Read Dagara, Northern Ebre 3 Bible Online

Ebre 3 - Dagara, Northern bible

Ebre 3

¹Yɛbr kɩrɩta-nɩbɛ ɛ, a Naaŋmɩn so nyɩ, ʋl na bʋɔlɩ nyɩ a. A na ɩ lɛ a, nyɩ jɩ́rɛ a Yeezu na ɩ a naaŋmɩn-sàw-deb tɩ na hiere a nɩ-tona nɩ abàwr-maal-kara a.

²Sɩza n'a, a Naaŋmɩn na kʋ̀ ʋ a tõ-nʋɔr ŋa a de nɩ a ʋ yele, mɛ̃ a lɛ tɔr za ʋ na tɩ de a Moyiir yele a ʋ yir za pʋɔ a[10].

³A yir-mɩɛrɛ mɩ́ nyɛrɛ nɩ ƴãwfʋ zuo a yir tɔr za. Lɛ n'a a Yeezu mɩ̀ sɛw k'ʋʋ tɛr yúor-vɩɛlʋ-danʋ na gãw a Moyiir dem a.

⁴Yir za mɩ́ sɩrɩ na tɛr a ʋ mɩɛrɛ, ɛ́ Naaŋmɩn n'ɩ bom za mɩɛrɛ.

⁵A Moyiir a, a Naaŋmɩn tɩ de nɩ a ʋ yele a ʋ yir za pʋɔ mɛ̃ tõ-tõ-bie na na dɩ a ƴɛ̀rʋ a Naaŋmɩn na na ƴɛ̀r a dãsɩɛ a.

⁶Ɛcɛ a Kɩrɩta ʋl a, Naaŋmɩn de nɩ a ʋ yele mɛ̃ Bie na ɩ a Naaŋmɩn yir sob a. Ɛ́ tɩmɛ n'ɩ a yir dem, tɩmɛ wa ɓãá ƴãw bɛr tɩɛrʋ, ɛ́ a tɩ nyʋ̀ʋ́r ɩ a tɩɛrʋ tɩ na ƴãw a Naaŋmɩn ƴãw a.

⁷Lɛ so, mɛ̃ a lɛ a Vʋʋrʋ Sõw na yel a: «A dɩ̃a bibir a, nyɩmɛ wa wõ a Naaŋmɩn kɔkɔr a,

⁸nyɩ ta kpãa tobr mɛ̃ a lɛn daar nyɩ na tɩ zɛbr'ɩ ʋ a ɩ, a ʋlɩ bibir nyɩ na tɩ ɩ ʋ kaa a wɛja-kpalɛ pʋɔ a ɩ.

⁹A be a, a nyɩ sãàkʋm-kore tɩ jɩ̃ mɛ̃ na kɛ́ bɛ ɩ m kaa, ɛ́ bɛ tɩ nyɛ̃ nɩ a ɩ̃ tome

¹⁰yome lɩz'a ayi. A lɛ n'a so ɩ̃ nyɛ̃ nɩ a nɩbɛ bɛ ŋa suur ɛ́ yel: “Kʋralɛ n'a a bɛ tɩɛrʋ bɔrɛ, bɛ bɛ bãw a ɩ̃ sɛ́ɛ ɩ.”

¹¹Lɛ n'a ɩ̃ nyɛ̃ suur pɔ à ŋá: bɛ bɛ be za na ta a ɩ̃ pɩ̃ɛnʋ zie ɩ!»[11]

¹²Yɛbr i, nyɩ gù vla k'aa nyɩ kãw za taa wa tɛr soci-faa na bɛ sàw de a, ʋ wa bʋ́r ʋlɛ nɩ a Naaŋmɩn na vʋʋrɛ a ɩ.

¹³A na ɩ lɛ a, a «Dɩ̃a bibir» ŋa yúor na cãà pore a, nyɩ kpaalɛ taa bibir za, k'aa yel-bier taa wa bɛlɩ a nyɩ been kãw za ʋ kpãa tobr ɛ.

¹⁴Bʋ̃ʋ n'ʋ vɛ̃, tɩ lɩɛb'ɩ a Kɩrɩta taabɛ, tɩmɛ wa tɛr a tɩ tɩɛrʋ kpɛ̃w za tɩ ta n a baarʋ daar a.

¹⁵Bɛ yel'ɩ à ŋá: «A dɩ̃a bibir nyɩmɛ wa wõ a Naaŋmɩn kɔkɔr a, nyɩ ta kpãa tobr mɛ̃ a lɛn daar nyɩ na tɩ zɛbr'ɩ ʋ a ɩ[12].»

¹⁶Ɛcɛ ã-mɩnɛ nɛbɛ tɩ wõ a Naaŋmɩn kɔkɔr ɛ́ zɛb'ɩ ʋ? A bɛlɩ dem za a Moyiir na tɩ tɛr yi n a Eziptɩ tẽw a bɛ nɛbɛ ɩ?

¹⁷Ɛ́ ã-mɩnɛ nɛbɛ a Naaŋmɩn tɩ nyɛ̃ nɩ suur yome lɩz'a ayi? A bɛlɩ dem na tɩ maalɩ a yel-bier ɛ́ lo kpi a wɛja-kpalɛ pʋɔ a bɛ nɛbɛ ɩ?

¹⁸Ɛ́ ã-mɩnɛ zie n'a a Naaŋmɩn tɩ pɔ kɛ́ bɛ kʋ̃ ta a ʋ pɩ̃ɛnʋ zie, a bɛ ɩ a bɛ-wonbɛ bɛ ŋa zie n'a![13]

¹⁹Ɛ́ tɩ sɩrɩ na nyɛ̃ kɛ́ bɛ bɛ tʋ̃ɔ́ ta a pɩ̃ɛnʋ ŋa zie ɩ, a bɛ na bɛ sàw de a zũú.