Read Dagara, Northern 1 Timote 4 Bible Online

1 Timote 4 - Dagara, Northern bible

1 Timote 4

¹A Vʋʋrʋ yel'ɩ à ŋá cãàmɩlɛ: a yele za baarʋ vuo pʋɔ a, bɛ mɩnɛ na zawr'ɩ a naaŋmɩn-sàw-deb bɛr, ɛ́ tuur bɛlbɛlbɛ dier'ɩ wulu na yi kɔ̃tɔmɛ zie a.

²A zir-ŋmarbɛ na mɩ́ sɔwlɛ a bɛ pʋ-tɩɛrʋ a na taw bɛ na bɔr'ɩ, a zir-ŋmarbɛ bɛ ŋa tɩɛrʋ bɛ na cɩr bãwfʋ ƴãw nɩ kure na mʋ̃ɔ vũumí a[2].

³A nɩbɛ bɛ ŋa na diwr'ɩ a kul-taa bɛrɛ, ɛ́ yel kɛ́ a bʋ̃-dɩrɩ a mɩnɛ ciir'a. Ɛcɛ Naaŋmɩn ír a na, kɛ́ a bɛlɩ dem na sàw de ʋ a, bɛl na bãw a yel-mɩŋa a, bɛ mɩ́ dɩrɛ a puore nɩ ʋ barka.

⁴Bʋ̃ʋ n'ʋ vɛ̃, bom za Naaŋmɩn na ír a ɩ n bʋ̃-vla, ɛ́ bom za bɛ ɩ bʋ̃-ciira, bɛlɛ wa dier ʋ puore nɩ Naaŋmɩn barka a.

⁵A Naaŋmɩn ƴɛ̀rʋ nɩ a puoru mɩ́ ɩ na ʋ lɩɛbɩ bʋ̃-sõw.

⁶Manɩ à á ŋá za kʋ̀ a yɛbr, lɛ n'a fʋ na ɩ a Kɩrɩta Yeezu tõ-tõ-bi-vla a naaŋmɩn-sàw-deb ƴɛ̀r-bie nɩ a wul-vla na guoli a, a wul-vla ŋa pùor fʋ na tu a.

⁷A suolu al na bɛ tu a naaŋmɩn-sàw-deb ɛ́ ɩ dãbol-ƴɛ̀rʋ a, zawr'a bɛr. Nɩ̃ɛ ƴãw fãw ƴãwnɛ a Naaŋmɩn.

⁸A ƴã-gan bɛ na mɩ́ damnɛ k'ʋʋ kpɛmɛ a, a mɩ́ tɛr'ɩ yel-ɩra yel-pʋrɩ ƴãw. Ɛcɛ a Naaŋmɩn fʋ na zɔrɛ a tɛr yel-ɩra a yele za ƴãw. A nyɔ-vʋʋrʋ a Naaŋmɩn na ƴãw a nʋɔr k'ʋʋ na tɩr a a, a ƴɛrɛŋa nyɔ-vʋʋrʋ nɩ a nɩdaar nyɔ-vʋʋrʋ, Naaŋmɩn fʋ na ƴãwnɛ a pʋɔ n'a a be.

⁹A ƴɛ̀rʋ ŋa ɩ n sɩza, ɛ́ sɛw kɛ́ nɩr za sàw de ʋ sɩza.

¹⁰Bʋ̃ʋ n'ʋ vɛ̃, tɩmɛ wa hanɛ ɛ́ mʋɔr a, tɩ na ƴãw a tɩ tɩɛrʋ a Naaŋmɩn na vʋʋrɛ a ƴãw a n'a so, ʋl na ɩ a nɩsaalbɛ za faarɛ a, baa zuo a za a bɛl na sàw de ʋ a.

¹¹Kpaalɛ ɛ́ wule a yele á ŋá za.

¹²Nɩr za ta ɩrɛ fʋ laar fʋ na ɩ pɔlbile a ƴãw ɩ. Nɩ̃ɛ ɩ a bɛlɩ dem na sàw de a Naaŋmɩn a cɔwrɛ fʋ a fʋ ƴɛ̀rʋ pʋɔ, a fʋ cenu pʋɔ, a fʋ nɔ̃wfʋ pʋɔ, a fʋ naaŋmɩn-sàw-deb pʋɔ, a fʋ vɩɛlʋ pʋɔ.

¹³Tori niwn kanɛ a Sɛb-sõw kʋ̀rɛ a nɩbɛ, kpaalɛ bɛ, wule bɛ gùre nɩ a ɩ̃ waa daar.

¹⁴Maal tɛr a Vʋʋrʋ Sõw maalʋ fʋ na páw a, naaŋmɩn-ƴɛ̀r-manbɛ ƴɛ̀r-bie n'a ɩ fʋ páw ʋ, nɩ a nɩ-kore lãw nɩbɛ na tɩ ír nuru dɔwlɩ a fʋ zu a.

¹⁵Kaarɛ à á ŋá za zie nɩ fʋ pʋɔ za, ɛ́ ƴãw fãw a al ƴãw. Lɛ n'a a nɩbɛ za na nyɛ̃ a fʋ yele na vɩɛl dɔwlɛ a.

¹⁶Gù fʋ tʋɔra vla ɛ́ mɩ̀ gù a fʋ wulu vla. Su zu a al ƴãw. Fʋ̃ʋ wa sɩrɩ ɩrɛ à à ŋá a, fʋ na faa nɩ fʋ mɩŋa lãwnɩ a bɛlɩ dem na bɛrɛ wone a fʋ wulu a.