Read Dagara, Northern Ebre 1 Bible Online

Ebre 1 - Dagara, Northern bible

Ebre 1

¹A dãwdãw a, Naaŋmɩn tɩ ƴãw na a ʋ ƴɛ̀r-manbɛ ƴɛ̀r ƴɛ̀r-pɛ-bʋʋrɛ za, gb'aa ŋmɩn za a tɩ sãàkʋm-kore zie.

²Ɛcɛ ƴɛrɛŋa a, a yele baarʋ vuo ŋa pʋɔ a, a ʋ Bie n'ʋ ʋ ƴãw ʋ ƴɛ̀r a tɩ zie. Ʋlɛ n'ʋ a Naaŋmɩn ƴãw k'ʋ ír bom za ɛ́ so bom za.

³A Bie ŋa n'ɩ a Naaŋmɩn yúor-vɩɛlʋ-danʋ na nyɩwrɛ a, nɩ a lɛ tɔr za a Naaŋmɩn na ŋmɛ̃ a, ɛ́ ʋlɛ n'ʋ nyɔw a tẽ-daa tɛr nɩ a ʋ ƴɛ̀rʋ fãw. Ʋ na wa pɛ́w a nɩsaalbɛ yel-bebe dɛwr bɛr baar'a, ʋ zɩ̃ n a Naaŋmɩn na ɩ kpɛ̃ɛ kpɛ̃ɛ za a dʋrʋ lowr a saa-zu.

⁴A Bie wa ɩ n kpɛ̃ɛ zuo a malkɩ mɩnɛ, a Naaŋmɩn kʋ̀ ʋ yúor na zuo a bɛ dem a.

⁵Bʋ̃ʋ n'ʋ vɛ̃, malkɩ buor'ʋ a Naaŋmɩn dãw yel: «Ɩ̃ bie nɛ b, ɩ̃ dɔw fʋ nɩ a dɩ̃a?» Lɛ nɩ kɛ́: «Ɩ̃ na ɩ n sãà a ʋ zie, ʋʋ ɩ bie a ɩ̃ zie?[1]»

⁶Ɛcɛ a lɛn daar a Naaŋmɩn na tɩ ƴãw a ʋ Bi-dãw-dɔwra ʋ waar a tẽ-daa zu a, ʋ tɩ yere na: «A Naaŋmɩn malkɩ mɩnɛ za, bɛ gbine dume a ʋ niŋé[2].»

⁷A malkɩ mɩnɛ ƴãw a, ʋ yel'ɩ à ŋá: «A Naaŋmɩn mɩ́ ɩ na a ʋ malkɩ mɩnɛ ɩ sɛsɛb, ɛ́ a ʋ tõ-tõ-biir ɩ vũu-zɛlɛ[3].»

⁸Ɛcɛ a ʋ Bie ƴãw a, à ŋá n'a ʋ yel: «Naaŋmɩn i, dɩ̃a nɩ bio a, a fʋ naalʋ-dà-kɔw ba na, fʋ kaarɛ nɩ a fʋ naalʋ-tẽw zie nɩ mɩnʋ.

⁹Fʋ nɔnɛ nɩ a mɩnʋ ɛ́ hɩ̃ɛn a faalʋ, alɛ so a Naaŋmɩn, a fʋ Naaŋmɩn, cir a cɩlʋ kãá ƴãw a fʋ zũú kaa ír'ɩ fʋ a ʋ ƴãw, ɛ́ bɛr a fʋ taabɛ.»[4]

¹⁰Ʋ mɩ̀ cãà na lɛb yel: «Sore e, fʋ̃ʋ n'ʋ ír a tẽw a pɛr-tib daar, ɛ́ a salom ɩ a fʋ nuru bʋ̃-maala.

¹¹Al na wɛ na, ɛcɛ fʋ̃ʋ be na. A za na kor'a mɛ̃ kparʋ a,

¹²fʋ na pili pili a na mɛ̃ kpar-kpɛ̃ɛ a, fʋ na lɩɛr'a na mɛ̃ kparʋ a, ɛcɛ fʋ̃ʋ ŋmɛ̃ n fʋ ŋmɛ̃a, ɛ́ a fʋ yome bɛ tɛr baarʋ daar ɛ.»[5]

¹³Ɛ́ malkɩ buor sob'ʋ a Naaŋmɩn dãw yel: «Zɩ̃ a ɩ̃ dʋrʋ lowr, ɛ́ gù ɩ̃ wa tɩ fɛr a fʋ dɔ̃ dem ƴãw bɛ lɩɛbɩ a fʋ gbɛ́ɛ dɔwlʋ zie?[6]»

¹⁴A malkɩ mɩnɛ za bɛ ɩ bʋ̃-vʋbɛ na tɛr tõ-nɛ́ɛ, Naaŋmɩn mɩ́ tõ kɛ́ bɛ tɩ sõw a bɛlɩ dem na na nyɛ̃ a faafʋ a ɩ?