Read Dagara, Northern Zozue 5 Bible Online

Zozue 5 - Dagara, Northern bible

Zozue 5

¹A Amoritɩ mɩnɛ na-mɩnɛ za na tɩ kpɩɛr a Zurdɛ̃ mʋ̃tɔ̃w-kpɛb-lowr a, nɩ a Kanãa tẽw dem na-mɩnɛ na tɩ kpɩɛr a Mediterane kʋ̃ɔ-kpɛ̃ɛ nʋɔr a, tɩ wõ na k'aa Sore ɩ na a Zurdɛ̃ kʋ̃ɔ sɩr, a Ɩsɩrayɛl nɩbɛ tʋ̃ɔ́ gãw. Lɛ n'a bɛ tɩ kpi zɩ̃, ɛ́ bɛ lɛb tɩ sàw na bà gbɛ́r a Ɩsɩrayɛl nɩbɛ niŋé ɩ.

²A lɛn daar, a Sore tɩ yel'ɩ a Zozue à ŋá: «Maalɩ kʋsɛ-pɛlɛ sɔ̀rʋ ŋma n a Ɩsɩrayɛl nɩbɛ na bɩɛrɩ dɔw a yɛɛ.»

³A Zozue tɩ maal'ɩ a kʋsɛ-pɛlɛ sɔ̀rʋ ŋma n a Ɩsɩrayɛl nɩbɛ yɛɛ, a tãw ʋl bɛ na bʋɔlɛ a Yɔ-gamɛ tãw a zu.

⁴A Ɩsɩrayɛl nɩbɛ na tɩ yi a Eziptɩ tẽw a, a dɛbr bɛl za na tɩ ta a zɛbr a, tɩ ŋma n yɛɛ, ɛcɛ bɛ kpi n a wɛja-kpalɛ pʋɔ. Ɛcɛ a dɛbli bɛl na dɔw a sɔ́r zu, a wɛja-kpalɛ pʋɔ a, a bɛl yɛɛ bɛ tɩ ŋma ɩ, alɛ n'a so a tɩ fɛr k'aa Zozue ŋma bɛ a yɛɛ.

⁶A Ɩsɩrayɛl nɩbɛ tɩ cen nɩ a wɛja-kpalɛ pʋɔ yome lɩz'a ayi. A yome lɩz'a ayi á ŋá na wa tɔl a, a dɛbr bɛl za na tɩ ta a zɛbr a Eziptɩ tẽw yib daar a tɩ kpi n bɛ za, bɛ na tɩ zawrɩ a Sore nʋɔr a zũú. Lɛ n'a a Sore tɩ pɔ k'ʋʋ kʋ̃ bɛr bɛ bɛ nyɛ̃ a tẽw ʋl ʋ na tɩ yel kʋ̀ a tɩ sãàkʋm-kore, k'ʋʋ na kʋ̀ tɩ na a ɩ, tẽw bʋ̀rʋ nɩ sɩwr na gbɔlɛ a.

⁷A bɛ bidɛbr nɛbɛ a Sore ƴãw bɛ lɩɛrɩ bɛ kpɛ, ɛ́ bɛlɛ nɛbɛ a Zozue ŋma a yɛɛ, bɛ na bɛ tɩ ŋma bɛ a yɛɛ a sɔ́r zu a ƴãw.

⁸A bɛ za yɛɛ na wa ŋma baar'a, bɛ be n a laɩ pʋɔ tɩ sanɩ baarɩ.

⁹Al pùorí, a Sore tɩ yel'ɩ a Zozue à ŋá: «Dɩ̃a a, ɩ̃ ír'ɩ a Eziptɩ tẽw vĩ bɛr nyɩ.» Alɛ n'a so bɛ por a zie nɛ kɛ́ Gilgal[5], a yúor ŋa n'ʋ ʋ cãà tɛr wa tɔ a dɩ̃a.

¹⁰A Ɩsɩrayɛl nɩbɛ tɩ kpɩɛr'ɩ a bɛ laɩ pʋɔ a Gilgal, ɛ́ maalɩ a Tɔl-gãw cuw, a cuw bibie pie nɩ anaar sob, a zaanʋɔra, a Zeriko zi-tɩ̃tal pʋɔ.

¹¹A bio daarɩ́ a, bɛ tɩ dɩ n a tẽw bome, dipɛ̃ na bɛ ƴãw dãbɩl a nɩ bʋ̃-bi-sɩ̃ɛnɩ a ʋlɩ bibir nɛ tɔr za.

¹²Bɛ na wa dɩ a tẽw bʋ̃-dɩrɩ dãw bio a, a mãan bɛ tɩ cãà lore ɩ. Mãan bɛ lɛb tɩ lo a Ɩsɩrayɛl nɩbɛ ƴãw ɛ, bɛ tɩ dɩrɛ nɩ a Kanãa tẽw bome a ʋlɩ yũon nɛ.

¹³Bibir kãw, a Zozue na tɩ pɩɛl'ɩ a Zeriko a, ʋ tɩ zɛw nɩ zu nyɛ̃ nɩr ʋ àr a ʋ niŋé, ƴãw zɛbr-sɔ-kpɛ̃ɛ na vʋ̃ɔ a, a nũú. A Zozue tɩ cen nɩ a ʋ zie tɩ sowr'ʋ: «Tɩ zie n'a fʋ pʋɔ bɩɩ a tɩ dɔ̃ dem zie n'a?»

¹⁴Ʋ tɩ sɔw na: «Ʋ̃ʋ'hʋ̃, ɩ̃ bɛ pʋɔ zie za ɩ. Mãa n'ɩ a Sore zɛbr-nɩbɛ nɩ-kpɛ̃ɛ, ɛ́ a tab'a ɩ̃ cãà tarɛ.» Lɛ n'a a Zozue tɩ lo vɔblɩ muru ɛ́ yel ʋ: «A fʋ tõ-tõ-bie nɛ m, bʋ̃ʋ n'ʋ fʋ yel k'ɩ̃ɩ ɩ?»

¹⁵A Sore zɛbr-nɩbɛ nɩ-kpɛ̃ɛ tɩ yel'ɩ a Zozue: «Fowri a fʋ nafawr[6], bʋ̃ʋ n'ʋ vɛ̃, zi-sõw pʋɔ n'a fʋ be.» Ɛ́ a Zozue tɩ ɩ a lɛ.