Read Dagara, Northern Zozue 8 Bible Online

Zozue 8 - Dagara, Northern bible

Zozue 8

¹A Sore tɩ yel'ɩ a Zozue à ŋá: «Ta zɔrɛ dɛ̃bɩ̃ɛ ɩ, ɛ́ ta sàw a yele tʋ̃ɔ́ fʋ ɛ. Tɛr a fʋ zɛbr-nɩbɛ za cen tɩ zɛb'ɩ a Aɩ. Nyɛ̃, ɩ̃ ƴãwnɛ nɩ a Aɩ tẽw nãà a fʋ nũú, nɩ a ʋ nɩ-bʋʋrɛ nɩ a tẽ-kpɛ̃ɛ ʋ na kpɩɛr a nɩ a ʋ tẽw za.

²Fʋ na ɩ n a Aɩ tẽw nɩ a ʋ nãà mɛ̃ a lɛ fʋ na ɩ a Zeriko tẽw nɩ a ʋ nãà a. Ɛcɛ nyɩ na tʋ̃ɔ́ na de a tẽw bome nɩ a dʋn a ɩ zɛbr bome nyɩ na zɛb de a. Ƴãw nɩbɛ bɛ tɩ sɔwlɩ a tẽw pùorí, wa ùr yi a ʋ ƴãw.»

³Lɛ n'a a Zozue tɩ cɔbrɩ k'ʋʋ cen tɩ zɛb'ɩ a Aɩ, ʋlɛ nɩ a ʋ zɛbr-nɩbɛ za. Ʋ tɩ kaa na ír nɩbɛ tùr-lɩzɛr'ɩ pie (30 000), dɛbr na na tʋ̃ɔ́ a zɛbr zɛb a, tõ bɛ tɩ̃ɩsɔw.

⁴Ʋ tɩ yel bɛ na: «Nyɩ cen tɩ sɔwlɩ a tẽw pùorí, ta zãá ɩ, ɛ́ cɔbrɩ nyɩ za gù.

⁵Mãa nɩ a ɩ̃ nɩbɛ na tawr'a pɩɛlɛ a Aɩ. A Aɩ tẽw dem wa yi tuori tɩ a, tɩ na lɩɛb'a zɔrɛ, mɛ̃ a dãw-niwn sob a.

⁶Bɛ na ta na tu tɩ, ɛ́ tɩ na bɛlɩ bɛ na zãá nɩ a tẽw. Bʋ̃ʋ n'ʋ vɛ̃, bɛ na tɩɛrɛ na yere: “Bɛ lɩɛb'a zɔrɛ a tɩ niŋé, mɛ̃ a dãw-niwn sob a”.

⁷A lɛn daar a, nyɩ na ƴaw na yi a nyɩ sɔwlʋ zie, kpɛ de a tẽw, bʋ̃ʋ n'ʋ vɛ̃, a Sore nyɩ Naaŋmɩn de ʋ na ƴãw a nyɩ nuru pʋɔ.

⁸Nyɩmɛ wa de a tẽw a, nyɩ na ƴãw ʋ nɩ vũu, mɛ̃ a lɛ a Sore na yel a. Nyɩ tuur a lɛ ɩ̃ na yel a vla.»

⁹A Zozue tɩ tõ bɛ na bɛ cen a sɔwlʋ zie. Bɛ tɩ be n a Aɩ mʋ̃tɔ̃w-kpɛb-lowr, a Betɛl nɩ a Aɩ cará. A Zozue tɩ gã nɩ a zɛbr-nɩbɛ ŋmãa sɔgɔ a ʋlɩ tɩ̃ɩsɔw nɛ.

¹⁰A bio daarɩ́ biɓaar-pipi a, a Zozue tɩ bɛl bɛl'ɩ a zɛbr-nɩbɛ kaa, ɛ́ ʋlɛ nɩ a Ɩsɩrayɛl nɩbɛ nɩ-kore de bɛ niwn, kɛ́ bɛ tɩ zɛb'ɩ a Aɩ tẽw.

¹¹Ʋlɛ nɩ a sojarɩ za tɩ cen na tɩ ta a Aɩ niŋé. Bɛ tɩ be n a Aɩ saa-pɛrɩ́-gʋba-lowr. Fʋɔla kãw tɩ be n bɛlɛ nɩ a tẽw cará.

¹²A Zozue tɩ kaa na ír ta nɩbɛ túr-anũu (5 000), ƴãw bɛ sɔwlɩ a tẽw mʋ̃tɔ̃w-kpɛb-lowr, a Betɛl nɩ a Aɩ cará.

¹³A zɛbr-nɩbɛ tɩ maal'ɩ a bɛ laɩ a tẽw saa-pɛrɩ́-gʋba-lowr, ɛ́ a bɛ zɛbr-nɩbɛ po-pàwrbɛ be a tẽw mʋ̃tɔ̃w-kpɛb-lowr. A Zozue tɩ gã nɩ a fʋɔla pʋɔ a ʋlɩ tɩ̃ɩsɔw nɛ.

¹⁴A biɓaara a, a Aɩ tẽw nãà na tɩ nyɛ̃ a Ɩsɩrayɛl nɩbɛ a, ʋlɛ nɩ a ʋ sojarɩ za tɩ yi n fɔ̃wlɛ kɛ́ bɛ tɩ zɛb'ɩ a Ɩsɩrayɛl, a be bɛ na tɩ zɛb a dãw-niwn sob a, a Zurdɛ̃ bà-fʋɔla lowr. Ɛcɛ ʋ bɛ tɩ bãw kɛ́ nɩbɛ sɔwl'ɩ a ʋ ƴãw, a tẽw pùorí ɛ.

¹⁵A Zozue nɩ a Ɩsɩrayɛl nɩbɛ za tɩ bɛr'a bɛ tʋ̃ɔ́ bɛ, ɛ̀ bɛ lɩɛb zɔ tu a wɛja-kpalɛ lowr.

¹⁶Bɛ tɩ yel'ɩ a Aɩ tẽw nɩbɛ za kɛ́ bɛ diwr bɛ. Lɛ n'a bɛ tɩ ta tu a Zozue mɩnɛ, bɛ tɛr bɛ zãá nɩ a tẽw.

¹⁷A Aɩ nɩ a Betɛl ten pʋɔ a, nɩr bɛ tɩ cɛ bɛ ta tu a Ɩsɩrayɛl nɩbɛ ɩ, bɛ tɩ yuo nɩ a tẽw bɛr ɛ́ diwr a Ɩsɩrayɛl nɩbɛ.

¹⁸A Sore tɩ yel'ɩ a Zozue à ŋá: «Tùr a kafin fʋ na ƴãw a nũú a cɔw a Aɩ lowr, bʋ̃ʋ n'ʋ vɛ̃, ɩ̃ ƴãwnɛ nɩ a tẽw a fʋ nũú.» A Zozue tɩ tur'ɩ a kafin ʋ na ƴãw a nũú a cɔw a tẽw.

¹⁹Ʋ na dɛ tɩ ture a nũu wa báarɛ a, a Ɩsɩrayɛl nɩbɛ na tɩ sɔwlɩ a, tɩ ƴaw na yi a bɛ sɔwlʋ zie. Bɛ tɩ zɔ na cen tɩ kpɛ de a tẽw, ɛ́ ƴãw ʋ a vũu daadaalɛ.

²⁰A Aɩ nɩbɛ tɩ lɩɛb'a nyɛ̃ zʋ̀ʋ́r na wɩɛr tɩ yi a bɛ tẽw ìre dúor a salom zu a. Nɩr za bɛ lɛb tɩ tʋ̃ɔ́ tɛr fãw na zɔ cen ka bɩɩ ka ɩ. Bʋ̃ʋ n'ʋ vɛ̃, a Ɩsɩrayɛl nɩbɛ na tɩ zɔrɛ cere a wɛja-kpalɛ lowr a tɩ ƴaw na lɩɛb a nɩbɛ na diwr bɛ a ƴãw.

²¹A Zozue nɩ a ʋ nɩbɛ tɩ nyɛ̃ na k'aa sojarɩ na tɩ sɔwlɩ a tẽw pùorí a, tɩ de nɩ a tẽw, bɛ tɩ nyɛ̃ nɩ a zʋ̀ʋ́r na ŋmɛlɛ dúor a. Bɛ tɩ lɩɛb'ɩ pɛ-tul lo a Aɩ nɩbɛ zu.

²²A Ɩsɩrayɛl nɩbɛ ŋmãa tɩ yi n a tẽw pʋɔ tuore bɛ. Lɛ n'a a Aɩ nɩbɛ tɩ be a Ɩsɩrayɛl nɩbɛ sɔgɔ. A Ɩsɩrayɛl nɩbɛ tɩ kʋ n bɛ za. Nɩr za bɛ tɩ tʋ̃ɔ́ cɩ̃ɛ ɩ, nɩr za bɛ tɩ cɛ vʋʋrɛ,

²³a bɛ ɩ a Aɩ nãà bɛ na tɩ nyɔw cen nɩ tɩ kʋ̀ a Zozue a ɩ.

²⁴A Ɩsɩrayɛl nɩbɛ tɩ kʋ n a Aɩ nɩbɛ za a wɛja-kpalɛ pʋɔ be bɛ na tɩ diw bɛ tɩ sãá nɩ a. Bɛ na wa kʋ bɛ za pàw pɛr nɩ a zɛbr-sɔ-kpɛ̃ɛ a, a Ɩsɩrayɛl nɩbɛ tɩ lɛb'a wa a Aɩ tẽw pʋɔ, wa kʋ a nɩbɛ na cɛ be a tẽw pʋɔ a pàw pɛr.

²⁵A Aɩ tẽw nɩbɛ za na kpi a ʋlɩ bibir nɛ a, a dɛbr nɩ a pɔwbɛ za tɩ ɩ n tùr-pie nɩ ayi (12 000).

²⁶A Zozue tɩ tur'ɩ a kafin cɔw a Aɩ tẽw lowr, ɛ́ gù bɛ tɩ kʋ a tẽw nɩbɛ za pàw pɛr.

²⁷A Ɩsɩrayɛl nɩbɛ tɩ de nɩ a tẽw bome nɩ a dʋn a ɩ zɛbr bɛ na zɛb tʋ̃ɔ́ a bome, mɛ̃ a lɛ a Sore na tɩ yel kʋ̀ a Zozue a.

²⁸A Zozue tɩ nyɩw nɩ a Aɩ[9] tẽw bɛr, ɛ́ ɩ ʋ lɩɛb deboru kʋralɛ, zi-wɛja-kpalɛ na cãà be be a dɩ̃a a.

²⁹A Aɩ nãà ʋl a, bɛ tɩ yawlɩ ʋ nɩ tɩɛ zu tɩ ta zaanʋɔra. A mʋ̃tɔ̃w na wa kpɩɛr a, a Zozue tɩ ƴãw na bɛ yaw a kũu a tɩɛ zu. Bɛ tɩ lɔb ʋ na bɛr a tẽw dɩ̃dɔr nʋɔr, ɛ́ wob kʋsɛbɛ gbowli pàw ʋ, a cãà na nɩ dɩ̃a.

³⁰A Zozue tɩ mɛ n bàwr-maal-kuur a Sore, a Ɩsɩrayɛl Naaŋmɩn ƴãw, a Ebal tãw zu.

³¹Ʋ tɩ mɛ ʋ na mɛ̃ a lɛ a Moyiir, a Sore tõ-tõ-bie, na tɩ wul a Ɩsɩrayɛl nɩbɛ, a tu a lɛ na sɛb a Moyiir wulu sɛbɛ pʋɔ a: kʋsɛ-gbawlɛ kure tõ-tõ-bom za na bɛ tɔ a bàwr-maal-kuur. Bɛ tɩ maal'ɩ nyɩw-a-za-bagɛ nɩ ƴã-ɓaarʋ bagɛ a ʋ zu.

³²A be n'a a Zozue tɩ wi a Naaŋmɩn wulu a Moyiir na tɩ sɛb a Ɩsɩrayɛl nɩbɛ ƴãw a, ƴãw kʋsɛbɛ zu.

³³A Ɩsɩrayɛl nɩbɛ za nɩ a bɛ nɩ-kore, a bɛ nɩbɛ nɩ-bɛrɛ nɩ a bɛ ƴɛ̀r-dɩrbɛ, de nɩ a nʋʋrɩ na kpɩɛr a bɛ pʋɔ a, tɩ ìr'a àr a wõ-taa daga lõbowe ƴãw, tori a levitɩ mɩnɛ bɛl na ɩ bàwr-maalbɛ ɛ́ tuo ʋ a: a bɛ ŋmãa tɩ àr'a tori a Garizim tãw, ɛ́ a bɛ ŋmãa tori a Ebal tãw, a tu a lɛ a Sore tõ-tõ-bie Moyiir na tɩ yel kɛ́ bɛ mɩ́ de niwn ƴɛ̀r a nɔ-vla kʋ̀ a Ɩsɩrayɛl nɩbɛ a.

³⁴Al pùorí, a Zozue tɩ kanɩ nɩ a Naaŋmɩn wulu ƴɛ̀r-bie za — a maalʋ ƴɛ̀r-bie nɩ a ŋmɛ-ƴãw ƴɛ̀r-bie — mɛ̃ a lɛ a za na sɛb a Naaŋmɩn wulu sɛbɛ pʋɔ a.

³⁵A Zozue tɩ kanɩ nɩ a Moyiir nɛ-ƴãwnɩ za, been bɛ tɩ cɛ ɩ, a Ɩsɩrayɛl lãw niŋé, tɩ lãw nɩ a pɔwbɛ, a bibiir nɩ a nʋʋrɩ na kpɩɛr a bɛ sɔgɔ a.