Read Dagara, Northern Ebre 12 Bible Online

Ebre 12 - Dagara, Northern bible

Ebre 12

¹A na ɩ à ŋá a, a tɩɩm mɩ̀ na tɛr yel-mɩn dem bɛ jil koli tɩ sɛw à ŋá za a, nyɩ ɩ tɩ lɔb tuor za na gbine a tɩ cenu a bɛr, nɩ a yel-bier na bɛ mɩ́ yaa kɛ́ nyɔw tɩ a, ɛ́ dɩ kanyir zɔrɛ nɩ a dãw-taa zɔba bɛ na yel kɛ́ tɩ zɔrɛ a.

²Tɩ tori niwn jɩ́rɛ a Yeezu na ɩ a tɩ sàw-deb tib zie nɩ a nʋɔr kʋb zie a. Ʋ bɛr'ɩ a nʋ̃ɔ̀ ʋ na tɩ so a, ɛ́ bɛ zɔ vĩ ɛ, ɛ́ sàw kpi a da-gara zu. Ƴɛrɛŋa a, ʋ zɩ̃ n a Naaŋmɩn naalʋ-dà-kɔw dʋrʋ lowr.

³Nyɩ lɛb tɩɛrɩ a ʋ yele, a lɛ a yel-bebe dem na bɛ tɩ de a ʋ yele towtow, ʋʋ dɩ kanyir a. Lɛ n'a nyɩ kʋ̃ sàw a bàlʋ tʋ̃ɔ́ nyɩ ɛ.

⁴A zɛbr nyɩ na zɛbr'ɩ a yel-bier a, nyɩ cãà bɛ zɛb tɩ kpi n sɛr ɛ,

⁵ɛ́ yiiri a kpaalʋ ŋa a Naaŋmɩn na kpaalɛ nyɩ mɛ̃ a ʋ bibiir a bɛr: «Ɩ̃ bie e, ta de a Sore kpãàfʋ ʋ ɩ bʋ̃-zaalɛ ɩ, fʋ̃ʋ wa sãw ʋ yere fʋ a, ta tɛr pʋ-sãwna ɩ.

⁶Bʋ̃ʋ n'ʋ vɛ̃, a Sore mɩ́ kpãa nɩ a sob nɛ ʋ na nɔnɛ a, ʋ mɩ́ fɔb'ɩ sob nɛ ʋ na de ʋ ɩ a ʋ bie a.»[39]

⁷A tuo nyɩ na wone a, a nyɩ kpãàfʋ ƴãw n'a. A Naaŋmɩn ɩrɛ nɩ a nyɩ zie mɛ̃ a ʋ bibiir a. Ɛcɛ bi-buor sob'ʋ a sãà bɛ mɩ́ kpãa?

⁸A Naaŋmɩn bɛ wa kpãanɛ nyɩ mɛ̃ a lɛ ʋ na kpãanɛ a ʋ bibiir za a, nyɩ ɩ n zɩ̃-yir-bibiir, nyɩ bɛ ɩ a bibiir tɛɛ za ɩ.

⁹Tɩ tɩ tɛr'ɩ a tɩ sãà mɩnɛ a tẽw zu ka, bɛ kpãànɛ tɩ, ɛ́ tɩ ƴãwnɛ bɛ, ɛ́ bɛ nãà yere a tɩ Sãà na be a tẽ-vla pʋɔ a? A fɛr'a kɛ́ tɩ sàwr a ʋ nʋɔr, ʋʋ kʋ̀ tɩ a nyɔ-vʋʋrʋ.

¹⁰A tɩ sãà mɩnɛ mɩ́ tɩ kpãà tɩ nɩ blãlɛ ƴãw, mɛ̃ a lɛ bɛ na mɩ́ tɩ nyɛ̃ a sɛw taa nɩ a. Ɛcɛ a Naaŋmɩn ʋl a, a tɩ vla ƴãw n'a ʋ mɩ́ kpãànɛ tɩ, kɛ́ tɩ tʋ̃ɔ́ pʋɔ a ʋ sonu pʋɔ.

¹¹Kpãàfʋ za a ʋlɩ pɛr nɛ pʋɔ bɛ mɩ́ sãá ɩ nʋ̃ɔ̀ yel ɛ, pʋ-sãwna mɩ́ n'a. Ɛcɛ a pùorí a, a mɩ́ ɩ n ƴã-ɓaarʋ nɩ mɩnʋ a bɛlɩ dem na nyɛ̃ a kpãàfʋ a zie.

¹²A na ɩ lɛ a, nyɩ lɛb dɔl a nyɩ kpãkpamɛ na yʋɔrɛ a, nɩ a nyɩ dume na màwr a.

¹³Nyɩ maalɩ soli-dẽdẽ a nyɩ gbɛ́ɛ ƴãw, a wʋba gbɛ́r taa nʋrɛ ɩ, ʋʋ nɩ̃ɛ sanɩ.

¹⁴Nyɩ ƴãw fãw a ƴã-ɓaarʋ be nyɩmɛ nɩ a nɩbɛ za cara pʋɔ, ɛ́ nyɩ bɔbr a sonu, bʋ̃ʋ n'ʋ vɛ̃, ʋlɛ bɛ wa ka be a, nɩr za kʋ̃ tʋ̃ɔ́ nyɛ̃ a Sore ɩ.

¹⁵Nyɩ gù vla nɩr za taa gùre pùor cɔwr a Naaŋmɩn maalʋ ɛ, nɩr za taa wa ɩ mɛ̃ tɩ-nyɩwr-tuo na bule sãwnɛ nɩ-yaga bɛrɛ a ɩ.

¹⁶Nyɩ gù vla kãw za taa wa ɩ pɩ̃ɔ-yel-maalɛ ɩ, bɩɩ ɩrɛ a bʋ̃-son laar mɛ̃ a Ezawu a ɩ. Ʋ tɩ de nɩ a ʋ kpɛ̃ɛnʋ tɛw nɩ bʋ̃-dɩrɩ daƴen yõ ƴãw.

¹⁷Nyɩ bãwnɩ a na, a pùorí ʋ na wa bɔbr k'aa ʋ sãà ƴɛ̀r nɔ-vla kʋ̀ ʋ a, ʋ bɛ sàw a lɛ kʋ̀ ʋ ɛ. Ʋ tɩ bɔ n a lɛ ʋ na na ɩ lɩɛbɩ a yele a gu, ʋ na saa tɩ lɔbr nuru zɛlɛ kone nɩ a.

¹⁸Nyɩ bɛ taw pɩɛlɩ bom bɛ na na tʋ̃ɔ́ tɔ a ɩ: a Sinayi tãw nɩ a ʋ vũu na dɩrɛ a, a lige nɩ a ulu, a sɛsɛb kpɛ̃ɛ,

¹⁹wɩ́ɛ kɔkɔr nɩ nɩr kɔkɔr ɛ. A Ɩsɩrayɛl bibiir na tɩ wõ a kɔkɔr ŋa a, bɛ tɩ zɛlɛ na kɛ́ ƴɛ̀rʋ ta lɛb ƴɛ̀r dɔwlɩ ɛ.

²⁰Bʋ̃ʋ n'ʋ vɛ̃, bɛ bɛ tɩ tʋɔr tɛrɛ a nʋɔr ŋa na tɩ ƴãw a ɩ: «Dʋ̃w saa wa n'ʋ tɔ a tãw a, bɛ na lɔb'ɩ ʋ nɩ kʋsɛbɛ kʋ.»

²¹A yel bɛ na tɩ nyɛ̃ a tɩ sɩrɩ na ɩrɛ dɛ̃bɩ̃ɛ yaga, a Moyiir yel: «Dɛ̃bɩ̃ɛ ɩrɛ mɛ̃ na ɩ̃ màwr.»[40]

²²Sɩyɔ̃ tãw n'ʋ nyɩ taw pɩɛlɩ, nɩ a Naaŋmɩn na vʋʋrɛ a tẽ-kpɛ̃ɛ, a tẽ-vla pʋɔ Zerizalɛm nɩ a ʋ malkɩ tu-tu-túr.

²³Nyɩ taw na pɩɛlɩ cuw-dɩrbɛ lãw, a Naaŋmɩn bi-dãw-dɔwrɩ[41] a yée na sɛb a tẽ-vla pʋɔ a. Nyɩ taw na pɩɛlɩ a Naaŋmɩn na ɩ a nɩbɛ za ƴɛ̀r-maalɛ a, ɛ́ taw pɩɛlɩ a nɩ-mɩn bɛl na nyɛ̃ a vɩɛlʋ baarɩ a sɩ́ɩr.

²⁴Nyɩ taw na pɩɛlɩ a Yeezu na ɩ a Wõ-ta-paala lɔ̃lʋɔrɛ a, nɩ a ʋ zɩ̃ɩ na cir a, a zɩ̃ɩ á ŋá na ƴɛ̀rɛ vla zuo a Abɛl dem a.

²⁵Nyɩ gù vla taa wa zawrɛ a sob nɛ na ƴɛ̀rɛ a nyɩ zie a ƴɛ̀rʋ bɛr-wob ɛ. Bʋ̃ʋ n'ʋ vɛ̃, a bɛlɩ dem na tɩ zawrɩ a sob nɛ na kpãànɛ bɛ a tẽw zu ka a bɛr a, bɛ bɛ cɩ̃ɛ ɩ, ɛ̀ bɛ nãà yere a tɩɩm ɩ, tɩ mɩ̀ kʋ̃ cɩ̃ɛ ɩ, tɩmɛ wa gùr pùor cɔw a sob nɛ na be a tẽ-vla pʋɔ ɛ́ ƴɛ̀rɛ a tɩ zie a.

²⁶A koro za a, a Naaŋmɩn kɔkɔr tɩ dam'ɩ a tẽw, ɛcɛ ƴɛrɛŋa a, ʋ yel'ɩ à ŋá: «Ɩ̃ na lɛb'a baa dam a tẽw lãwnɩ a salom.»[42]

²⁷A ƴɛ̀r-bie á ŋá: «lɛb'a baa» wul'a k'aa bʋ̃-íri na dam'a ɛ́ bɔr, k'aa bom ʋl na bɛ tɛr damnʋ a be be.

²⁸A na ɩ à ŋá tɩ páwr naalʋ-tẽw na bɛ tɛr damnʋ a, nyɩ ɩ tɩ tɛr a maalʋ ŋa vla, tʋ̃ɔ́ puore nɩ a Naaŋmɩn mɛ̃ a lɛ a na nʋmɛ a ʋ zie a, tɛr'ɩ a ʋ ƴãwfʋ nɩ a ʋ zɔba.

²⁹Bʋ̃ʋ n'ʋ vɛ̃, a tɩ Naaŋmɩn ɩ n vũu na dɩrɛ a.