Read Dagara, Northern Ebre 5 Bible Online

Ebre 5 - Dagara, Northern bible

Ebre 5

¹Naaŋmɩn bàwr-maal-kara za a, a nɩsaalbɛ pʋɔ n'a bɛ mɩ́ kaa ír ʋ a nɩsaalbɛ ƴãw, a bɛ Naaŋmɩn yele kaafʋ pʋɔ, k'ʋʋ mɩ́ tɩr a de-kʋ̀b bome ɛ́ maalɩ bàwr a yel-bebe suur páwfʋ ƴãw.

²Ʋ na tʋ̃ɔ́ na mɩ́ bãw a pɛr kʋ̀ a bɛlɩ dem na ɩ zɔn a, nɩ a bɛlɩ dem na mɩ́ tule a, ʋl mɩŋa a bãbàalʋ na fɛrɛ a ƴãw.

³Ɛ́ a ʋl mɩŋa na ɩ bãbàal a ƴãw n'a a fɛr k'ʋʋ mɩ́ maalɩ a bàwr a ʋl mɩŋa yel-bebe ƴãw, mɛ̃ a lɛ ʋ na mɩ́ maalɩ a nɩbɛ dem ƴãw a.

⁴Nɩr bɛ n'ʋ mɩ́ kʋ̀ ʋ tʋɔra a bàwr-maal-kara ƴãwfʋ ɛ, Naaŋmɩn n'ʋ mɩ́ bʋɔlɩ a sob ƴãw ʋ, mɛ̃ a lɛ a na tɩ ɩ a Aarɔ̃ zie a.

⁵À ŋá n'a a Kɩrɩta mɩ̀ bɛ kʋ̀ ʋ tʋɔra a bàwr-maal-kara ƴãwfʋ ɛ. A Naaŋmɩn na ƴɛ̀r à à ŋá a ʋ zie a, ʋlɛ n'ʋ kʋ̀ ʋ: «Ɩ̃ bie nɛ b, ɩ̃ dɔw fʋ nɩ a dɩ̃a[15].»

⁶Ʋ mɩ̀ lɛb yel'ɩ a Sɛb-sõw pʋɔ zie kãw: «Fʋ ɩ n Naaŋmɩn bàwr-maalɛ na be kʋralɛ a Mɛlkɩsedɛkɩ pal pʋɔ a[16].»

⁷A ʋ tẽw zu ka nyɔ-vʋʋrʋ daar a, a Kɩrɩta tɩ ŋmɛ n cɛlsɩ cir'ɩ mʋta-kʋ̃ɔ, ɛ́ puori lɔb'ɩ nuru zɛlɩ nɩ a Naaŋmɩn yãayãa, ʋl na na tʋ̃ɔ́ faa ʋ a kũu pʋɔ a. A Naaŋmɩn tɩ sàw na de a ʋ puoru, a Kɩrɩta na ƴãwnɛ ʋ a zũú.

⁸Nɩ a Naaŋmɩn Bie za ʋ na ɩ a, ʋ zànɩ nɩ a nʋɔr-sàwfʋ a tuo ʋ na wõ a pʋɔ.

⁹Ʋʋ na wa páw a ʋ vɩɛlʋ za baar'a, ʋ lɩɛb'ɩ a faafʋ na be kʋralɛ a yib zie, a bɛlɩ dem za na sàwr a ʋ nʋɔr a ƴãw.

¹⁰Bʋ̃ʋ n'ʋ vɛ̃, a Naaŋmɩn yel'a k'ʋʋ ɩ n bàwr-maal-kara a Mɛlkɩsedɛkɩ pal pʋɔ.

¹¹A yel ŋa ƴãw a, tɩ tɛr'ɩ yel-yaga na yel, ɛ́ a pɛ́ɛ íru kpɛmɛ, a nyɩ na kpɛ vanana a wob ƴãw a zũú.

¹²A lɛn daar za wa tɔ ka a, a tɩ sɛw na kɛ́ nyɩ ɩ wul-wulbɛ, ɛcɛ nyɩ cãà na bɔbr kɛ́ nɩr wule nyɩ a Naaŋmɩn ƴɛ̀rʋ yele al bɛ na mɩ́ zànɩ a pɛr-tib daar a. Nyɩ ɩ n lɛɛɛ wa tɩ cãà bɔbr bʋ̀rʋ, ɛ́ bɛ bɔbr saab[17] ɛ.

¹³Sob nɛ za na cãà bɔbr bʋ̀rʋ a, bi-pɩɩla n'ʋ, ʋ bɛ bãw a mɩnʋ ƴɛ̀rʋ yele ɩ.

¹⁴A nɩ-bɛrɛ bɛl a, saab'ɩ a bɛ bʋ̃-dɩra, bɛl na mili nɩ a bɛ tɩɛrʋ a vla nɩ a faa owru a.