Read Dagara, Northern Ebre 6 Bible Online

Ebre 6 - Dagara, Northern bible

Ebre 6

¹A na ɩ lɛ a, nyɩ ɩ tɩ bɛr a Kɩrɩta yele al bɛ na mɩ́ tĩ zànɩ a, ɛ́ tu wulu na sɛwnɩ nɩ-bɛrɛ a pùor, tɩ bɛ lɛb dier a wulu pɛr-sʋ̃ɔfʋ yele ɩ: a lɩɛbɩ-a-ɩb bɛr a ɩ-faar na waar'ɩ kũu a, nɩ a naaŋmɩn-sàw-deb,

²a wulu na càarɩ a suob a, nɩ a nuru ír-dɔwlʋ yele, a kũuni-pʋɔ-lɛb-yibu nɩ a ƴɛ̀r-pɛ-baara maalʋ.

³À à ŋá n'a tɩ na ɩ, Naaŋmɩn wa sàw a.

⁴Nɩbɛ na dãw páw a cãà a, na lɛm a saa-zu maalʋ kaa a, na páw a Vʋʋrʋ Sõw a,

⁵na nyɛ̃ a lɛ a Naaŋmɩn ƴɛ̀rʋ na nʋmɛ a, na bãw a lɛ a nɩdaar zie kpɛnʋ na ŋmɛ̃ a,

⁶ɛ́ lɛb de a bɛ nyɔ-vʋʋr-kʋra a, a bɛ tɛr bɛ na lɛb lɩɛbɩ a bɛ ɩb a gb'a ayi sob ƴãw ɛ, bɛl tɛɛ za n'a mɩ́ lɛb kparɛ a Naaŋmɩn Bie a da-gara zu, ɛ́ yi n ʋ yẽw ƴãw bɛ tʋʋr.

⁷Tẽsɔw saa na waar ƴãwn kʋralɛ, ʋʋ búle bʋ̃-buli na tɛr yel-ɩra a bɛlɩ dem na ƴãw bɛ kʋɔr ʋ a zie a, Naaŋmɩn mɩ́ maalɛ ʋ na.

⁸Ɛcɛ ʋlɛ wa búle gʋʋr nɩ karnyã a, ʋ bɛ tɛr pɛr ɛ, Naaŋmɩn kʋ̃ yaa kɛ́ ŋmɛ ƴãw ʋ ɛ, ɛ́ nyɩwfʋ n'a bɛ nãà baa nyɩw ʋ bɛr.

⁹Nyɩɩm ƴãw a, ɩ̃ bá mɩnɛ ɛ, tɩ na saa ƴɛ̀rɛ à à ŋá a, tɩ bãwnɩ a n'a nyɩ na lo a sɔr-vla a, a faafʋ sɔ́r.

¹⁰Naaŋmɩn ɩ n nɩ-mɩŋa, ʋ kʋ̃ yiiri a nyɩ tome bɛr ɛ, nɩ a ʋ nɔ̃wfʋ nyɩ na wul ʋ sãá, nyɩ na tɩ dãw kaa kɩrɩta-nɩbɛ zie ɛ́ cãà kaarɛ a bɛ zie a ƴɛrɛŋa a.

¹¹Ɛcɛ tɩ bɔbr'a kɛ́ nyɩ za been been mɩ́ cãà tʋlɛ a lɛ tɩ ta n a baarʋ daar, kɛ́ a tɩɛrʋ nyɩ na ƴãw a Naaŋmɩn ƴãw a, tʋ̃ɔ́ maalɩ ʋ za vla.

¹²A na ɩ lɛ a, nyɩ taa kpɩɛr ʋnʋnʋ ɛ, ɛcɛ nyɩ cɔwrɛ a bɛlɩ dem na mɩ́ dɩ kanyir sàw de, ɛ́ mɩ́ páw a ʋlɩ bom nɛ a Naaŋmɩn na ƴãw nʋɔr k'ʋʋ na tɩr a a.

¹³A lɛn daar a Naaŋmɩn na tɩ ƴãw a ʋ nʋɔr kʋ̀ a Abraham a, a ʋl mɩŋa n'ʋ ʋ tɩ pɔ n, ʋ na bɛ tɩ nyɛ̃ nɩr ʋ ɩ kpɛ̃ɛ zuo ʋ, ʋ na pɔ n a.

¹⁴Ʋ tɩ yel a: «Yel-mɩŋa za, ɩ̃ na maalɩ fʋ na, ɛ́ ɩ a fʋ bʋʋrɛ bɛ yãwmɛ yaga za[18].»

¹⁵A Abraham na tɩ dɩ kanyir ɛ́ gù a, ʋ nyɛ̃ nɩ a Naaŋmɩn nʋɔr ʋ tu.

¹⁶Nɩr na ɩ kpɛ̃ɛ zuo bɛ a n'ʋ a nɩsaalbɛ mɩ́ pɔ n, ɛ́ a pɔb'a bɛ mɩ́ pɔ, ɩ nɔkpɛn za baarɩ a bɛ cara pʋɔ.

¹⁷Ɛcɛ a Naaŋmɩn tɩ bɔbr'a k'ʋʋ wul cãàmɩlɛ a bɛlɩ dem na na páw a nʋɔr ʋ na ƴãw a maalʋ a, k'aa lɛ ʋ na yel a bɛ tɛr lɩɛbʋ ɛ. A lɛ n'a so ʋ tɩ ƴãw a nʋɔr pɔ n.

¹⁸A na ɩ à ŋá a, yele ayi na bɛ tɛr lɩɛbʋ a pʋɔ, Naaŋmɩn na kʋ̃ tʋ̃ɔ́ ŋmãa ziri a, alɛ n'a kʋ̀rɛ tɩ sõwfʋ kpɛ̃ɛ a tɩɩm na zɔ sɔwlɩ a ʋ zie a. Lɛ n'a tɩ na tʋ̃ɔ́ nyɔw a tɩɛrʋ tɩ na ƴãw a Naaŋmɩn ƴãw a kpɛ̃w za, a tɩɛrʋ ŋa bɛ na kʋ̀rɛ tɩ a.

¹⁹A tɩɛrʋ ŋa a Naaŋmɩn ƴãw a, ʋ ɩ na mɛ̃ a tɩ nyɔ-vʋʋrʋ gbor kpawbir[19] a, bʋnʋ bɛ ka a ʋ ƴãw ɛ, ʋʋ kpɛmɛ, ɛ́ mɩ́ tɔl kpɛ a zi-sõw pʋ̃ɔmɩ za, a pɛn na yawlɩ a pùorí,

²⁰be a Yeezu na de tɩ niwn tɩ kpɛ a tɩɩm ƴãw a, ʋl na lɩɛbɩ bàwr-maal-kara na be kʋralɛ a Mɛlkɩsedɛkɩ pal pʋɔ a.