Read Dagara, Northern Ebre 9 Bible Online

Ebre 9 - Dagara, Northern bible

Ebre 9

¹A wõ-ta-dãw-niwn sob tɩ tɛr'ɩ a Naaŋmɩn puoru pɔ́lɛ́ nɩ Ŋmɩn-yir-kpɛ̃ɛ na ɩ tẽw zu ka dem a.

²Bʋ̃ʋ n'ʋ vɛ̃, bɛ tɩ maal'ɩ pɛn-sɛw na tɛr diru ayi a. A di-dãw-niwn sob bɛ na bʋɔlɛ kɛ́ zi-sõw a pʋɔ, a fɩ̃tɩlɛ dɔwlʋ zie tɩ be n be, nɩ a tabal ʋl zu bɛ na mɩ́ dɔwlɩ a dipɛ̃ bɛ na de kʋ̀ a Naaŋmɩn a.

³A diru ayi sob bɛ na bʋɔlɛ kɛ́ zi-sõw-za-zi-sõw a be n a pɛnɛ ayi sob bɛ na 'lẽ yawlɩ a pùorí.

⁴A ʋ pʋɔ n'a a salm-zɩɛ bàwr-maal-kuur be, a ʋl zu bɛ na mɩ́ nyɩw a tɩ-suur-zɔ̃-na-nyùur-vla-vla-a. A ʋ pʋɔ mɩ̀ n'a a Wõ-taa daga bɛ na nyɩl salm-zɩɛ pàw ʋ za a mɩ̀ be, ɛ́ a daga pʋɔ a, a salm-zɩɛ duwle na ƴãw a mãan a, nɩ a Aarɔ̃ dabɔl na tɩ pu a, nɩ a kʋsɛ-pamɛ zu a Wõ-taa nɛ-ƴãwnɩ na tɩ sɛb ƴãw a, tɩ be n be.

⁵A Wõ-taa daga zu a, malkɩ mɩnɛ bɛ na bʋɔlɛ Seribɛ̃ a tɩ be n be wule a Naaŋmɩn yúor-vɩɛlʋ-danʋ. A tɩ dɔl'ɩ a pɩgɛ ɓaarʋ pàw a zie ʋl bɛ na mɩ́ mɩr a zɩ̃ɩ a yel-bebe suur páwfʋ ƴãw a. Ɛcɛ ka bɛ n'a tɩ na ƴɛ̀r à á ŋá za ƴɛ̀rʋ wɛwrɩ ɛ.

⁶A yele za na cɔbrɩ bin à à ŋá a, a bàwr-maalbɛ mɩ́ kpɩɛr'ɩ kʋralɛ a di-dãw-niwn sob pʋɔ a bɛ tome tob ƴãw.

⁷Ɛcɛ a ayi sob pʋɔ a, a bàwr-maal-kara yõ n'ʋ mɩ́ kpɛ, gb'a been a yũon za, ʋʋ bɛ kpɩɛr a be ɛ́ bɛ tɛr dʋ̃w zɩ̃ɩ kpɛ n tɩ de kʋ̀ a Naaŋmɩn ɛ, a ʋl mɩŋa sãwna ʋ na bɛ bãwnɩ kɛ́ sãw a ƴãw, nɩ a nɩbɛ dem ƴãw ɛ.

⁸À ŋá n'a a Vʋʋrʋ Sõw wul, kɛ́ lɛn daar za a di-dãw-niwn sob na cãà be a, a zi-sõw-za-zi-sõw sɔ́r cãà bɛ yuo sɛr ɛ.

⁹Zʋkpar'ʋ a dɩ̃a zie ŋa ƴãw: a pɛr lɛ kɛ́ de-kʋ̀b bome tɩrɛ na, bagɛ maalɛ kʋ̀rɛ a Naaŋmɩn, ɛ́ a kʋ̃ tʋ̃ɔ́ ɩ a sob nɛ na ƴãwnɛ a Naaŋmɩn à à ŋá a, a ʋ pʋɔ vɩɛl ɛ.

¹⁰Nɩsaalbɛ tub tɛwr'a, na càarɩ bʋ̃-dɩrɩ, bʋ̃-nyúuri nɩ dɛwr-so-bɛrʋ bʋʋrɛ a, alɛ n'a be be na tɩ ta a lɛn a Naaŋmɩn na na lɛb maalɩ a yele za ƴãw a.

¹¹Ɛcɛ a Kɩrɩta wa na mɛ̃ a yel-vɩɛlɩ na waar a bàwr-maal-kara. Pɛn-sɛw na ɩ kpɛ̃ɛ ɛ́ vɩɛl zuo a pʋɔ n'a ʋ kpɛ, pɛn-sɛw na bɛ ɩ nɩsaalbɛ nuru bʋ̃-maala a, a pɛr lɛ kɛ́ na bɛ ɩ tẽw zu ka bʋ̃-íra a.

¹²Bʋ̀rɩ nɩ náli zɩ̃ɩ bɛ n'a a Kɩrɩta kpɛ n a zi-sõw-za-zi-zõw pʋɔ gb'a been daadaa ɩ, a ʋl mɩŋa zɩ̃ɩ n'a ʋ kpɛ n, ya de nɩ tɩ a baarɩ.

¹³A bʋrɩ nɩ a nadɛɛ zɩ̃ɩ nɩ a na-nyãw tãpɛlʋ bɛ na mɩ́ mɩr a bɛlɩ dem na tɛr dɛwr a, alɛ mɩ́ wa ɩ bɛ lɛb vɩɛl a zikue a,

¹⁴a Kɩrɩta zɩ̃ɩ na ɩ n ŋmɩn bɛ ɩ gãw lɛ? Ʋl a Vʋʋrʋ na be kʋralɛ a na ƴãw ʋ de ʋ tʋɔra kʋ̀ a Naaŋmɩn mɛ̃ bàwr-maal-bom na bɛ tɛr dɛwr a, a ʋ zɩ̃ɩ na pɛ́w nɩ a tɩ pʋɔ dɛwr bɛr a ɩ-ɩrɩ na waar'ɩ kũu a na ƴãw tɩ a, kɛ́ tɩ tʋ̃ɔ́ tone a Naaŋmɩn na vʋʋrɛ a tome.

¹⁵À ŋá n'a a Kɩrɩta ɩ Wõ-ta-paala lɔ̃lʋɔrɛ. Ʋ na kpi k'ʋʋ ír a wõ-ta-dãw-niwn sob daar nʋɔr zawrʋ sãwna bɛr a, a bɛlɩ dem a Naaŋmɩn na bʋɔlɩ a na tʋ̃ɔ́ na mɩ́ páw a yel-vɩɛlɩ na be kʋralɛ a Naaŋmɩn na yel k'ʋʋ na kʋ̀ n a ʋ nɩbɛ a.

¹⁶Be kũu daar pʋ-tɩɛrʋ sɛbɛ na be a, a fɛr'a kɛ́ bɛ wul k'aa sɛb-maalɛ kpi na.

¹⁷Kũu wa kpi baar'a n'a kũu daar pʋ-tɩɛrʋ sɛbɛ mɩ́ tu. A sɛb-maalɛ wa cãà vʋʋrɛ a, a sɛbɛ kʋ̃ tʋ̃ɔ́ tu ɛ.

¹⁸À ŋá n'a a wõ-ta-dãw-niwn sob tɔr za bɛ maalɩ ɛ́ zɩ̃ɩ bɛ cir ɛ.

¹⁹A Moyiir tɩ de nɩ niwn manɩ a Naaŋmɩn nɛ-ƴãwnɩ za, mɛ̃ a lɛ a Naaŋmɩn wulu na ƴãw a, kʋ̀ a nɩbɛ za. Al pùorí, ʋ de a náli nɩ bʋrɩ zɩ̃ɩ lãw nɩ kʋ̃ɔ, ɛ́ de pi-kɔbl-zɩɩr nɩ tɩɛ kãw bɛ na bʋɔlɛ ɩzɔpɩ a váar mɩr'ɩ a sɛbɛ tɔr za nɩ a nɩbɛ za,

²⁰ɛ́ yel: «A wõ-taa zɩ̃ɩ n'ɩ à á ŋá, a wõ-taa a Naaŋmɩn na yel kɛ́ nyɩ tuur a[27].»

²¹Ʋ mɩ̀ tɩ mɩr'ɩ a pɛn-sɛw nɩ a bàwr-maalʋ tõ-tõ-bome za nɩ a zɩ̃ɩ.

²²A Naaŋmɩn wulu zie a, zɩ̃ɩ n'a mɩ́ cɛ blã na ɩ bom za ʋ lɛb vɩɛl, ɛ́ zɩ̃ɩ bɛ wa cir a, yel-bebe suur-dɩ-kʋ̀b mɩ̀ bɛ ka be ɩ.

²³A tɩ fɛr'a kɛ́ bɛ mɩ́ tu à à ŋá, a saa-zu yele dasuli á ŋá lɛb vɩɛl. Ɛcɛ a saa-zu yele tɛɛ za bɔbr'ɩ bàwr na vɩɛl zuo a.

²⁴Bʋ̃ʋ n'ʋ vɛ̃, a Kɩrɩta bɛ kpɛ zi-sõw pʋɔ nɩsaalbɛ na ŋmãa ɩ, zi-sõw nãá ɩ a zi-sõw mɩŋa ŋmɛ̃-ta-tɔ tɛwr a ɩ. A tẽ-vla tɔr za pʋɔ n'a ʋ kpɛ, k'ʋʋ tɩ be a Naaŋmɩn niŋé a ƴɛrɛŋa a tɩɩm ƴãw.

²⁵Ɛcɛ ʋ bɛ kpɛ k'ʋʋ tɩ de ʋ tʋɔra tɩr gb'aa yaga, mɛ̃ a lɛ a bàwr-maal-kara na mɩ́ kpɛ yũon za a zi-sõw pʋɔ nɩ dʋ̃w zɩ̃ɩ a ɩ.

²⁶Alɛ bɛ ɩ lɛ, a nãá fɛr'a ʋ wõ tuo gb'aa yaga, a lɛn daar a tẽ-daa na tĩ kɛ́ be a. Ɛcɛ, gb'a been daadaa n'a, a daar na wa ta a, ʋ sãá a ƴɛrɛŋa, k'ʋʋ de ʋ mɩŋa maal'ɩ bàwr ír a yel-bier bɛr.

²⁷Mɛ̃ a lɛ a na tuur k'aa nɩsaalbɛ mɩ́ kpi gb'a been yõ, ɛ́ a pùorí Naaŋmɩn maal'ɩ bɛ a ƴɛ̀rʋ a,

²⁸lɛ n'a a Kɩrɩta, mɩ̀ na de ʋ tʋɔra maal'ɩ bàwr gb'a been daadaa k'ʋʋ ír nɩ-yaga yaga yel-bebe bɛr a, nãá wa sãá a gb'a ayi sob ƴãw, ɛ́ a kʋ̃ ɩ yel-bier ír-bɛrʋ ƴãw ɛ, ɛ́ ɩ a bɛlɩ dem na gùre ʋ a faafʋ ƴãw.