zozue 24 - Dagara, Northern bible

Zozue 24

¹A Zozue tɩ ɓã n a Ɩsɩrayɛl dɔwlʋ nɩbɛ za taa a Sɩsɛm, ɛ́ bʋɔlɩ a Ɩsɩrayɛl nɩbɛ nɩ-kore, a bɛ nɩ-bɛrɛ, a bɛ ƴɛ̀r-dɩrbɛ nɩ a bɛ sɛ-sɛbrbɛ: bɛ tɩ wa n a Naaŋmɩn niŋé.

²Lɛ n'a a Zozue tɩ yel a nɩbɛ za: «À ŋá n'a a Sore, a Ɩsɩrayɛl Naaŋmɩn, yere: “A Efaratɩ man gãw ŋa lowr'a a nyɩ sãàkʋm-kore tɩ dãw kpɩɛr, a Abraham nɩ a Nahɔɔr sãà, Tera, ɛ́ ŋmɩn-yoru n'a bɛ tɩ maalɛ.

³Ɩ̃ tɩ ƴãw nɩ a nyɩ sãàkʋm-kʋra Abraham yi a Efaratɩ gãwn, ɩ̃ɩ tɛr ʋ tɔl'ɩ a Kanãa tẽw za pʋɔ. Ɩ̃ tɩ kʋ̀ ʋ nɩ bʋʋrɛ yaga, ɛ́ kʋ̀ ʋ Ɩzaakɩ.

⁴Zakɔb nɩ Ezawu nɛbɛ ɩ̃ tɩ kʋ̀ a Ɩzaakɩ, ɛ́ kʋ̀ a Seyiir tãw vuo a Ezawu, ʋ so ʋ. Ɛcɛ Zakɔb nɩ a ʋ bibiir tɩ siw nɩ Eziptɩ tẽw.

⁵Al pùorí, ɩ̃ tɩ tõ n Moyiir nɩ Aarɔ̃, ɛ́ ƴãw bʋ̃-faar pɛ-bʋʋrɛ za a Eziptɩ tẽw, ɛ́ bãw ɩ a nyɩ nɩ-bʋʋrɛ yi a ʋ pʋɔ.

⁶Bɛ na tɩ yi a Eziptɩ tẽw baar'a, a nyɩ sãàkʋm-kore tɩ ta n a Bàa-kɛkɛɛ kʋ̃ɔ-kpɛ̃ɛ́. Ɛcɛ a Eziptɩ tẽw dem tɩ diw bɛ na tɩ sãá nɩ a be, nɩ zɛbr-torkori nɩ wi-zɔmnbɛ.

⁷Lɛ n'a a nyɩ sãàkʋm-kore tɩ kõ bʋɔlɩ mɛ̃ k'ɩ̃ɩ sõw bɛ, ɩ̃ ƴãw lige a nyɩ nɩ-bʋʋrɛ nɩ a Eziptɩ tẽw dem cara pʋɔ. Al pùorí, ɩ̃ ɩ a kʋ̃ɔ-kpɛ̃ɛ kʋ̃ɔnɩ lɛb wa pàw bɛ. Nyɩ mɩŋa za bãw nɩ a lɛ ɩ̃ na ɩ a Eziptɩ tẽw dem a! Al pùorí, a nyɩ nɩ-bʋʋrɛ tɩ kpɛ n a wɛja-kpalɛ pʋɔ cɛlɩ.

⁸Al pùorí, ɩ̃ tɩ tɛr nyɩ na cen nɩ a Amoritɩ mɩnɛ tẽw. A Zurdɛ̃ saa-pɛrɩ́ n'a bɛ tɩ kpɩɛr. Bɛ tɩ ìr'a zɛb'ɩ nyɩ, ɛcɛ ɩ̃ tɩ ɩ na nyɩ tʋ̃ɔ́ bɛ, zɛb de a bɛ tẽw, ɩ̃ na tɩ kʋ bɛ pàw pɛr a nyɩ niŋé a ƴãw.

⁹A Mowab tẽw nãà, Sɩpɔɔr bidɛb, Balakɩ, mɩ̀ tɩ zɛb'ɩ nyɩ na. Ʋ tɩ ƴãw na bɛ bʋɔlɩ Bewɔɔr bidɛb, Balaam, k'ʋʋ wa ŋmɛ ƴãw nyɩ.

¹⁰Ɛcɛ ɩ̃ tɩ zawr'a na bɛr wõ a Balaam, ʋ fɛr ƴɛ̀r nɔ-vla kʋ̀ nyɩ, ɩ̃ɩ faa nyɩ a Balakɩ nuru pʋɔ.

¹¹Nyɩ tɩ gãw nɩ a Zurdɛ̃, ɛ́ cen tɩ ta a Zeriko. A Zeriko tẽw nɩbɛ lãwnɩ a Amoritɩ nɩ a Perizitɩ mɩnɛ, a Kanãa tẽw dem, a Hititɩ, a Gɩrgasitɩ, a Hivitɩ nɩ a Zebizitɩ mɩnɛ tɩ zɛb'ɩ nyɩ na. Ɛcɛ ɩ̃ tɩ de nɩ bɛ za ƴãw a nyɩ nuru pʋɔ.

¹²Ɩ̃ tɩ ƴãw nɩ vurkperi de nyɩ niwn tɩ diw a Amoritɩ mɩnɛ na-mɩnɛ ayi bɛ zɔ. A nyɩ zɛbr-sɔ-bɛrɛ nɩ a nyɩ tamɛ bɛ tɩ n'a so ɩ.

¹³À ŋá n'a ɩ̃ tɩ kʋ̀ nyɩ tẽw nyɩ na bɛ tɩ kɔ wõ n tuo a, tẽ-bɛrɛ nyɩ na bɛ tɩ mɛ ɛ́ kpɩɛr a, divɛ̃ tɩɩr nɩ olivʋ tɩɩr nyɩ na bɛ tɩ sɛl ɛ́ dɩrɛ a wɔmɛ a.”»

¹⁴A Zozue tɩ yel'a ƴãw pʋɔ: «A na ɩ à ŋá a, nyɩ zɔrɛ a Sore, ɛ́ maalɛ ʋ nɩ nyɩ pʋɔ za, taa lɛbr pùor ɛ. Nyɩ lɔb a ŋmɩmɛ a nyɩ sãàkʋm-kore na tɩ maalɛ a Efaratɩ gãwn nɩ a Eziptɩ tẽw a bɛr, ɛ́ maalɛ a Sore.

¹⁵Ɛcɛ nyɩmɛ bɛ wa bɔbr kɛ́ nyɩ maalɛ a Sore a, nyɩɩm kaa ír a dɩ̃a sob nɛ nyɩ na bɔbr kɛ́ nyɩ maalɛ a: a ŋmɩmɛ al a nyɩ sãà mɩnɛ na maalɩ a Efaratɩ gãwn a n'a bɩɩ a Amoritɩ mɩnɛ sɔgɔ nyɩ na kpɩɛr a ŋmɩmɛ n'a. Mãa nɩ a ɩ̃ yir dem a, a Sore n'ʋ tɩ na maalɛ.»

¹⁶A Ɩsɩrayɛl nɩbɛ tɩ sɔw na: «Tɩ bɛr a Sore, ɛ́ maalɛ ŋmɩn-yoru yaa! Yel-faa na bɛ maal'ɩ wob a n'ʋ!

¹⁷Bʋ̃ʋ n'ʋ vɛ̃, a Sore n'ɩ a tɩ Naaŋmɩn, ʋlɛ n'ʋ faa a tɩ sãàkʋm-kore nɩ a tɩɩm za, a Eziptɩ tẽw gbãgbaalʋ pʋɔ. Ʋ maal'ɩ nɔ-ɓãa-yele tɩ nyɛ̃ nɩ mimir. Ʋlɛ n'ʋ piw tɩ tɛr a sɔ́r wogo tɩ na cen a zu, nɩ a nɩ-bʋʋr-yoru za ten pʋɔ tɩ na kpɛ tɔl a.

¹⁸A Sore n'ʋ diw a nɩ-bʋʋr-yoru za bɛr a tɩ niŋé, baa zuo a za a Amoritɩ mɩnɛ na tɩ kpɩɛr a tẽw ŋa a. A tɩɩm mɩ̀ a, tɩ na maalɛ nɩ a Sore, bʋ̃ʋ n'ʋ vɛ̃, ʋlɛ n'ɩ a tɩ Naaŋmɩn.»

¹⁹Lɛ n'a a Zozue tɩ yel a Ɩsɩrayɛl nɩbɛ: «Nyɩ kʋ̃ tʋ̃ɔ́ maalɛ a Sore ɩ, bʋ̃ʋ n'ʋ vɛ̃, Naaŋmɩn na ɩ sõw a n'ʋ, Naaŋmɩn na bɛ sàwr nyɩ maalɛ ŋmɩn-yoru a n'ʋ, nyɩmɛ wa zawr'ʋ bɛr a, nɩ nyɩmɛ wa maalɩ yel-bier a, ʋ bɛ bɛrɛ nyɩ ɛ.

²⁰Nyɩmɛ wa zawrɩ a Sore bɛr, ɛ́ maalɛ ŋmɩn-yoru a, ʋ na ìr'ɩ a nyɩ ƴãw, ʋ na maalɩ nyɩ nɩ faa, ɛ́ kʋ nyɩ pàw pɛr, ʋl na tɩ dãw maalɩ nyɩ vla a.»

²¹A Ɩsɩrayɛl nɩ-bʋʋrɛ tɩ yel'ɩ a Zozue: «Ʋ̃ʋ'hʋ̃, a Sore n'ʋ tɩ na maalɛ.»

²²A Zozue lɛb yel bɛ: «Nyɩ ɩ n a nyɩ mɩŋa dãsɩɛ dem, kɛ́ nyɩ kaa na ír kɛ́ nyɩ na maalɛ nɩ a Sore.» Bɛ tɩ sɔw na: «Ʋ̃ʋ, tɩ ɩ n a dãsɩɛ dem.»

²³Lɛ n'a a Zozue tɩ yel à ŋá: «Alɛ wa ɩ à ŋá a, nyɩ lɔb a ŋmɩn-yoru al na be a nyɩ zie a bɛr, ɛ́ tu a Sore, a Ɩsɩrayɛl Naaŋmɩn, nɩ nyɩ pʋɔ za.»

²⁴A Ɩsɩrayɛl nɩbɛ tɩ sɔw nɩ a Zozue: «Tɩ na maalɛ nɩ a Sore tɩ Naaŋmɩn, ɛ́ bɛrɛ wone a ʋ ƴɛ̀rʋ.»

²⁵A Zozue tɩ maal'ɩ nɩ a Ɩsɩrayɛl bʋʋrɛ wõ-taa a ʋlɩ bibir nɛ a Sɩsɛm. Ʋ tɩ ƴãw nɩ nɛ́ɛ nɩ tub kʋ̀ bɛ, ɛ́ wul bɛ a lɛ a na sɛw kɛ́ bɛ tuur a,

²⁶ɛ́ sɛb a za ƴãw a Naaŋmɩn wulu sɛbɛ pʋɔ. Al pùorí, ʋ tɩ ɓáw nɩ kʋsɛ-kpɛ̃ɛ teli a sɛn tɩɛ pile be, a Sore zi-sõw pʋɔ.

²⁷Al pùorí, a Zozue tɩ yel'ɩ a Ɩsɩrayɛl nɩbɛ za: «Nyɩ jɩ́r a kʋsɩɛr ŋa vla, ʋ na ɩ n dãsɩɛ bom a tɩ ƴãw, bʋ̃ʋ n'ʋ vɛ̃, ʋ wõ n a ƴɛ̀rʋ al za a Sore na ƴɛ̀r kʋ̀ tɩ a. Sɩza, ʋ na ɩ n dãsɩɛ bom a nyɩ ƴãw, kɛ́ nyɩ taa zawrɛ a Sore nyɩ Naaŋmɩn bɛrɛ ɩ.»

²⁸A Zozue tɩ bɛr'ɩ a Ɩsɩrayɛl nɩbɛ, ŋa za mɩ́ tɩ lɛb kul a ʋ zi-sóra pʋɔ.

²⁹A yele á ŋá pùorí a, a Sore tõ-tõ-bie, Zozue, a Nun bidɛb, tɩ kpi na. Ʋ tɩ tɛr'ɩ yome kʋba nɩ pie (110).

³⁰Bɛ tɩ ũù ʋ nɩ a zie ʋ na so a pʋɔ, a Tɩmɩnatɩ-Sera, a Efarayim tan vuo pʋɔ, a Gaasɩ tãw saa-pɛrɩ́-gʋba-lowr.

³¹A Ɩsɩrayɛl nɩbɛ tɩ maal'ɩ a Sore, a Zozue cãafʋ daar za, nɩ a nɩ-kore na vʋʋrɩ a Zozue pùorí a cãafʋ daar za, bɛl na tɩ bãw a tome al za a Sore na tɩ tõ a Ɩsɩrayɛl ƴãw a.

³²A Ɩsɩrayɛl nɩbɛ tɩ ũù nɩ a Zuzɛb kɔbɛ bɛ na tɩ yi n a Eziptɩ tẽw wa n a, a Sɩsɛm. Bɛ tɩ ũù a nɩ a zie ʋl a Zakɔb na tɩ da n salm-pla libie kʋba (100) a Hamɔɔr bibiir zie, ʋʋ lɩɛbɩ a Zuzɛb bibiir sób a. A Hamɔɔr'ʋ tɩ mɛ a Sɩsɛm tẽw.

³³A Aarɔ̃ bidɛb, Eleazaar, mɩ̀ tɩ kpi na, bɛ ũù ʋ a tãw ʋl bɛ na tɩ kʋ̀ a ʋ bidɛb Pɩnasɩ a zu, a Efarayim tan vuo pʋɔ.