Read Dagara, Northern 2 Timote 2 Bible Online

2 Timote 2 - Dagara, Northern bible

2 Timote 2

¹A na ɩ à ŋá a, fʋ̃ʋ ɩ̃ bie e, ƴãw fãw kpɛmɛ a maalʋ na yi a Kɩrɩta Yeezu zie a pʋɔ.

²A bom nɛ fʋ na wõ a ɩ̃ zie, dãsɩɛ dem yaga niŋé a, man ʋ kʋ̀ nɩbɛ bɛl ƴãw fʋ na bɛr tɩɛrʋ, ɛ́ bɛ mɩ̀ na tʋ̃ɔ́ wul ʋ nɩ-yoru a.

³Lãw nɩ mɛ̃ wone a tuo mɛ̃ Kɩrɩta Yeezu soja-vla a.

⁴Nɩr za na kpɛ sojarɩ tome pʋɔ a mɩ́ bɛr'ɩ a nɩ-zawlɛ nyɔ-vʋʋrʋ yele, ʋlɛ wa bɔbr k'ʋʋ pɛlɩ a ʋ nɩ-kpɛ̃ɛ pʋɔ a.

⁵Ɛ́ lɛ mɩ̀ n'a a dɩ̃ɛnʋ mɔb pʋɔ. A sob nɛ na mʋɔr a mɩ́ páw nɩ a mɔ̃-tʋ̃ɔ́fʋ bom, ʋlɛ wa mɔ̃ mɛ̃ a lɛ a nɛ́ɛ na bin a.

⁶A ka-kʋɔra na tõ hanɩ nɩ a, ʋlɛ n'ʋ a sɛw k'ʋʋ mɩ́ de niwn de a ʋ bʋ̃-dieri.

⁷Bãw à à ŋá ɩ̃ na ƴɛ̀rɛ a pɛr. Mɔ̃ mɩ̀, a Sore na ɩ na fʋ bãw a za pɛr.

⁸Lɛb tɩɛrɩ a Yeezu Kɩrɩta yele, ʋl na ɩ Daviir bʋʋrɛ nɩr a: ʋ lɛb'a yi a kũuni pʋɔ mɛ̃ a lɛ a ɩ̃ Yel-nʋ̃ɔ̀ na yere a.

⁹A Yel-nʋ̃ɔ̀ ŋa ƴãw n'a ɩ̃ wone a tuo, bɛ tɩ nyɔw mɛ̃ 'lẽ nɩ bamɛ mɛ̃ yel-fa-maalɛ a. Ɛcɛ bɛ bɛ 'lẽ a Naaŋmɩn ƴɛ̀rʋ ɛ!

¹⁰Alɛ n'a so ɩ̃ sàw de a tuo za, a bɛlɩ dem a Naaŋmɩn na kaa ír a ƴãw, kɛ́ a bɛl mɩ̀, bɛ tʋ̃ɔ́ páw a faafʋ a Kɩrɩta Yeezu ƴãw, lãwnɩ a yúor-vɩɛlʋ-danʋ na be kʋralɛ a.

¹¹A ƴɛ̀rʋ ŋa ɩ n sɩza: «Tɩmɛ wa lãw nɩ ʋ kpi a[4], tɩ mɩ̀ na lãw nɩ ʋ na vʋʋrɛ.

¹²Tɩmɛ wa dɩ kanyir a, tɩ mɩ̀ na lãw nɩ ʋ na dɩ naalʋ. Tɩmɛ wa zawr'ʋ bɛr a, ʋ mɩ̀ na zawrɩ tɩ na bɛr.

¹³Tɩmɛ wa tɩɛ ʋ bɛr a, ʋl ŋmɛ̃ n ʋ ŋmɛ̃a, ʋ na kʋ̃ tʋ̃ɔ́ zawrɩ ʋ tʋɔra bɛr a ƴãw.»

¹⁴Lɛb sɩ̃w bɛ za tɩɛrʋ a yele á ŋá ƴãw, ɛ́ zɛlɩ bɛ yãayãa a Naaŋmɩn niŋé, kɛ́ bɛ ta zɛbr taa ƴɛ̀r-bie ƴãw ɛ, a zɛbr á ŋá taabɛ bɛ tɛr yel-ɩra za ƴãw pʋɔ a bɔrʋ ƴãw a ƴɛ̀r-bie á ŋá na mɩ́ bɔr'ɩ a nɩbɛ na bɛrɛ wone a a ɩ.

¹⁵Ɩ fãw àr a Naaŋmɩn niŋé mɛ̃ nɩr bɛ na ɩ kaa a, mɛ̃ tõ-tõ-bie na bɛ zɔrɛ a ʋ tome vĩ a, ɩ mɛ̃ tõ-tõ-bie na manɛ a yel-mɩŋa ƴɛ̀rʋ vla vla za a.

¹⁶Ɛ́ a ƴɛ̀r-zawlɛ na bɛ tu naaŋmɩn-sàw-deb a, nɩɩrɛ a bɛrɛ. Bɛlɩ dem na ƴɛ̀rɛ a ƴɛ̀r-zawlɛ á ŋá a, naaŋmɩn-bɛ-ƴãwfʋ ɩb'a bɛ na ɩrɛ dɔwlɛ cere nɩ.

¹⁷A bɛ ƴɛ̀rʋ ɩ na mɛ̃ gbõtor na luwr cere a. À ŋá n'a a Ɩmene nɩ a Filetɔsɩ ŋmɛ̃.

¹⁸Bɛ bɔr'a zãá nɩ a yel-mɩŋa, bɛ na yere kɛ́ tɩ lɛb'a yi a kũu pʋɔ baarɩ a, à ŋá n'a bɛ ɩrɛ sãwnɛ nɩ-yaga naaŋmɩn-sàw-deb.

¹⁹Ɛcɛ yir pɛr na kpɛmɛ[5] ɛ́ Naaŋmɩn bin a, cãà nɩ be. Ƴɛ̀r-bie á ŋá n'a bɛ wi ƴãw a ʋ zu: «A Sore bãw nɩ a ʋ nɩbɛ[6]», lɛ nɩ: «Sob nɛ za na bʋɔlɛ a Sore yúor a, ʋ taw zãá nɩ a ɩ-faar.»

²⁰Yir-kpɛ̃ɛ pʋɔ a, a pɔw-bome bɛ mɩ́ ɩ salm-pla nɩ salm-zɩɛ tɛwr ɛ, dàar dem nɩ yawra dem mɩ̀ mɩ́ be n be. A mɩnɛ a bibi-bɛrɛ ƴãw, ɛ́ a mɩnɛ a bibie za ƴãw.

²¹Sob nɛ na so a faalʋ á ŋá dɛwr bɛr a na ɩ na mɛ̃ a bibi-bɛrɛ pɔw-bome a, ʋ vɩɛlɩ ʋ za, a Sore tɛrɩ ʋ yel-ɩra, ɛ́ ʋ cɔbrɩ gù yel-vla za maalʋ.

²²Dɛrɛ a fʋ pɔ̀lʋ daar bʋ̃-nɔnɩ, ɛ́ lãw nɩ a bɛlɩ dem na bʋɔlɛ a Sore nɩ soci-pla parpar a tu a mɩnʋ, a naaŋmɩn-sàw-deb, a nɔ̃wfʋ nɩ a ƴã-ɓaarʋ pùor.

²³Ɛcɛ, bɛr a nɔkpɛn zawlɛ na bɛ tɛr pɛr a ŋmɛb. Fʋ bãwnɩ a na kɛ́ alɛ n'a waar'ɩ a zɛbr.

²⁴Ɛcɛ Sore tõ-tõ-bie bɛ sɛw kɛ́ ʋlɛ nɩ nɩr zɛbr taa ɩ. A sɛw na k'ʋʋ tɛr nɔ̃wfʋ a nɩbɛ za ƴãw, k'ʋʋ tʋ̃ɔ́ wule a nɩbɛ, ɛ́ sàwr dier a nɩbɛ po-to-yele.

²⁵Bàalʋ bàalʋ lɛ n'a a sɛw k'ʋʋ mɩ́ wule a bɛlɩ dem na mɩ́ ŋmɛ a ʋ ƴɛ̀rʋ lɔb a. Ãa bãw, Naaŋmɩn nãà ɩ na bɛ lɩɛbɩ a bɛ ɩb bãw a yel-mɩŋa,

²⁶ɛ́ lɛb bãw yã yi zaa a Gɛgɛra bɛrɩ pʋɔ, ʋl na tɩ nyɔw bɛ ƴãw bɛ maalɛ a ʋ pʋ-tɩɛrʋ a.