Read Dagara, Northern 2 Tesalonikɩ 1 Bible Online

2 Tesalonikɩ 1 - Dagara, Northern bible

2 Tesalonikɩ 1

¹A mãa Pol nɩ Sɩlvɛ̃ de nɩ Timote, tɩmɛ nɛbɛ tɩrɛ a sɛbɛ ŋa kʋ̀rɛ a Tesalonikɩ Lãw-yir, a Naaŋmɩn tɩ Sãà nɩ a Sore Yeezu Kɩrɩta na so a.

²A Naaŋmɩn tɩ Sãà nɩ a Sore Yeezu Kɩrɩta, bɛ kʋ̀ nyɩ a maalʋ nɩ a ƴã-ɓaarʋ.

³Yɛbr i, a fɛr'a kɛ́ tɩ mɩ́ puore a Naaŋmɩn yãanɩ kʋralɛ a nyɩ ƴãw. Ɛ́ a mɩ̀ sɛw na kɛ́ tɩ ɩrɛ a lɛ, bʋ̃ʋ n'ʋ vɛ̃, a nyɩ naaŋmɩn-sàw-deb kɛrɛ na dɔwlɛ bɛ dɩ vuo ɩ, ɛ́ a nɔ̃wfʋ nyɩ na nɔnɛ taa a kɛrɛ dɔwlɛ a nyɩ za been been zie.

⁴Lɛ so tɩ mɩ́ nyʋʋr a nyɩ ƴãw a Naaŋmɩn Lãw-yie sɔgɔ, nyɩ na mɩ́ dɩ kanyir ɛ́ tɛr a naaŋmɩn-sàw-deb, a nyɩ dɔwrʋ za, nɩ a nyɩ kpɩɛrʋ za nyɩ na nyɛrɛ a ƴãw a.

⁵Naaŋmɩn ƴɛ̀rʋ maalʋ na tu yel-mɩŋa a bãwfʋ n'ɩ à ŋà, bʋ̃ʋ n'ʋ vɛ̃, a kanyir nyɩ na mɩ́ dɩ a, na ɩ na nyɩ sɛw taa nɩ a Naaŋmɩn Naalʋ, a Naalʋ ŋa ƴãw nyɩ na wone a tuo a.

⁶A sɛw na kɛ́ Naaŋmɩn mɩ́ ɩ kpɩɛrʋ páw a bɛlɩ dem na ɩrɛ a kpɩɛr nyɩ a, yáa a san,

⁷ɛ́ kʋ̀ pɩ̃ɛnʋ a nyɩɩm na wone a tuo lãwnɩ a tɩɩm a, a lɛn daar ʋ na na sãá a salom zu nɩ a ʋ kpɛnʋ malkɩ mɩnɛ a.

⁸Ʋ na wa n vũu-zɛlɛ pʋɔ, k'ʋʋ wa dɔwrɩ a bɛlɩ dem na bɛ bãw a Naaŋmɩn, ɛ́ bɛ tuur a tɩ Sore Yeezu Yel-nʋ̃ɔ̀ a.

⁹A bɛ dɔwrʋ na ɩ n wɛb bɛ wɛ kʋralɛ, zãá nɩ a Sore niwn nɩ a ʋ kpɛnʋ yúor-vɩɛlʋ-danʋ,

¹⁰a lɛn daar ʋ na na lɛb wa wa nyɛ̃ yúor-vɩɛlʋ-danʋ a ʋ nɩ-son zie, ɛ́ a bɛlɩ dem za na sàw de ʋ a úore a ʋ niwn vɩɛlʋ a ʋlɩ bibir nɛ a. Ɛ́ a nyɩɩm a, nyɩ sàw na de a dãsɩɛ tɩ na dɩ a.

¹¹Alɛ so tɩ puore kʋ̀rɛ nyɩ kʋralɛ, k'aa tɩ Naaŋmɩn ɩ nyɩ sɛw taa nɩ a nyɔ-vʋʋrʋ ʋl ƴãw ʋ na bʋɔlɩ nyɩ a, k'ʋʋ sõwne nyɩ nɩ a ʋ fãw, nyɩ mɩ́ maalɩ a vla za nyɩ na bɔbr a, ʋʋ ɩ a nyɩ sàw-deb tone vla vla za.

¹²À ŋá n'a nyɩ na íre a tɩ Sore Yeezu yúor, ɛ́ mɩ̀ nyɛrɛ yúor a ʋ zie, a tu a tɩ Naaŋmɩn nɩ a tɩ Sore Yeezu Kɩrɩta maalʋ.