Read Dagara, Northern Títɩ̀ 3 Bible Online

Títɩ̀ 3 - Dagara, Northern bible

Títɩ̀ 3

¹Lɛb yel kʋ̀ a kɩrɩta-nɩbɛ za, k'aa fɛr'a kɛ́ bɛ sàw a niw-dierbɛ nɩ a tẽw nɩ-bɛrɛ so bɛ. K'aa fɛr'a kɛ́ bɛ sàwr a bɛ nɛ́ɛ, ɛ́ cɔbrɩ bɛ tʋɔra gù yel-vla za maalʋ.

²Kɛ́ bɛ ta tʋʋr nɩr za ɩ, kɛ́ bɛ ciir nɔhaarʋ ɛ́ tɛr su-ɓaarʋ ɩb, ɛ́ ɩ nɩsaal-bàalʋ kʋralɛ a nɩbɛ za zie.

³Bʋ̃ʋ n'ʋ vɛ̃, a tɩɩm, tɩ mɩ̀ tɩ dãw na ɩ dãbole nɩ bɛ-wonbɛ, nɩ-bɔrɩ na ɩ yel-bɔbrɩ bʋʋrɛ za nɩ nʋ̃ɔ̀-faa bʋʋrɛ za gbãgbaar a, nɩbɛ na kpɛ po-tuo nɩ nyuur a. Tɩ tɩ kpɛ n faa bɛ dɩ vuo ɩ, ɛ́ hɩ̃ɛn taa.

⁴Ɛcɛ a lɛn daar a Naaŋmɩn tɩ Faarɛ na wa wul a ʋ socir vɩɛlʋ nɩ a ʋ nɔ̃wfʋ a sãá a nɩsaalbɛ za ƴãw a,

⁵ʋ faa tɩ na, ɛ́ a bɛ ɩ yel-mɩŋa tɩ na tɛr a tɩ ɩ-ɩrɩ pʋɔ a n'a so ɩ, a ʋ su-ɓaarʋ zũú n'a ʋ so tɩ a suob kʋ̃ɔ tɩ lɛb dɔw, ʋʋ kʋ̀ tɩ a Vʋʋrʋ Sõw tɩ lɩɛbɩ nɩ-paalɛ.

⁶Ʋ paalɩ tɩ nɩ yaga za nɩ a Vʋʋrʋ Sõw ŋa a tɩ Faarɛ Yeezu Kɩrɩta zũú,

⁷k'aa ʋ maalʋ ŋa ɩ tɩ ɩ nɩ-mɩn a ʋ niŋé, ɛ́ ɩ nyɔ-vʋʋrʋ na be kʋralɛ a gbã-dɩrbɛ, mɛ̃ a lɛ tɩ na tɩɛrɛ a.

⁸A ƴɛ̀rʋ ŋa ɩ n sɩza. Ɩ̃ bɔbr'a kɛ́ fʋ ƴɛ̀r gb'a a yaga a yele á ŋá ƴãw, k'aa bɛlɩ dem za na sàw de a Naaŋmɩn a, bɛ ƴãw fãw ɩrɛ vla dɔwlɛ a bɛ ɩ-vɩɛlɩ pʋɔ. À ŋá n'a vɩɛl ɛ́ tɛr yel-ɩra a nɩsaalbɛ zie.

⁹Ɛcɛ a bɔ-zawlɛ nɩ a dɔw-tu-taa manʋ a, a zɛb-taa nɩ a taw-taa al za na càarɩ a Naaŋmɩn wulu a, dɛrɛ a: a bɛ tɛr yel-ɩra ɩ, ɛ́ mɩ̀ bɛ lɛb tɛr pɛr ɛ.

¹⁰A sob nɛ na tɛr wulu na bʋ́rɛ a nɩbɛ a, kpaal'ʋ gb'a-been, ɛ́ lɛb kpaal'ʋ gb'a ayi, ɛ́ a pùorí fʋ ow ʋ bɛr.

¹¹Fʋ bãwnɩ a na k'aa nɩr ŋa tɔ bɛr'ɩ a sɔr-vla, ɩ yel-bier-maalɛ na ƴãwnɛ ʋ tʋɔra dɔwrʋ a.

¹²Mãa wa tõ a Atemasɩ bɩɩ Tɩsɩkɩ a fʋ zie baarɩ a, fʋ̃ʋ ƴãw fãw wa páw mɛ̃ a Nikopolisɩ tẽw. Bʋ̃ʋ n'ʋ vɛ̃, be n'a ɩ̃ na be ɛ́ gù a zie tɩ yi.

¹³Kaa a ƴɛ̀rʋ-maalʋ zie ƴɛ̀r-bãw-ƴɛ̀rɛ Zenasɩ nɩ a Apɔlɔsɩ zie a bɛ sɔ́r loba ƴãw, bɛ taa bɔbr bom guur ɛ.

¹⁴A fɛr'a k'aa tɩ nɩbɛ mɩ̀ bãwnɩ a, k'aa fɛr'a bɛ ƴãw fãw mɩ́ de niwn a tõ-vɩɛlɩ tob ƴãw, tʋ̃ɔ́ mɩ́ tu a yel-fɛrɩ pùor, lɛ n'a a bɛ nyɔ-vʋʋrʋ na tɛr tɔnɛ.

¹⁵A bɛlɩ dem za na be a ɩ̃ zie a puore fʋ na. Puori a bɛlɩ dem na nɔnɛ tɩ a naaŋmɩn-sàw-deb pʋɔ a. A Naaŋmɩn maalʋ, ʋ be a nyɩ za zie.