Read Dagara, Northern 2 Tesalonikɩ 2 Bible Online

2 Tesalonikɩ 2 - Dagara, Northern bible

2 Tesalonikɩ 2

¹Yɛbr i, a tɩ Sore Yeezu Kɩrɩta waa, nɩ tɩ na na ɓã taa a ʋ zie a ƴãw a, tɩ zɛlɛ nyɩ na:

²nɩr wa yel k'aa Sore bibir ta na a, nyɩ ta sàw a nyɩ tɩɛrʋ dam nyɩ fɔ̃wlɛ ɩ, ɛ́ nyɩ ta zɔrɛ dɛ̃bɩ̃ɛ ɩ. Bɛlɛ saa yel kɛ́ tɩmɛ nɛbɛ ƴɛ̀r naaŋmɩn-ƴɛ̀r-manɛ ƴɛ̀rʋ bɩɩ ƴɛ̀r ƴɛ̀rʋ kãw bɩɩ tɩr sɛbɛ a, nyɩ taa sàwr ɛ.

³Nyɩ ta sàw nɩr kãw za bɛ̀lɩ nyɔw nyɩ nɩ bɛ̀l-bʋʋrɛ kãw za ɩ. Bʋ̃ʋ n'ʋ vɛ̃, a fɛr'a kɛ́ a Naaŋmɩn jɛ-bɛrʋ ta baarɩ, kɛ́ a Faalʋ nɩr na ɩ nɩ-wɛra a sãá baarɩ, ɛ́ a bibir ŋa bãw ta.

⁴Bom nɛ za a nɩsaalbɛ na bʋɔlɛ kɛ́ naaŋmɩn, ɛ́ puore ʋ a, a Faalʋ nɩr na ìr'ɩ nɩ pɔ̀lʋ ɩ a ʋ dɔ̃ sob, ʋʋ na tɛr'ɩ lɛɛɛ tɩ kpɛ zɩ̃ a Naaŋmɩn yir-kpɛ̃ɛ pʋɔ, ɛ́ yel k'ʋʋ ɩ n Naaŋmɩn[1].

⁵Nyɩ yiir'a ɩ̃ na tɩ yel a yel ŋa kʋ̀ nyɩ, a lɛn daar ɩ̃ na tɩ be a nyɩ zie a bɩɩ?

⁶Ɛ́ ƴɛrɛŋa a, nyɩ bãw nɩ bom nɛ na n'ʋ nyɔw a Faalʋ nɩr tɛr sɛr, ɛ́ gù k'ʋʋ wa sãá a ʋ daar a.

⁷Bʋ̃ʋ n'ʋ vɛ̃, a faalʋ kpɛnʋ na sɔwlɩ a tĩ na tone baarɩ, ɛcɛ a sob nɛ na nyɔw ʋ tɛr a wa bɛr ʋ vuo a, ʋ na yi n cãàmɩ́ ʋ za.

⁸Lɛ n'a a Faalʋ nɩr na sãá, a Sore Yeezu pɛbl'ʋ kʋ, ɛ́ ɩ ʋ bɔr nɩ a ʋ waa cãà.

⁹A Faalʋ nɩr na wa n nɩ a Sɩtaana kpɛnʋ za wa maalɛ nɩ nɔ-ɓãa-yel-bʋʋrɛ za nɩ yel-bãw-guuri na tule nɩbɛ a.

¹⁰A ɩ-fa-pɛ-bʋʋrɛ za n'a ʋ na bɛ̀lɛ nɩ a bɛlɩ dem na bɔrɛ a, bɛ na bɛ sàw de ɛ́ bɛ nɔnɛ a yel-mɩŋa a ƴãw, ɛcɛ a yel-mɩŋa n'ʋ nãá tʋ̃ɔ́ faa bɛ.

¹¹Lɛ so Naaŋmɩn kʋ̀rɛ bɛ bɔrʋ fãw na mɩ́ ɩ bɛ sàw de a ziri a,

¹²k'aa bɛlɩ dem za nãà bɛ wa sàw de a yel-mɩŋa ɛ́ nɔ̃w a faalʋ a, bɛ nyɛ̃ dɔwrʋ.

¹³Yɛbr i, tɩɩm ƴãw a, a fɛr'a kɛ́ tɩ mɩ́ puore a Naaŋmɩn yãanɩ a nyɩ ƴãw kʋralɛ, nyɩɩm a Sore na nɔnɛ a. Bʋ̃ʋ n'ʋ vɛ̃, Naaŋmɩn kaa na ír nyɩ a pɛr-tib daar, k'aa Vʋʋrʋ Sõw na tɩrɛ a sonu a zũú, nɩ a yel-mɩŋa nyɩ na sàw de a ƴãw, nyɩ nyɛ̃ a faafʋ.

¹⁴A yel ŋa ƴãw n'a ʋ bʋɔlɩ nyɩ, a tɩ Yel-nʋ̃ɔ̀ tɩ na manɩ kʋ̀ nyɩ a zũú. Ʋ bʋɔlɩ nyɩ na kɛ́ nyɩ wa tɛr a tɩ Sore Yeezu Kɩrɩta yúor-vɩɛlʋ-danʋ.

¹⁵A na ɩ à ŋá a, yɛbr i, nyɩ ƴãw fãw ɛ́ maal tɛr a wulu al tɩ na lʋɔrɩ kʋ̀ nyɩ nɩ a tɩ nʋɔr ƴɛ̀rʋ bɩɩ nɩ a tɩ sɛbɛ a.

¹⁶A tɩ Sore Yeezu Kɩrɩta mɩŋa nɩ a tɩ Sãà Naaŋmɩn na nɔ̃w tɩ, ɛ́ a ʋ maalʋ zũú ʋ kʋ̀ tɩ mɔwlʋ na be kʋralɛ nɩ tɩɛr-vla tɩ na ƴãw a ʋ ƴãw a,

¹⁷bɛ mɔwlɛ nyɩ ɛ́ kʋ̀rɛ nyɩ fãw a vla maalʋ ƴãw kʋralɛ a nyɩ ɩ-ɩrɩ pʋɔ, nɩ a nyɩ nʋɔr ƴɛ̀rʋ pʋɔ.