Read Dagara, Northern 2 Timote 1 Bible Online

2 Timote 1 - Dagara, Northern bible

2 Timote 1

¹A mãa Pol Naaŋmɩn na nɔ̃w yã ƴãw ɩ̃ ɩ a Kɩrɩta Yeezu nɩ-tona a, a tu a lɛ ʋ na yel k'ʋʋ na kʋ̀ tɩ nɩ a nyɔ-vʋʋrʋ a Kɩrɩta Yeezu ƴãw a,

²mãa n'ʋ sɛbr a fʋ̃ʋ ɩ̃ bi-nɔna Timote. A Naaŋmɩn Sãà nɩ a tɩ Sore Kɩrɩta Yeezu, bɛ kʋ̀ b maalʋ, su-ɓaarʋ nɩ ƴã-ɓaarʋ.

³Ɩ̃ na mɩ́ wa pore a fʋ yúor a ɩ̃ puoru pʋɔ, mʋ̃tɔ̃w nɩ tɩ̃ɩsɔw za a, ɩ̃ mɩ́ puore nɩ a Naaŋmɩn barka yaga za, a Naaŋmɩn ɩ̃ na tone nɩ tɩɛr-vla mɛ̃ a ɩ̃ sãàkʋm-kore a.

⁴Mãa wa lɛb tɩɛrɛ a fʋ mʋta-kʋ̃ɔ a[1], ɩ̃ mɩ́ bɔbr'a nɩ ɩ̃ pʋɔ za k'ɩ̃ɩ nãá lɛb nyɛ̃ b kɛ̀ nʋ̃ɔ̀ kpɛ m.

⁵Ɩ̃ lɛb'a bãwnɩ a naaŋmɩn-sàw-deb mɩŋa fʋ na tɛr a. A fʋ mãkʋm Loyisɩ nɩ a fʋ mã Enisɩ nɛbɛ de niwn tɛr a naaŋmɩn-sàw-deb ŋa ɩ̃ na bãwnɩ fʋ mɩ̀ tɛr a.

⁶Alɛ n'a so ɩ̃ kpaalɛ fʋ, kɛ́ fʋ lɛb sɩ̃w a maalʋ a Naaŋmɩn na kʋ̀ b, a lɛn daar ɩ̃ na ír a nuru dɔwlɩ a fʋ zu a[2].

⁷Bʋ̃ʋ n'ʋ vɛ̃, dɛ̃bɩ̃ɛ vʋʋrʋ bɛ n'ʋ a Naaŋmɩn kʋ̀ tɩ ɛ, fãw nɩ nɔ̃wfʋ nɩ tʋɔra-nyɔwfʋ vʋʋrʋ n'ʋ.

⁸Lɛ so, ta zɔrɛ vĩ a tɩ Sore dãsɩɛ dɩb ƴãw ɛ. A mãa mɩ̀ na be a gaso pʋɔ a ʋ yúor ƴãw a, a ta ɩrɛ fʋ vĩ ɛ. Nɩ̃ɛ vɛ̃ kɛ́ sàw lãw nɩ mɛ̃ wone a tuo nɩ Naaŋmɩn fãw, a Yel-nʋ̃ɔ̀ ƴãw.

⁹A Naaŋmɩn faa tɩ na, ɛ́ bʋɔlɩ tɩ nɩ bʋɔl-sõw. Ɛcɛ a bɛ kaar mɛ̃ a tɩ ɩ-vɩɛlɩ n'a so ɩ, a ʋ pʋ-tɩɛrʋ nɩ a ʋ maalʋ na tu a lɛ a n'a so. A maalʋ ŋa a, a Kɩrɩta Yeezu n'ʋ ʋ kʋ̀ n tɩ, ɛ́ a dɩta-pɛ-yome za wa bãw be.

¹⁰Ƴɛrɛŋa a, a maalʋ ŋa pãa sãá na, a tɩ Faarɛ Kɩrɩta Yeezu na wul ʋ tʋɔra a zũú. Ʋlɛ n'ʋ ɩ a kũu kpɛnʋ baarɩ, ɛ́ ɩ a nyɔ-vʋʋrʋ na bɛ tɛr kũu a, ʋ sãá a Yel-nʋ̃ɔ̀ manʋ pʋɔ.

¹¹A Yel-nʋ̃ɔ̀ ŋa n'ʋ a Naaŋmɩn ƴãw k'ɩ̃ɩ hiere, ɩ̃ na ɩ nɩ-tona nɩ wul-wule a.

¹²Alɛ n'a so ɩ̃ wone a tuo á ŋá. Ɛcɛ vĩ bɛ ɩrɛ mɛ̃ ɩ, ɩ̃ bãw nɩ sob nɛ ƴãw ɩ̃ na ƴãw a ɩ̃ tɩɛrʋ a, ɩ̃ɩ bɛ bʋ̀nɛ ɩ, ɩ̃ bãwnɩ a na k'ʋʋ tɛr'ɩ fãw na tɛr a bom ʋ na kʋ̀ m k'ɩ̃ɩ tɛlɛ a[3], tɩ ta n a ƴɛ̀rʋ-maalʋ bibir.

¹³Tuur a yel-mɩŋa ƴɛ̀r-bie al ɩ̃ na ƴɛ̀r kʋ̀ b a Kɩrɩta Yeezu sàw-deb nɩ a ʋ nɔ̃wfʋ pʋɔ a.

¹⁴Maal tɛr a bʋ̃-vla ŋa bɛ na kʋ̀ b a, nɩ a Vʋʋrʋ Sõw fãw, ʋl na kpɩɛr a tɩ pʋɔ a.

¹⁵Fʋ bãwnɩ a na, a Azi tẽw dem za zawrɩ mɛ̃ na bɛr, Fɩzɛl nɩ Ɛrmozɛn mɩ̀ pʋɔ nɩ a bɛ pʋɔ.

¹⁶A Sore, ʋ tɛr su-ɓaarʋ ɩb yaga za a Onezifɔɔr yir dem ƴãw. Gb'aa yaga za, a Onezifɔɔr ɓaal'ɩ a ɩ̃ tɩɛrʋ, ɛ́ bɛ zɔ a ɩ̃ gaso bamɛ vĩ ɛ.

¹⁷Ɛcɛ ʋ na wa tarɛ a Ʋrɔm tẽw wa báarɛ a, ʋ ƴãw nɩ fãw bɔ tɩ nyɛ̃ m.

¹⁸A Sore, ʋ ɩ ʋ páw su-ɓaarʋ a Naaŋmɩn zie a ƴɛ̀rʋ-maalʋ bibir. Ɛ́ a tome al za ʋ na tõ kʋ̀ m a Efɛɛzɩ tẽw a, fʋ bãw a nɩ vla zuo nɩr za.