Read Dagara, Northern Zozue 4 Bible Online

Zozue 4 - Dagara, Northern bible

Zozue 4

¹A Ɩsɩrayɛl nɩbɛ za na wa gãw a Zurdɛ̃ baar'a, a Sore yel'ɩ a Zozue à ŋá:

²«Nyɩ kaa ír dɛbr pie nɩ ayi a Ɩsɩrayɛl nɩbɛ pʋɔ, dɔwlʋ za pʋɔ dɛb been,

³ɛ́ yel bɛ: “A Zurdɛ̃ sɔwlɩsɔw ka, a be a bàwr-maalbɛ na tɛw àr a, nyɩ de kʋsɛbɛ pie nɩ ayi, tɔl gãw nɩ tɩ bin a be nyɩ na na gã vɩɛ a zie a.”»

⁴A Zozue tɩ bʋɔl'ɩ a dɛbr pie nɩ ayi bɛl ʋ na tɩ kaa ír a Ɩsɩrayɛl nɩbɛ pʋɔ, dɔwlʋ za pʋɔ dɛb been a,

⁵wa yel bɛ: «Nyɩ tɔl a Sore nyɩ Naaŋmɩn wõ-taa daga niŋé, kpɛ a Zurdɛ̃ sɔwlɩsɔw, ŋa za mɩ́ tɩ ɓáw kʋsɩɛr tuo a ʋ bawŋman zu, k'aa Ɩsɩrayɛl dɔwlʋ za mɩ́ tɛr kʋsɛ-been,

⁶a ɩ bãwfʋ a nyɩ sɔgɔ. Nɩdaar kãw a nyɩ bibiir wa sowre nyɩ: “A kʋsɛbɛ á ŋá pɛr'ɩ bo a nyɩ zie?”,

⁷nyɩ na sɔw bɛ na: “A lɛn daar a Sore wõ-taa daga na tɩ tɔl a Zurdɛ̃ pʋɔ a, a Zurdɛ̃ kʋ̃ɔnɩ ŋmãa nɩ a ʋ niŋé! Sɩza, a Zurdɛ̃ kʋ̃ɔnɩ tɩ ŋmãa na. A kʋsɛbɛ á ŋá n'a ɩ a Ɩsɩrayɛl nɩbɛ mɩ́ cãà bãwnɩ a yel ŋa kʋralɛ.”»

⁸Lɛ n'a a Ɩsɩrayɛl nɩbɛ tɩ ɩ a lɛ a Zozue na tɩ yel kʋ̀ bɛ a. Bɛ tɩ ɓáw nɩ kʋsɛbɛ pie nɩ ayi a Zurdɛ̃ sɔwlɩsɔw, kʋsɛ-been a Ɩsɩrayɛl nɩbɛ dɔwlʋ za ƴãw, mɛ̃ a lɛ a Sore na tɩ yel kʋ̀ a Zozue a. Bɛ tɩ tuo a na tɩ bin a be bɛ na gã vɩɛ a zie a.

⁹A Zozue mɩ̀ tɩ ƴãw na bɛ wob kʋsɛbɛ pie nɩ ayi teli a Zurdɛ̃ sɔwlɩsɔw, a be a bàwr-maalbɛ na tɩ tuo a wõ-taa daga a, na tɩ tɛw àr a. A kʋsɛbɛ al cãà na nɩ dɩ̃a.

¹⁰A bàwr-maalbɛ na tɩ tuo a wõ-taa daga a tɩ tɛw na àr a Zurdɛ̃ sɔwlɩsɔw, ɛ́ gù a Sore ƴɛ̀rʋ ʋ na tɩ yel kʋ̀ a Zozue k'ʋʋ yel kʋ̀ a Ɩsɩrayɛl nɩbɛ a, tɩ tu ʋ za. À ŋá n'a a tu a lɛ za a Moyiir na tɩ yel kʋ̀ a Zozue a. A nɩbɛ tɩ páw nɩ fɔ̃w gãw a man,

¹¹ɛ́ bɛ za na wa gãw baar'a, a bàwr-maalbɛ tɩ tɔl a de bɛ niwn nɩ a wõ-taa daga.

¹²A Urubɛn dɔwlʋ zɛbr-nɩbɛ nɩ a Gadɩ dɔwlʋ zɛbr-nɩbɛ nɩ a Manase dɔwlʋ ŋmãa zɛbr-nɩbɛ nɛbɛ tɩ de niwn gãw a Ɩsɩrayɛl nɩbɛ za ƴãw, mɛ̃ a lɛ a Moyiir na tɩ yel a.

¹³Dɛbr tùr-lɩz'a ayi (40 000) na cɔbrɩ gù a zɛbr a nɛbɛ tɩ gãw a Zurdɛ̃ a Sore niŋé, tu a Zeriko zi-tɩ̃tal lowr.

¹⁴A ʋlɩ bibir nɛ a, a Sore tɩ zɛw nɩ a Zozue a Ɩsɩrayɛl nɩbɛ za niŋé, ɛ́ bɛ tɩ zɔrɛ ʋ na a ʋ nyɔ-vʋʋrʋ daar za, mɛ̃ a lɛ bɛ na tɩ zɔ a Moyiir a.

¹⁵Lɛ n'a a Sore tɩ yel a Zozue:

¹⁶«Yel a bàwr-maalbɛ na tuo a wõ-taa kʋsɛ-pamɛ daga a, kɛ́ bɛ yi a Zurdɛ̃ pʋɔ.»

¹⁷A Zozue tɩ yel'ɩ a bàwr-maalbɛ: «Nyɩ yi a Zurdɛ̃ pʋɔ.»

¹⁸Zɩ̃ k'aa bàwr-maalbɛ na tɩ tuo a Sore wõ-taa daga na tɩ yire a Zurdɛ̃ sɔwlɩsɔw a, a bɛ gbɛnaɓɛl na dɛ wa tʋɔr a tẽsɔw-kõw a, a Zurdɛ̃ kʋ̃ɔnɩ tɩ lɛb'a zɔrɛ, ɛ́ yi paalɩ a man nɛ́ɛ mɛ̃ a dãwdãw a.

¹⁹A cuw dãw-niwn sob bibie pie sob'a a Ɩsɩrayɛl nɩbɛ tɩ gãw a Zurdɛ̃. Bɛ tɩ maal'ɩ a bɛ laɩ Gilgal, a Zeriko saa-pɛrɩ́.

²⁰A Gilgal'a a Zozue tɩ ƴãw bɛ teli a kʋsɛbɛ pie nɩ ayi al bɛ na tɩ ɓáw a Zurdɛ̃ pʋɔ a.

²¹Al pùorí, ʋ tɩ yel'ɩ a Ɩsɩrayɛl nɩbɛ: «Nɩdaar kãw a nyɩ bibiir wa sowre nyɩ: “A kʋsɛbɛ á ŋá pɛr'ɩ bo”,

²²nyɩɩm manɩ a pɛr kʋ̀ bɛ yel à ŋá: “A Ɩsɩrayɛl nɩbɛ gãw nɩ a Zurdɛ̃ nɩ gbɛ-kon.

²³Bʋ̃ʋ n'ʋ vɛ̃, a Sore nyɩ Naaŋmɩn ɩ na a Zurdɛ̃ man kʋ̃ɔ sɩr, kɛ́ nyɩ tʋ̃ɔ́ gãw, mɛ̃ a lɛ tɔr za ʋ na tɩ ɩ a Bàa-kɛkɛɛ kʋ̃ɔ-kpɛ̃ɛ sɩr a tɩ ƴãw a.

²⁴Ʋ ɩ n à à ŋá, k'aa tẽ-daa nɩ-bʋʋrɛ za nyɛ̃ a lɛ a Sore kpɛnʋ na ɩ kpɛ̃ɛ a, nɩ kɛ́ nyɩ zɔrɛ a Sore nyɩ Naaŋmɩn bibie za.”»