Read Dagara, Northern Zakɩ 4 Bible Online

Zakɩ 4 - Dagara, Northern bible

Zakɩ 4

¹A taw-taa nɩ a zɛbr na mɩ́ be a nyɩ cara pʋɔ a, nyɩnɛ n'a a mɩ́ yi? A nʋ̃ɔ̀ faar vʋla na mɩ́ mʋɔr a nyɩ ƴã-gamɛ pʋɔ a, be bɛ n'a a mɩ́ yi ɛ?

²Nyɩ mɩ́ nyɛ̃ nɩ bom bɔbr ʋ ɛ́ kʋ̃ tʋ̃ɔ́ páw ʋ ɛ, a ɩ kʋ-taa nɩ nyuur, ɛ̀ nyɩ zɛbr taa ɛ́ tawr taa zawlalɛ. Bʋ̃-kãw vʋla mɩ́ kpɩɛr nyɩ na, ɛ́ nyɩ kʋ̃ tʋ̃ɔ́ páw ʋ ɛ, lɛ n'a nyɩ mɩ́ ìr'ɩ a zɛb-taa nɩ a taw-taa. Nyɩ bɛ tɛr a ɩ, nyɩ na bɛ zɛlɛ a Naaŋmɩn zie a ƴãw.

³Nyɩ mɩ́ zɛlɩ na ɛ́ bɛ páw ɛ, a nyɩ tɩɛrʋ na bɛ vɩɛl a ƴãw: nyɩ na mɩ́ zɛlɛ a nyɩ nʋ̃ɔ̀ wob tɛwr ƴãw a.

⁴Naaŋmɩn bɛlbɛlbɛ bɛ ŋa! Nyɩ bɛ bãw kɛ́ nɩr wa ɩ a tẽ-daa bá a, ʋ mɩ́ lɩɛb'ɩ a Naaŋmɩn dɔ̃ sob ɛ? Lɛ so, ʋlɩ sob wa bɔbr k'ʋʋ ɩ a tẽ-daa bá a, ʋ mɩ́ lɩɛb'ɩ Naaŋmɩn dɔ̃ sob.

⁵Nyɩ tɩɛrɛ kɛ́ zawlalɛ ƴãw n'a a Sɛb-sõw yel a ƴɛ̀r-bie á ŋá bɩɩ? «A Naaŋmɩn bɛ sàwr a vʋʋrʋ ʋ na ƴãw ʋ kpɩɛr a tɩ pʋɔ a ƴãw ɛ.»

⁶Ɛcɛ a maalʋ a Naaŋmɩn na kʋ̀ tɩ a ɩ n kpɛ̃ɛ zuo lɛ. Bʋ̃ʋ n'ʋ vɛ̃, bɛ mɩ̀ cãà na lɛb yel: «A Naaŋmɩn mɩ́ ba n gbɛ́r a pɔ̀lʋ dem niŋé, ɛ́ maalɩ a su-siwri dem.»[5]

⁷A na ɩ lɛ a, nyɩ mɩ́ bɛr nyɩ tʋɔra kʋ̀ a Naaŋmɩn. Nyɩ mɩ́ bà gbɛ́r a Gɛgɛra niŋé, ʋʋ na zɔ na zãá nɩ nyɩ.

⁸Nyɩ taw pɩɛlɩ a Naaŋmɩn, ʋʋ na taw na pɩɛlɩ nyɩ. Nyɩ pɛ́w a nyɩ nuru, nyɩɩm yel-bebe dem bɛ ŋan i. Nyɩ maalɩ a nyɩ socie a vɩɛl, nyɩɩm nɩbɛ a tɩɛrʋ na põ a!

⁹Nyɩ sàw a nyɩ bãbàalʋ, nyɩ ɩ ko-tuolu dem, nyɩ kone. Nyɩ bɛr laarʋ ɛ́ kone, ɛ́ a nyɩ nʋ̃ɔ̀ lɩɛbɩ pʋ-sãwna.

¹⁰Nyɩ siwre nyɩ tʋɔra a Sore niŋé, ʋʋ na zɛw nyɩ na.

¹¹Yɛbr i, nyɩ ta mɩ́ manɛ taa yel-faar ɛ. Ʋlɩ sob na manɛ a ʋ yɛb yel-faar, ɛ́ bãwnɛ a ʋ sãwna a, ʋ sãwnɛ nɩ a Naaŋmɩn wulu yúor, ɛ́ bãwnɛ a Naaŋmɩn wulu yele. Ɛcɛ fʋ̃ʋ wa dɩrɛ nɩ a Naaŋmɩn nʋɔr ƴɛ̀rʋ a, fʋ bɛ ɩ a Naaŋmɩn nʋɔr nɔ-sàwrɛ ɩ, fʋ ɩ n a ʋ ƴɛ̀r-dɩrɛ.

¹²Naaŋmɩn yõ n'ʋ ɩ a nɔ-ƴãwnɛ nɩ a ƴɛ̀r-dɩrɛ. Ʋl yõ n'ʋ na tʋ̃ɔ́ faa, ʋl yõ n'ʋ na tʋ̃ɔ́ kʋ. Fʋ̃ʋ a, ãa nɛ b na bãwnɛ a fʋ tɔ sãwna?

¹³Ƴɛrɛŋa a, nyɩ bɛrɛ wone, nyɩɩm na yere kɛ́: «Dɩ̃a bɩɩ bio, tɩ na cen nɩ tẽ-kpɛ̃ɛ ŋa pʋɔ, tɩ maalɩ yũon a be, yɛ̀r yɛ̀rʋ́ páw libie a.»

¹⁴Ɛ́ nyɩ na bɛ bãw a lɛ a nyɩ nyɔ-vʋʋrʋ na na ŋmɛ̃ a bio a! Bʋ̃ʋ n'ʋ vɛ̃, nyɩ ɩ na mɛ̃ bʋ̃-tʋlʋ uuru na mɩ́ sãanɛ wa báarɛ ɛ́ lɛb bɔr a.

¹⁵À ŋá n'a a nɩ̃ɛ mɩ́ sɛw kɛ́ nyɩ yel: «A Sore wa sàw a, tɩ na vʋʋrɛ na, ɛ́ tɩ na ɩ n bom ŋa bɩɩ bom ŋa.»

¹⁶Ɛcɛ nyɩ mɩ́ bɛr'a ɛ́ zɛwr nyɩ tʋɔra pɔrɛ nɩ pɔb tɛwr. A pɔb á ŋá taabɛ bɛ vɩɛl ɛ.

¹⁷Lɛ so, nɩr wa bãw a vla maalʋ ɛ́ bɛ maalɛ a, ʋ maal'ɩ yel-bier.