Read Dagara, Northern 2 Timote 3 Bible Online

2 Timote 3 - Dagara, Northern bible

2 Timote 3

¹Bãw a yel ŋa vla vla: a bibi-pɛ-baarɩ daar, a zie na kpɛmɛ na.

²Bʋ̃ʋ n'ʋ vɛ̃, a nɩbɛ na tɩɛrɛ nɩ bɛl tɛwr yele, ɛ́ ɩ libi-nɔ̃wnbɛ. Bɛ na pɔrɛ nɩ zaalɛ ɛ́ ɩrɛ pɔ̀lʋ. Bɛ na tʋʋr'ɩ Naaŋmɩn zʋmɛ, ɛ́ bɛ sàwr a bɛ dɔwrbɛ nʋɔr ɛ. Fʋ na mɩ́ maalɩ bɛ na, ɛ́ bɛ bɛ ŋmɛlɩ kaa fʋ ɛ. Bɛ na sãwnɛ nɩ a bʋ̃-son bɛrɛ.

³Bɛ kʋ̃ tɛr nɔ̃wfʋ ɛ, ɛ́ bɛ tɛr nɩbaal-zɔba ɩ. Bɛ na ɩ n gɛgɛrɩ, ɛ́ kʋ̃ tuur nʋɔr kãw za ɩ, po-to-faar nɩbɛ na ciir yel vla a.

⁴Bɛ na mɩlɛ nɩ taa, ɛ́ ɩ suur tɛwr, pɔ̀lʋ tɛwr nɩbɛ, ɛ́ nɔnɛ a ƴã-gan nʋ̃ɔ̀ ɛ́ nɩ̃ɛ bɛr a Naaŋmɩn.

⁵Bɛ na sãá nɩ nɩbɛ na ƴãwnɛ Naaŋmɩn a, ɛcɛ bɛ na zawr'ɩ a Naaŋmɩn ƴãwfʋ fãw bɛr. Ŋmɛlɩ kpaar cɔw a nɩbɛ bɛ ŋa mɩ̀!

⁶A bɛ nɩbɛ n'ɩ a bɛl na mɩ́ kpɛ a yie pʋɔ bɛlɩ nyɔw pɔwbɛ na bɛ tɛr fãw na tuo yel-bebe ɛ́ tu a bɛ pʋ-tɩɛr-bʋʋrɛ za pùor a.

⁷A pɔwbɛ bɛ ŋa taabɛ be n a zanʋ zu kʋralɛ, ɛ́ bɛ be za na tʋ̃ɔ́ bãw a yel-mɩŋa ɩ.

⁸Mɛ̃ a lɛ a Zanɛsɩ nɩ a Zãbɩrɛsɩ[7] na bɛ tɩ sàw de a Moyiir ƴɛ̀rʋ a, lɛ n'a a nɩbɛ bɛ ŋa mɩ̀ bɛ sàw de a yel-mɩŋa ɩ. Yã-faar nɩbɛ nɛbɛ, a bɛ naaŋmɩn-sàw-deb bɛ tɛr bir ɛ.

⁹Ɛcɛ bɛ kʋ̃ tɔl yɩ̃ɛ ɩ, a bɛ dãbolu na sãá na nɩbɛ za nyɛ̃, mɛ̃ a lɛ a nɩbɛ ayi bɛ ŋa dem na tɩ sãá a.

¹⁰Ɛcɛ a fʋ̃ʋ a, fʋ tu mɛ̃ nɩ vla a ɩ̃ wulu pʋɔ, nɩ a ɩ̃ cenu pʋɔ, a lɛ ɩ̃ na mɩ́ tɩɛr k'ɩ̃ɩ ɩ a, nɩ a ɩ̃ naaŋmɩn-sàw-deb pʋɔ, a ɩ̃ tʋɔra-nyɔwfʋ pʋɔ nɩ a nɔ̃wfʋ pʋɔ, a kanyir pʋɔ,

¹¹a dɔwrʋ pʋɔ nɩ a kpɩɛrʋ pʋɔ ɩ̃ na páw a Ãtɩɔsɩ, a Ɩkonɩɔm nɩ a Lɩsɩtɩr a. Bʋ̃ʋ dɔwrʋ n'a ɩ̃ bɛ nyɛ̃! Ɛ́ a Sore faa mɛ̃ a za pʋɔ!

¹²Mɔ̃ mɩ̀, a bɛlɩ dem za na bɔbr kɛ́ bɛ vʋʋrɛ nɩ Naaŋmɩn ƴãwfʋ lãwnɩ a Kɩrɩta Yeezu a, bɛ na nyɛ̃ nɩ dɔwrʋ.

¹³Ɛ́ a nɩ-faar nɩ a nɩ-bɛlbɛ a, ɩ-faar'a bɛ na ɩrɛ dɔwlɛ cere nɩ, tule nɩ a bɛ taabɛ ɛ́ tule a bɛl tɛɛ za.

¹⁴Ɛcɛ a fʋ̃ʋ a, a yele al fʋ na zànɩ ɛ́ nyɛ̃ a ɩ sɩza a, maal tɛr a kpɛ̃w za. Fʋ bãw nɩ a bɛlɩ dem zie fʋ na zànɩ a yele á ŋá a.

¹⁵A fʋ bibile daarɩ́ za n'a fʋ bãw a Sɛb-son. A tɛr'ɩ fãw na kʋ̀ b a yã-bãwfʋ na na ɩ fʋ páw a faafʋ a Kɩrɩta Yeezu sàw-deb pʋɔ a.

¹⁶Sɛb-sõw za a, Naaŋmɩn Vʋʋrʋ n'ʋ mɩ́ ƴãw bɛ sɛb ʋ, ʋ tɛr yel-ɩra a wulu ƴãw, a ziri gɔ́b ƴãw, a yele lɛb dɛnʋ ƴãw, a mɩnʋ sɔ́r wulu ƴãw,

¹⁷k'aa Naaŋmɩn nɩr mɩ́ cɔbrɩ ʋ za yel-vla za maalʋ ƴãw.