Read Dagara, Northern Zozue 3 Bible Online

Zozue 3 - Dagara, Northern bible

Zozue 3

¹A bio daarɩ́ biɓaar-pipi a, a Zozue nɩ a Ɩsɩrayɛl nɩbɛ za tɩ yi n a Sitim, ɛ́ siw a Zurdɛ̃ nʋɔr. Bɛ tɩ gã nɩ a be vɩɛ a zie ìr, ɛ́ bãw gãw.

²Bibie ata pùorí, a nɩbɛ nɩ-bɛrɛ tɩ cɔlɩ nɩ a laɩ

³yel a nɩbɛ à ŋá: «Nyɩmɛ wa nyɛrɛ a levitɩ mɩnɛ bɛl na ɩ bàwr-maalbɛ[2] a bɛ tuo a Sore nyɩ Naaŋmɩn wõ-taa daga cere nɩ a, a lɛn daar a, nyɩɩm yi a zie ʋl nyɩ na be a, ɛ́ ìr tuur bɛ.

⁴Lɛ n'a nyɩ na bãw a sɔ́r ʋl a na fɛr kɛ́ nyɩ tu a, bʋ̃ʋ n'ʋ vɛ̃, nyɩ bɛ dãw tu tɔl a ka ɩ. Ɛcɛ nyɩ taa pɩɛlɛ a wõ-taa daga ɩ, nyɩ bɛr kilo[3] been nyɩɩm nɩ a daga cará.»

⁵Al pùorí, a Zozue tɩ yel'ɩ a nɩbɛ: «Nyɩ so a nyɩ dɛwr bɛr, bʋ̃ʋ n'ʋ vɛ̃, bio a, a Sore na maal'ɩ nɔ-ɓãa-yele a nyɩ sɔgɔ.»

⁶A Zozue tɩ yel'ɩ a bàwr-maalbɛ: «Nyɩ tuo a wõ-taa daga tɔl de nɩ a nɩbɛ niwn.» Bɛ tɩ tuo nɩ a wõ-taa daga tɔl de nɩ a nɩbɛ niwn.

⁷A Sore tɩ yel'ɩ a Zozue à ŋá: «A dɩ̃a a, ɩ̃ na tĩ na zɛwr fʋ a Ɩsɩrayɛl nɩbɛ za niŋé, kɛ̀ bɛ bãw k'ɩ̃ɩ na be n a fʋ zie, mɛ̃ a lɛ ɩ̃ na tɩ be a Moyiir zie a.

⁸Fʋ̃ʋ a, fʋ na yel'ɩ à ŋá kʋ̀ a bàwr-maalbɛ na tuo a wõ-taa daga a: “Nyɩmɛ wa kpɩɛr a Zurdɛ̃ kʋ̃ɔ pʋɔ lɛ pɛ a, nyɩɩm tɛw àr.”»

⁹Lɛ n'a a Zozue tɩ yel a Ɩsɩrayɛl nɩbɛ: «Nyɩ taw pɩɛlɩ a ka, ɛ́ bɛr wõ a lɛ a Sore nyɩ Naaŋmɩn na yere a.

¹⁰Al pùorí, ʋ tɩ yel'a: À ŋá n'a nyɩ na bãw k'aa Naaŋmɩn na vʋʋrɛ a be n a nyɩ sɔgɔ, nɩ k'ʋʋ na diw nɩ a Kanãa tẽw dem bɛr a nyɩ niŋé, lãwnɩ a Hititɩ mɩnɛ, a Hivitɩ mɩnɛ, a Perizitɩ mɩnɛ, a Gɩrgasitɩ, a Amoritɩ nɩ a Zebizitɩ mɩnɛ.

¹¹A tẽ-daa za Sore wõ-taa daga n'ɩ ŋan na na gãw a Zurdɛ̃ a nyɩ niŋé a.

¹²Ƴɛrɛŋa a, nyɩ kaa ír dɛbr pie nɩ ayi a Ɩsɩrayɛl dɔwlʋ pʋɔ, dɔwlʋ za pʋɔ dɛb-been.

¹³A bàwr-maalbɛ na tuo a tẽ-daa za Sore wõ-taa daga a, gbɛnaɓɛl wa tʋɔr a Zurdɛ̃ kʋ̃ɔnɩ wa báarɛ a, a kʋ̃ɔnɩ na yi a man saa-zu siwr a na ŋmãa na, a na ɓã n taa àr mɛ̃ bɩwfʋ n'a bɛ bɩw a.»

¹⁴A Ɩsɩrayɛl nɩbɛ na tɩ yi a bɛ pɛnɛ-sɛwr pʋɔ kɛ́ bɛ gãw a Zurdɛ̃ a, a bàwr-maalbɛ na tuo a wõ-taa daga a, tɩ de bɛ nɩ niwn.

¹⁵A bʋ̃-dieri-deb daar tɩ n'a, a lɛn daar a Zurdɛ̃ man kʋ̃ɔ na mɩ́ paalɩ yi nɛ́ɛ a. A bàwr-maalbɛ na tuo a wõ-taa daga a na tɩ ta a Zurdɛ̃ manɩ́ a, a bɛ gbɛnaɓɛlɛ na dɛ wa tʋɔr a man nʋɔr kʋ̃ɔ a,

¹⁶a kʋ̃ɔnɩ na yi a man saa-zu zɔrɛ siwr a tɩ tɛw na àr mɛ̃ bɩwfʋ n'a bɛ bɩw a a, a tɩ tɛw na àr zãá yaga tɩ ta Adam[4] tẽ-kpɛ̃ɛ na pɩɛlɩ a Sartan a, ɛ́ a kʋ̃ɔnɩ al na zɔrɛ siwr a Araba kʋ̃ɔ-kpɛ̃ɛ lowr a, a Nyaarʋ kʋ̃ɔ-kpɛ̃ɛ, a tɩ zɔ n a za, ɛ́ a Ɩsɩrayɛl nɩbɛ tɔl gãw tori a Zeriko.

¹⁷A bàwr-maalbɛ na tuo a Sore wõ-taa daga a tɩ tɛw na àr a Zurdɛ̃ bà-dĩo na ko ʋ za a pʋɔ, ɛ́ a Ɩsɩrayɛl nɩbɛ tɔlɛ gãwnɛ nɩ gbɛ-kon. A bàwr-maalbɛ tɩ àr'a, ɛ́ gù a nɩbɛ za tɩ gãw a Zurdɛ̃.