Read Dagara, Northern 2 Pɩɛr 2 Bible Online

2 Pɩɛr 2 - Dagara, Northern bible

2 Pɩɛr 2

¹Naaŋmɩn-ƴɛ̀r-man-bɛlɛbɛlɛ mɩnɛ mɩ̀ tɩ be n a Ɩsɩrayɛl bʋʋrɛ pʋɔ a koro za. Lɛ n'a wul-wul-bɛlɛbɛlɛ mɩnɛ mɩ̀ na be a nyɩ pʋɔ. Bɛ na wa n nɩ wulu na bɛ tu sɔ́r ɛ́ bɔrɛ a nɩbɛ a, mɔ̃ mɩ̀, bɛ na zawr'ɩ a Wul-wul-kara na ya de bɛ a bɛr. À ŋá n'a bɛ na ɩ ƴãw bɛ tʋɔra kũu na kʋ̃ yaa kɛ́ ta a pʋɔ.

²Ɛcɛ nɩ-yaga na tu bɛ nɩ a bɛ faalʋ á ŋá pʋɔ. A bɛl ƴãw, a yel-mɩŋa sɔ́r na lɩɛb'ɩ zʋmɛ bom.

³Ɛ́ bɛ na nɔnɛ kɛ́ bɛ tɛr a a, bɛ na tɛr'ɩ nɔ-kãá nɛbr'ɩ nyɩ. Ɛcɛ bɛ maal'ɩ bɛ nɩ a ƴɛ̀rʋ baarɩ koro za, ɛ́ a bɛ loba ɩ yɩ̃ɛlɛ.

⁴Bʋ̃ʋ n'ʋ vɛ̃, a malkɩ mɩnɛ bɛl na sãw a, a Naaŋmɩn bɛ bɛr bɛ ɩ, ʋ lɔb bɛ na ƴãw a tẽ-faa lige pʋɔ cɛlɛ nɩ a ƴɛ̀rʋ-maalʋ.

⁵Ʋ mɩ̀ bɛ bɛr a dãwdãw tẽ-daa ɩ, ʋ ƴãw na kʋ̃ɔ paalɩ pàw a nɩ-faar tẽw ŋa. Ɛcɛ ʋ tɩ piw nɩ a Nowe na tɩ hiere a yel-mɩnʋ[2] a tɛr, lãwnɩ nɩbɛ ayopõi kãw.

⁶A pùorí, ʋ ƴãw nɩ dɔwrʋ a Sodɔm nɩ a Gomɔɔr ten. Ʋ ƴãw na vũu dɩ a kʋmkʋm, k'aa wul k'aa ŋa n'a a nãà ŋmɛ̃ a nɩ-faar za zie[3].

⁷Ɛcɛ ʋ tɩ faa nɩ a nɩ-mɩŋa Lɔtɩ, a nɩ-faar bɛ ŋa nyɔ-vʋʋr-faa na tɩ ɩrɛ a kpɩɛr yaga za a.

⁸Bʋ̃ʋ n'ʋ vɛ̃, a nɩ-mɩŋa ŋa tɩ kpɩɛr'ɩ a bɛ sɔgɔ, nyɛrɛ ɛ́ wone a bɛ ɩ-faar bibie za. A bɛ ɩ-ɩrɩ na bɛ tu sɔ́r a tɩ ɩ ʋ nɩ kpɩɛrʋ bɛ dɩ vuo ɩ.

⁹A wul'a k'aa Sore na tʋ̃ɔ́ na faa a bɛlɩ dem na ƴãwnɛ ʋ a bɛr a tuo pʋɔ, ɛ́ tɛr a nɩ-faar gùre nɩ a ƴɛ̀rʋ-maalʋ bibir, k'ʋʋ ƴãw bɛ dɔwrʋ.

¹⁰Ɛ́ baa zuo a za, ʋ na ƴãw nɩ dɔwrʋ a bɛlɩ dem na mɩ́ zɔrɛ tuur a ƴã-gan nʋ̃ɔ̀, a bɛ pɩ̃ɔ-yele tɩɛr-faa zũú, ɛ́ bɛ tobr bɛ ka be a Sore nɩ-kpɛ̃ɛnʋ ƴãw a. Bɛ kpɛ n pʋra ɛ́ ɩ pɔ̀lʋ dem, bɛ bɛ zɔrɛ dɛ̃bɩ̃ɛ a salom zu dem na tɛr yúor-vɩɛlʋ-danʋ a tʋb ƴãw ɛ.

¹¹Ɛcɛ malkɩ mɩnɛ na tɛr fãw zuo a nɩbɛ bɛ ŋa, ɛ́ lɛb kpɛmɛ zuo bɛ a, bɛ sàwr tʋʋr a salom zu dem bɛ ŋa a Sore niŋé ɩ.

¹²Ɛcɛ, mɛ̃ dʋn na bɛ bãw yã ɛ́ be bɛrɩ nyɔwfʋ ƴãw, ɛ́ na kpi wɛ a, a nɩbɛ bɛ ŋa tʋʋr'ɩ bom bɛ na bɛ bãw a, bɛ na kpi na wɛ mɛ̃ a dʋn a.

¹³À ŋá n'a bɛ na páw a bɛ ɩb na bɛ tu yel-mɩŋa a sã-ya. Cãàmɩlɛ n'a bɛ nɔnɛ a pɩ̃ɔ-yele maalʋ. Bɛlɛ wa lãw nɩ nyɩ dɩrɛ a lɛn daar, ɛ́ a bɛ nʋ̃ɔ̀ ɩ a bɛ ziri a, bɛ mɩ́ ɩ n nɩ-dɛgɛ nɩ nɩ-ɩ-laarɩ.

¹⁴Pɔw-gaa yele jɩ́rʋ n'a a bɛ mimie nɔnɛ yaga za, ɛ́ bɛ bɛ dãw sɛw a yel-bier maalʋ ɛ. Lɛ n'a bɛ ɩrɛ bɛ̀lɛ nyɔwr a bɛlɩ dem na bɛ tɛr fãw a. Nɩr bɛ nɔ̃w a tɛra man bɛ ɩ, nɩ-ŋmɛ-ƴãwnɩ nɛbɛ.

¹⁵Bɛ bɛr'ɩ a sɔ́r-dẽdẽ, ɛ́ bɔr tu a Bosɔɔr[4] bidɛb Balaam pùor, ʋl na tɩ bɛr ɩ-faar sã-ya bɛlɩ nyɔw ʋ a.

¹⁶Ɛcɛ, ʋ tɩ nyɛ̃ nɩ kpãàfʋ a ʋ sãwna ƴãw: bõw na bɛ ƴɛ̀rɛ a tɩ ƴɛ̀rɛ na mɛ̃ nɩsaal a, ɩ a naaŋmɩn-ƴɛ̀r-manɛ dãbolu baarɩ.

¹⁷A nɩbɛ bɛ ŋa ɩ na mɛ̃ buli na ko kpar a, ɛ́ ŋmɛ̃ mɛ̃ zũzuwe saa-sɛsɛb na darɛ cere nɩ a. Liw lige n'a gã cɛlɛ bɛ.

¹⁸Bɛ mɩ́ ƴɛ̀rɛ nɩ ƴɛ̀r-bɛrɛ ƴɛ̀r-zawlɛ, a pɩ̃ɔ-yele ƴã-gan nʋ̃ɔ̀-faar tɩɛrʋ na ɩrɛ vĩ a n'a bɛ mɩ́ bɛlɩ nyɔw nɩ a bɛlɩ dem na bʋ́r yi paalʋ a nɩbɛ bɛl pʋɔ na vʋʋrɛ a tulu pʋɔ a.

¹⁹Bɛ mɩ́ yel'a kɛ́ bɛ na ɩ na bɛ so bɛ tʋɔra, zɩ̃ kɛ́ bɛl tɛɛ za ɩ n a ɩ-faar bɛ na mili nɩ a gbãgbaar. Bʋ̃ʋ n'ʋ vɛ̃, bom na tʋ̃ɔ́ a nɩsaal a, a nɩsaal ɩ n a bom ʋl gbãgbaa.

²⁰Yel-mɩŋa n'a, a bɛlɩ dem na faa bɛ tʋɔra a tẽ-daa dɛwr ƴãw, a tɩ Sore nɩ a tɩ Faarɛ Yeezu Kɩrɩta bãwfʋ zũú a, bɛlɛ wa lɛb bɛr a dɛwr á ŋá lɛb páw bɛ ɛ́ tʋ̃ɔ́ bɛ a, bɛ nɩ̃ɛ na mɩ́ lɛb kpɛ faa zuo a dãwdãw.

²¹Bʋ̃ʋ n'ʋ vɛ̃, bɛlɛ nɩ̃ɛ bɛ tɩ dãw bãw a mɩnʋ sɔ́r a, alɛ sa bɛ na bãw ʋ baarɩ ɛ́ lɛb zawrɩ a Naaŋmɩn nɔ-ƴãwna sõw bɛ na tɩ lʋɔrɩ kʋ̀ bɛ a bɛr a.

²²A ŋmɛ̃ na mɛ̃ a lɛ a zʋkpar na yel a: «A baa lɛb'a dɩrɛ a ʋ tiiru![5]» Nɩ kɛ́: «A dobaa so n a kʋ̃ɔ wa báarɛ ɛ́ lɛb mɩɩlɩ a mɛ̃mɛrɛ.»