Read Dagara, Northern Filemɔ̃ 1 Bible Online

Filemɔ̃ 1 - Dagara, Northern bible

Filemɔ̃ 1

¹A mãa Pol na be a gaso pʋɔ a Yeezu Kɩrɩta ƴãw a, nɩ a tɩ yɛb Timote, tɩ tɩrɛ nɩ a sɛbɛ ŋa kʋ̀rɛ fʋ, fʋ̃ʋ Filemɔ̃, na ɩ a tɩ bá-nɔna nɩ tɩ lãw-tõ-tɔ a,

²fʋ̃ʋ nɩ a tɩ yeepuule Afɩa, nɩ a Asɩpɩ na ɩ a tɩ soja-tɔ a, de nɩ a Lãw-yir nɩbɛ na mɩ́ ɓã taa a fʋ yir a.

³A Naaŋmɩn tɩ Sãà nɩ a Sore Yeezu Kɩrɩta, bɛ kʋ̀ nyɩ a maalʋ nɩ a ƴã-ɓaarʋ.

⁴Kʋralɛ mãa wa puore a, ɩ̃ mɩ́ tɩɛrɛ nɩ a fʋ yele, ɛ́ puore a ɩ̃ Naaŋmɩn yãanɩ.

⁵Bʋ̃ʋ n'ʋ vɛ̃, ɩ̃ wone na bɛ na manɛ a lɛ fʋ na nɔ̃w a kɩrɩta-nɩbɛ za a, nɩ a lɛ fʋ na sàw de a Sore Yeezu a.

⁶Ɩ̃ zɛlɛ nɩ a Naaŋmɩn k'aa sàw-deb tɩɩm nɩ a fʋ̃ʋ na lãw a, ʋ tɛr ɩ-ɩrɩ a fʋ zie, mɩ́ tʋ̃ɔ́ ɩ bɛ bãw vla a yel-vɩɛlɩ al za tɩ na tɛr a tɩ nyɔ-vʋʋrʋ pʋɔ lãwnɩ a Kɩrɩta a.

⁷Yɛb i, a fʋ nɔ̃wfʋ kʋ̀ m'ɩ nʋ̃ɔ̀ yaga nɩ mɔwlʋ, bʋ̃ʋ n'ʋ vɛ̃, a fʋ nɔ̃wfʋ sɩrɩ na ɩ a kɩrɩta-nɩbɛ socie a lɛb kpɛmɛ.

⁸Alɛ n'a so, mãa saa na tʋ̃ɔ́ yel bom nɛ a na fɛr kɛ́ fʋ ɩ a kʋ̀ b a, a Kɩrɩta ɩ̃ na lãwnɩ a zũú a,

⁹ɩ̃ nyɛ̃ na a sa, k'ɩ̃ɩ zɛlɩ fʋ bʋ̃-kãw a nɔ̃wfʋ zũú. À à ŋá ɩ̃ na ŋmɛ̃ a, a mãa Pol na ɩ dɛb-nyãw, ɛ́ be a gaso pʋɔ ƴɛrɛŋa a Yeezu Kɩrɩta ƴãw a,

¹⁰ɩ̃ lɔbr'ɩ nuru zɛlɛ nɩ fʋ yãayãa a Onezim ƴãw, ʋl na sàw de a Yeezu Kɩrɩta lɩɛbɩ a ɩ̃ bidɛb a gaso pʋɔ ka a.

¹¹Koro za a, ʋ bɛ tɩ tɛr yel-ɩra a fʋ zie ɩ, ɛcɛ ƴɛrɛŋa a, ʋ tɛr'ɩ yel-ɩra mãa nɩ a fʋ̃ʋ za zie.

¹²Ɩ̃ bɛrɛ ʋ na ʋʋ lɛb wa a fʋ zie, ʋl na ɩ mɛ̃ a mãa mɩŋa a.

¹³Ɩ̃ nãá tɩ tɛr ʋ nɩ a ɩ̃ zie ka, ʋ lɩɛrɩ fʋ sõwne mɛ̃ a gaso pʋɔ ka ɩ̃ na be a Yel-nʋ̃ɔ̀ ƴãw a.

¹⁴Ɛcɛ, ɩ̃ bɛ tɩ bɔbr k'ɩ̃ɩ ɩ bom za a fʋ pùorí ɛ, k'aa yel-vla ŋa ta ɩ mɛ̃ fɛrʋ n'a a fʋ zie ɩ, ɛ́ ɩ fʋ̃ʋ n'ʋ nɔnɛ.

¹⁵A mɩnɛ kãw, a Onezim zɔ na zãá nɩ fʋ blãlɛ tɛwr ƴãw, kɛ́ fʋ wa tʋ̃ɔ́ lɛb páw ʋ, ʋ be a fʋ zie kʋralɛ,

¹⁶ʋʋ ta cãà ɩ gbãgbaa ɩ, ɛ́ zuo gbãgbaa: ʋ ɩ yɛb-nɔna za. Ʋ ɩ ʋ nɩ yaga za mãa zie, ŋmɩŋmɩn n'a ʋ kʋ̃ ɩ ʋ a fʋ zie zuo lɛ, a ʋ nɩsaalʋ pʋɔ nɩ a ʋ kɩrɩta-nɩɩlʋ pʋɔ.

¹⁷Fʋ̃ʋ wa sɩrɩ nyɛ̃ m ɩ̃ ɩ a fʋ yɛb a Naaŋmɩn sàwfʋ pʋɔ a, fʋ̃ʋ sàw de a Onezim mɛ̃ a mãa mɩŋa n'ʋ fʋ de a.

¹⁸Ʋlɛ wa sãw fʋ a, bɩɩ tɛr fʋ san a, fʋ̃ʋ de a za dɔwlɩ a ɩ̃ zu.

¹⁹A mãa Pol, mãa mɩŋa n'ʋ sɛbr'ɩ a ɩ̃ nũu yere kʋ̀rɛ fʋ: mãa n'ʋ na ya b. Ɩ̃ɩ bɛ yere kʋ̀rɛ fʋ a fʋ nyɔ-vʋʋrʋ san fʋ na dɩ a ɩ̃ zie a ɩ.

²⁰Sɩza, yɛb i, ɩ̃ zɛlɛ fʋ na, sàw kʋ̀ m a maalʋ ŋa a Sore nɔ̃wfʋ zũú: ɩ a ɩ̃ socir nyɛ̃ mɔwlʋ, tɩɩm nɩ a Kɩrɩta na lãw taa a ƴãw.

²¹Ɩ̃ na bãwnɩ a fʋ nʋɔr-sàwfʋ a n'a ɩ̃ sɛbr fʋ, ɩ̃ɩ mɩ̀ bãwnɩ a na fʋ na na maalɩ zuo a lɛ ɩ̃ na yere a.

²²Mɩ̀ maalɩ gaa-zie bɛr mɛ̃, bʋ̃ʋ n'ʋ vɛ̃, ɩ̃ tɩɛrɛ k'aa nyɩ puoru zũú a, bɛ na lɛb'a bɛr mɛ̃ kʋ̀ nyɩ.

²³A Epafarasɩ na lãw nɩ mɛ̃ be a gaso pʋɔ a Yeezu Kɩrɩta ƴãw a, puore fʋ na.

²⁴Markɩ, Arɩsɩtakɩ, Demasɩ nɩ Luka na ɩ a ɩ̃ lãw-tõ-taabɛ a mɩ̀ puore fʋ na.

²⁵A Sore Yeezu Kɩrɩta maalʋ, ʋ be a nyɩ zie.