Read Dagara, Northern 2 Pɩɛr 1 Bible Online

2 Pɩɛr 1 - Dagara, Northern bible

2 Pɩɛr 1

¹A mãa Sɩmʋ̃ Pɩɛr na ɩ a Yeezu Kɩrɩta tõ-tone nɩ a ʋ nɩ-tona a, mãa n'ʋ sɛbr a bɛlɩ dem na páw a naaŋmɩn-sàwfʋ ʋ vɩɛl man a tɩ dem a. A tɩ Naaŋmɩn nɩ a tɩ Faarɛ Yeezu Kɩrɩta mɩnʋ zũú n'a bɛ páw a naaŋmɩn-sàwfʋ ŋa.

²A Naaŋmɩn maalʋ nɩ a ƴã-ɓaarʋ a ta nyɩ yaga za, a Naaŋmɩn nɩ a Yeezu tɩ Sore bãwfʋ zũú.

³A ʋ naaŋmɩnʋ fãw zũú, a Sore kʋ̀ tɩ nɩ bom za a na sɛw kɛ́ tɩ tɛr tʋ̃ɔ́ vʋʋrɛ nyɔ-vʋʋr-vla ɛ́ ƴãwnɛ a Naaŋmɩn a. Ʋ ɩ na tɩ bãw a Sob nɛ na ƴãw tɩ pʋɔ a ʋl mɩŋa yúor-vɩɛlʋ-danʋ pʋɔ, ɛ́ tɛr a ʋ fãw ʋ na tone nɩ tõ-vɩɛlɩ a.

⁴A ʋ yúor-vɩɛlʋ-danʋ nɩ a ʋ fãw ƴãw, tɩ páw nɩ a bome na vɩɛl bɛ tɛr tɔ ʋ na dãw ƴãw nʋɔr kɛ́ tɩ na páw na a. Ɛ́ a bʋ̃-vɩɛlɩ á ŋá ɩ na nyɩ pʋɔ a naaŋmɩnʋ pʋɔ ɛ́ yi zaa a faalʋ pʋɔ, a faalʋ a tɛra vʋla na guole a tẽ-daa zu a.

⁵Alɛ n'a mɩ̀ cãà lɛb so nyɩ ƴãw a nyɩ fãw za tɛr'ɩ vɩɛlʋ ƴãw pʋɔ a nyɩ naaŋmɩn-sàw-deb ƴãw, ɛ́ tɛr Naaŋmɩn bãwfʋ sɩza ƴãw pʋɔ a vɩɛlʋ ƴãw.

⁶Nyɩ tɛr tʋɔra-nyɔwfʋ ƴãw pʋɔ a Naaŋmɩn bãwfʋ ƴãw. Nyɩ tɛr a kanyir ƴãw pʋɔ a tʋɔra-nyɔwfʋ ƴãw, ɛ́ ƴãwnɛ a Naaŋmɩn ƴãw pʋɔ a kanyir ƴãw.

⁷Nyɩ nɔnɛ taa mɛ̃ yɛbr a, ƴãw pʋɔ a Naaŋmɩn ƴãwfʋ ƴãw, ɛ́ pãa baa tɛr a nɔ̃wfʋ ƴãw pʋɔ a yɛbr nɔ̃w-taa ƴãw.

⁸Nyɩmɛ wa tɛr a ɩ-vɩɛlɩ á ŋá za a, a na ɩ na nyɩ tʋlɛ ɛ́ bãwnɛ a tɩ Sore Yeezu Kɩrɩta dɔwlɛ.

⁹Sob nɛ za na bɛ tɛr a a, ʋ ɩ n zɔ̃w na bɔblɛ a: ʋ yiir'a kɛ́ bɛ pɛ́w nɩ a ʋ dãwdãw yel-bebe dɛwr bɛr.

¹⁰Alɛ n'a so, yɛbr i, nyɩ lɛb bãw ƴãw fãw ɩ a bʋɔlʋ a Naaŋmɩn na bʋɔlɩ nyɩ, ɛ́ kaa ír nyɩ a, ʋ kpɛmɛ dɔwlɩ, lɛ n'a nyɩ bɛ be za nãà faa lo ɩ.

¹¹Ɛ́ lɛ n'a nyɩ na kpɛ a tɩ Sore nɩ a tɩ Faarɛ Yeezu Kɩrɩta naalʋ na be kʋralɛ a pʋɔ, mɔlɛ mɔlɛ lɛ.

¹²Alɛ n'a so ɩ̃ bɔbr k'ɩ̃ɩ lɛb sɩ̃wnɛ a nyɩ tɩɛrʋ a yele á ŋá ƴãw kʋralɛ, nyɩ na saa bãw a ɛ́ tɛr a yel-mɩŋa bɛ na yel kʋ̀ nyɩ a kpɛ̃w za a.

¹³Ɩ̃ na dɛ cãà a tẽw ŋa zu a, ɩ̃ tɩɛrɛ na k'aa sɛw na k'ɩ̃ɩ cãà kpaalɛ nyɩ a yele á ŋá ƴãw, kɛ̀ nyɩ cɩ a ƴãw.

¹⁴Ɩ̃ bãwnɩ a na, a ɩ̃ kulu pɩɛl'a, mɛ̃ a lɛ a tɩ Sore Yeezu Kɩrɩta na ɩ ɩ̃ bãw a.

¹⁵Ɛcɛ ɩ̃ na ƴãw nɩ fãw kɛ̀ mãa bɛ wa ka be a, nyɩɩm tʋ̃ɔ́ tɛr a ɩ̃ wulu á ŋá kʋralɛ nɩ ziir za, taa wa yiire a bɛrɛ ɩ.

¹⁶A tɩ Sore Yeezu Kɩrɩta kpɛnʋ nɩ a ʋ lɛb-waa tɩ na ɩ nyɩ bãw a, suolu bɛ n'a tɩ suoli vla za kʋ̀ nyɩ ɛ. Tɩ nyɛ̃ nɩ a ʋ yúor-vɩɛlʋ-danʋ za nɩ mimir sɩza.

¹⁷Ʋ tɩ sɩrɩ na nyɛ̃ ƴãwfʋ nɩ yúor-vɩɛlʋ-danʋ a Naaŋmɩn Sãà zie, a lɛn daar kɔkɔr na tɩ yi a Naaŋmɩn vɩɛlʋ za zie yere a: «A ɩ̃ bi-nɔna n'ɩ à ŋà, ɩ̃ pʋɔ za pɛlɩ nɩ a ʋ ƴãw.»

¹⁸A kɔkɔr ŋa na tɩ ƴɛ̀rɛ yire a salom zu a, tɩɩm mɩŋa wõ ʋ nɩ a lɛn daar tɩmɛ nɩ a ʋl na tɩ be a tã-sõw zu a[1].

¹⁹Ɛ́ lɛb waar, tɩ nyɛ̃ na k'aa naaŋmɩn-ƴɛ̀r-manbɛ ƴɛ̀rʋ sɩrɩ na tɛr fãw, ɛ́ nyɩ tɛr'ɩ yel-mɩŋa nyɩ na sàw cɛlɛ a ƴɛ̀rʋ á ŋá zie a. Nyɩ de a a ɩ mɛ̃ fɩ̃tɩlɛ na caalɛ lige pʋɔ a, ɛ́ gù a zi-vɩɛ-ŋmar-bir nãà wa pur a nyɩ socie pʋɔ a.

²⁰Nyɩ páw bãwnɩ a vla za: nɩsaal za kʋ̃ tʋ̃ɔ́ bãw ír a naaŋmɩn-ƴɛ̀r-manbɛ ƴɛ̀rʋ pɛr na be a Sɛb-sõw pʋɔ a, ʋ yõ ɩ.

²¹Bʋ̃ʋ n'ʋ vɛ̃, naaŋmɩn-ƴɛ̀r-manɛ ƴɛ̀rʋ kãw za bɛ dãw yi nɩsaal yõ na bɔbr a zie ɩ, Vʋʋrʋ Sõw n'ʋ tɩ ƴãw nɩbɛ ƴɛ̀r a Naaŋmɩn yúor ƴãw.