Read Dagara, Northern 1 Pɩɛr 1 Bible Online

1 Pɩɛr 1 - Dagara, Northern bible

1 Pɩɛr 1

¹A mãa Pɩɛr na ɩ a Yeezu Kɩrɩta nɩ-tona a, mãa n'ʋ sɛbr a Naaŋmɩn nɩ-kaa-íri na yaarɩ be a Pɔ̃, a Galasi, a Kapadɔsɩ, a Azi nɩ a Bitini ten pʋɔ mɛ̃ nɩ-sãanbɛ a.

²A Naaŋmɩn Sãà n'ʋ kaa ír nyɩ a tu a lɛ ʋ na tɩ dãw tɩɛrɩ a yele bin a koro za a. Ʋlɛ n'ʋ ƴãw a Vʋʋrʋ Sõw maalɩ nyɩ nyɩ ɩ son kɛ́ nyɩ wa sàwr a Yeezu Kɩrɩta nʋɔr ɛ́ páw a vɩɛlʋ a ʋ zɩ̃ɩ ƴãw. A Naaŋmɩn, ʋ kʋ̀ nyɩ a maalʋ nɩ a ƴã-ɓaarʋ yaga za.

³A Naaŋmɩn tɩ Sore Yeezu Kɩrɩta Sãà tɛr'ɩ puoru. A ʋ su-ɓaarʋ na ɩ kpɛ̃ɛ a ƴãw n'a ʋ ɩ tɩ lɛb dɔw, ɛ́ ƴãw a tɩ tɩɛrʋ a nyɔ-vʋʋrʋ tɩ na páw a ƴãw, a Yeezu Kɩrɩta kũu-pʋɔ-lɛb-yibu zũú.

⁴Ʋ ɩ na tɩ lɛb dɔw na páw a gbã-dɩ-bom ʋl na kʋ̃ pʋ̃ɔ a, na bɛ tɛr dɛwr ɛ́ a vɩɛlʋ mɩ̀ bɛ tɛr nãà siwri a. A gbã-dɩ-bom ŋa gùre nyɩ nɩ a tẽ-vla pʋɔ,

⁵nyɩɩm a Naaŋmɩn na piw tɛr nɩ a ʋ fãw gùre nɩ a baarʋ daar a faafʋ na cɔbrɩ gã nãà wa sãá a, nyɩ na sàw de ʋ a ƴãw.

⁶Nyɩ̀ cɩlɛ nɩ nyɩ za a al ƴãw, yel-kpɩɛrɩ bʋʋrɛ za saa na ɩ nyɩ tɛr pʋ-sãwna blã a ƴɛrɛŋa a.

⁷A kpɩɛrʋ á ŋá na ɩ na kɛ̀ bɛ bãw a lɛ a nyɩ naaŋmɩn-sàwfʋ vɩɛlʋ na ŋmɛ̃ a, a nyɩ naaŋmɩn-sàwfʋ ŋa na zuo a salm-zɩɛ na mɩ́ wɛ a, ɛ́ bɛ mɩ́ ƴãw vũumí ɩ kaa bãw a vɩɛlʋ a. A nyɩ naaŋmɩn-sàwfʋ bɛ na ɩ kaa nyɛ̃ ʋ vɩɛl a na ɩ na nyɩ nyɛ̃ danʋ, nɩ yúor-vɩɛlʋ-danʋ nɩ ƴãwfʋ, a lɛn daar a Yeezu Kɩrɩta nãà wa lɛb wa wul ʋ tʋɔra a,

⁸a Yeezu Kɩrɩta nyɩ na nɔnɛ ɛ́ bɛ nyɛ̃ a, a ʋl nyɩ mɩ̀ na sàw de ɛ́ bɛ nyɛ̃ sɛr a. Ɛ́ nyɩ na sàw de a, nyɩ cɩlɛ nɩ nʋ̃ɔ̀ cɩlʋ na bɛ tɛr manʋ, ɛ́ ɩ a nyɩ yúor-vɩɛlʋ-danʋ cɩlʋ a,

⁹nyɩ na bãwnɩ a kɛ́ nyɩ na páw nɩ a naaŋmɩn-sàwfʋ bom na ɩ a nyɩ mɩŋa faafʋ a.

¹⁰A faafʋ ŋa yele n'a a naaŋmɩn-ƴɛ̀r-manbɛ tɩ dãw jɛl bɔ, ɛ́ ƴɛ̀r naaŋmɩn-ƴɛ̀r-manbɛ ƴɛ̀rʋ yel a maalʋ a Naaŋmɩn na tɩ bãwnɩ nyɩ a.

¹¹Bɛ tɩ ƴãw nɩ fãw jɛlɛ kɛ́ bɛ bãw debor daar'a, nɩ yele abobe n'a a Kɩrɩta Vʋʋrʋ na be a bɛ pʋɔ a, tɩ bɔbr k'ʋʋ yel, a lɛn daar ʋ na tɩ de niwn yel a tuo na gùre a Kɩrɩta a yele, nɩ a yúor-vɩɛlʋ-danʋ ʋ na na páw a tuo wob pùorí a.

¹²A Naaŋmɩn tɩ wul bɛ na kɛ́ a yel ŋa bɛ na tɩ yere a, a bɛ ɩ bɛl mɩŋa ƴãw ɛ, a nyɩɩm ƴãw n'a. Ɛ́ a ƴɛrɛŋa a, a Vʋʋrʋ Sõw bɛ na tõ ʋ yi a tẽ-vla pʋɔ wa a, ʋ ɩ na a Yel-nʋ̃ɔ̀ hierbɛ manɩ a yel ŋa kʋ̀ nyɩ, a yel ŋa a malkɩ mɩnɛ na vuole bɔbr'ɩ a bãwfʋ a.

¹³Lɛ so, nyɩ cɔbrɩ gù a tome, nyɩ mɩ́ nyɔw nyɩ tʋɔra a dɩb nɩ a nyub ƴãw, ɛ́ de a nyɩ tɩɛrʋ za ƴãw a maalʋ ʋl ƴãw bɛ na na kʋ̀ nyɩ, a lɛn daar a Yeezu Kɩrɩta nãà wa lɛb wul ʋ tʋɔra a.

¹⁴Mɛ̃ bibiir na sàwr nʋɔr a, nyɩ ta tu a dãwdãw tɛra vʋla pùor ɛ, a lɛn daar nyɩ na tɩ cãà ɩ zɔn a ɩ.

¹⁵Ɛcɛ, mɛ̃ a lɛ a Naaŋmɩn na bʋɔlɩ nyɩ a na ɩ sõw a, nyɩ mɩ̀ lɩɛbɩ nɩ-son a nyɩ cenu za pʋɔ.

¹⁶Bʋ̃ʋ n'ʋ vɛ̃, bɛ sɛb'ɩ a Sɛb-sõw pʋɔ: «Nyɩ ɩ nɩ-son, ɩ̃ na ɩ sõw a ƴãw.»[1]

¹⁷Nyɩmɛ wa bʋɔlɛ a Naaŋmɩn kɛ́ Sãà a, ʋl na bɛ owre a ƴɛ̀rʋ-maalʋ pʋɔ, ʋ na mɩ́ maal'ɩ ŋa za tu n a ʋ ɩ-ɩrɩ a, nyɩɩm zɔrɛ ʋ ɛ́ ƴãwnɛ ʋ a nyɩ nɩ-tɔlɩ tẽw ŋa zu.

¹⁸Nyɩ bãwnɩ a vla, bom na ɩ bʋ̃-wɛra mɛ̃ a salm-pla nɩ a salm-zɩɛ a, alɛ bɛ n'a bɛ ya ír'ɩ nyɩ bɛr a ɩ-ɩrɩ na bɛ tɛr tɔnɛ a pʋɔ a nyɩ sãàkʋm-kore mɩnɛ na lʋɔrɩ kʋ̀ nyɩ a ɩ.

¹⁹Ɛcɛ zɩ̃ɩ na ɩ zɩ̃ɩ a n'a faa nyɩ, a Kɩrɩta zɩ̃ɩ, ʋl na ɩ a Pele na bɛ tɛr faalʋ nɩ dɛwr a.

²⁰Ʋlɛ n'ʋ a Naaŋmɩn tɩ dãw bãwnɩ, ʋ na bɛ tɩ ír a tẽ-daa sɛr a, ɛ́ pãa wa wul ʋ sãá a nyɩɩm ƴãw, a vuo ŋa pʋɔ na ɩ a vo-pɛ-baara a.

²¹A ʋl ƴãw n'a nyɩ sàw de a Naaŋmɩn na ɩ k'ʋ lɛb yi a kũuni pʋɔ ɛ́ kʋ̀ ʋ a yúor-vɩɛlʋ-danʋ a. À ŋá n'a nyɩ sàw de a Naaŋmɩn ɛ́ ƴãw a nyɩ tɩɛrʋ za a ʋ ƴãw.

²²Nyɩ na tu a yel-mɩŋa a, nyɩ so n a nyɩ dɛwr bɛr kɛ́ nyɩ sɩrɩ nɔnɛ taa yaga za mɛ̃ yɛbr a. A na ɩ lɛ a, nyɩ sɩrɩ nɔnɛ taa nɩ soci-pla parpar.

²³Nɩsaal na na wɛ a, ʋlɛ bɛ n'ʋ ɩ nyɩ lɛb dɔw ɛ, a Naaŋmɩn ƴɛ̀rʋ na vʋʋrɛ ɛ́ be kʋralɛ a, ʋlɛ n'ʋ ɩ nyɩ lɛb dɔw.

²⁴Bʋ̃ʋ n'ʋ vɛ̃, bɛ sɛb'a: «Nɩsaal za ŋmɛ̃ na mɛ̃ mʋ̃ɔ a, ɛ́ a ʋ yúor na yi a ŋmɛ̃ mɛ̃ mɔ̃-puuru a: a mʋ̃ɔ mɩ́ ko na, ɛ́ a puuru kpa lo,

²⁵ɛcɛ a Sore ƴɛ̀rʋ be n kʋralɛ.»[2] Ɛ́ a ƴɛ̀rʋ ŋa n'ɩ a Yel-nʋ̃ɔ̀ bɛ na hieri kʋ̀ nyɩ a.