Read Dagara, Northern 1 Zã 2 Bible Online

1 Zã 2 - Dagara, Northern bible

1 Zã 2

¹Ɩ̃ bibiir i, ɩ̃ sɛbr nyɩ nɩ à á ŋá kɛ́ nyɩ taa maalɛ yel-bier ɛ. Ɛcɛ nɩr wa ɩ mɛ̃ ʋ maal'ɩ yel-bier a, tɩ tɛr'ɩ nɩr a Naaŋmɩn Sãà zie ʋ mɩ́ ƴɛ̀r faa tɩ, ʋlɛ n'ɩ a Yeezu Kɩrɩta na ɩ nɩ-mɩŋa a.

²Bʋ̃ʋ n'ʋ vɛ̃, ʋ de nɩ ʋ tʋɔra maal'ɩ bàwr, kɛ́ Naaŋmɩn tʋ̃ɔ́ dɩ a tɩ yel-bebe suur kʋ̀ tɩ. Ɛcɛ tɩɩm yõ yel-bebe bɛ n'a ɩ, a nɩsaalbɛ za dem mɩ̀ n'a.

³Ɛ́ à ŋá n'a tɩ nyɛ̃ kɛ́ tɩ bãw nɩ a Naaŋmɩn: tɩmɛ wa sàwr a ʋ nɛ-ƴãwnɩ a.

⁴Sob nɛ na yere: «Ɩ̃ bãw ʋ na», ɛ́ bɛ sàwr a ʋ nɛ-ƴãwnɩ a, ʋ ɩ n zir-ŋmarɛ, ɛ́ a yel-mɩŋa bɛ be a ʋ zie ɩ.

⁵Ɛcɛ sob nɛ na sàwr dier a Naaŋmɩn ƴɛ̀rʋ a, a Naaŋmɩn nɔ̃wfʋ mɩ́ sɩrɩ na vɩɛl ʋ za a ʋ sob zie. À ŋá n'a tɩ na tʋ̃ɔ́ mɩ́ bãw kɛ́ tɩ lãw nɩ nɩ a Naaŋmɩn.

⁶Sob nɛ na yel k'ʋʋ lãw nɩ nɩ a Naaŋmɩn a, a fɛr'a k'ʋʋ vʋʋrɛ mɛ̃ a lɛ a Yeezu na dãw vʋʋrɩ a.

⁷Ɩ̃ bá mɩnɛ ɛ, Naaŋmɩn nɔ-ƴãwna na ɩ paala a bɛ n'ʋ ɩ̃ sɛbr kʋ̀rɛ nyɩ ɛ, a nɔ-kʋra ʋl nyɩ na tɛr a pɛr-tib daar a n'ʋ, a nɔ-kʋra ŋa ɩ n a ƴɛ̀rʋ nyɩ na tɩ wõ a.

⁸Ɛcɛ Naaŋmɩn nɔ-ƴãwna na ɩ paala[1] n'ʋ ɩ̃ sɛbr kʋ̀rɛ nyɩ, ɛ́ a ʋ yel-mɩŋa sãá nɩ a Kɩrɩta zie nɩ a nyɩ zie mɩ̀. Bʋ̃ʋ n'ʋ vɛ̃, a lige tɔlɛ na, ɛ́ a cãà tɔr za caalɛ baarɩ.

⁹Ʋlɩ sob na yere k'ʋʋ be n cãà pʋɔ ɛ́ hɩ̃ɛn a ʋ yɛb a, ʋ cãà na be a lige pʋɔ.

¹⁰Sob nɛ na nɔnɛ a ʋ yɛb a, ʋ be n cãà pʋɔ ɛ́ bom za bɛ be a ʋ zie na ɩ k'ʋ lo ɩ.

¹¹Ɛcɛ sob nɛ na hɩ̃ɛn a ʋ yɛb a, ʋ be n lige pʋɔ, ʋ cere nɩ lige pʋɔ ɛ́ bɛ bãw be ʋ na cere a ɩ, a lige na ɩ ʋ zɔ̃w a ƴãw.

¹²Ɩ̃ bibiir i, ɩ̃ sɛbr nyɩ na kɛ́ Naaŋmɩn dɩ n a nyɩ yel-bebe suur kʋ̀ nyɩ a Yeezu yúor ƴãw.

¹³Sãà mɩnɛ ɛ, ɩ̃ sɛbr nyɩ na kɛ́ nyɩ bãw nɩ a sob nɛ na be a pɛr-tib daar za a. Pɔlbili i, ɩ̃ sɛbr nyɩ na kɛ́ nyɩ zɛb'a tʋ̃ɔ́ a Faalʋ sob.

¹⁴Ɩ̃ bibiir i, ɩ̃ sɛb nyɩ na kɛ́ nyɩ bãw nɩ a Naaŋmɩn Sãà. Sãà mɩnɛ ɛ, ɩ̃ sɛb nyɩ na kɛ́ nyɩ bãw nɩ a sob nɛ na be a pɛr-tib daar za a. Pɔlbili i, ɩ̃ sɛb nyɩ na kɛ́ nyɩ kpɛmɛ na ɛ́ a Naaŋmɩn ƴɛ̀rʋ be a nyɩ zie, nyɩ zɛb'a tʋ̃ɔ́ a Faalʋ sob.

¹⁵Nyɩ ta nɔnɛ a tẽ-daa nɩ a tẽ-daa zu bome[2] ɩ, nɩr wa nɔnɛ a tẽ-daa a, ʋ bɛ mɩ́ tɛr a Naaŋmɩn Sãà nɔ̃wfʋ ɛ.

¹⁶Bʋ̃ʋ n'ʋ vɛ̃, bom za a tẽ-daa na so a: a nɩsaal pʋ-tɩɛrʋ bʋ̃-bɔbrɩ na bɛ vɩɛl a, bom fʋ na mɩ́ nyɛ̃ a mimir zaalɛ a, a pɔ̀l-ɩb a tɛra pʋɔ, à á ŋá za bɛ yire a Naaŋmɩn Sãà zie ɩ, a tẽ-daa zie n'a a yire.

¹⁷A tẽ-daa tɔlɛ na, ʋlɛ nɩ a ʋ bome a nɩsaalbɛ na mɩ́ bɔbr a, ɛcɛ sob nɛ na maalɛ a Naaŋmɩn pʋ-tɩɛrʋ a mɩ́ be n be kʋralɛ.

¹⁸Ɩ̃ bibiir i, a yele za baarʋ pɩɛl'a. Nyɩ wõ na bɛ yel kɛ́ Kɩrɩta dɔ̃ sob[3] waar'a. Ɛcɛ ƴɛrɛŋa a, Kɩrɩta dɔ̃ dem yaga be n ka. À ŋá n'a tɩ bãw k'aa yele za baarʋ daar ta na.

¹⁹A nɩbɛ bɛ ŋa yi n a tɩ zie, ɛcɛ bɛ bɛ tɩ ɩ a tɩ nɩbɛ ɩ. Bɛlɛ tɩ sɩrɩ ɩ a tɩ nɩbɛ a, bɛ nãá tɩ cãà na be a tɩ zie. Ɛcɛ bɛ yi na zaa a tɩ pʋɔ, k'aa ɩ cãà kɛ́ bɛ been kãw za bɛ tɩ ɩ a tɩ nɩr ɛ.

²⁰A nyɩɩm a, nyɩ páw nɩ a Vʋʋrʋ Sõw a Kɩrɩta na kʋ̀ nyɩ a, lɛ n'a nyɩ za bãw a yel-mɩŋa.

²¹Ɩ̃ bɛ sɛb nyɩ kɛ́ nyɩ bɛ bãw a yel-mɩŋa ɩ, ɩ̃ sɛb nyɩ na kɛ́ nyɩ bãw ʋ na, nɩ kɛ́ bom za na ɩ ziri a, bɛ yire yel-mɩŋa pʋɔ ɩ.

²²Ãa n'ɩ a zir-ŋmarɛ, ʋ bɛ ɩ a sob nɛ na yere k'aa Yeezu bɛ ɩ a Kɩrɩta a? A Kɩrɩta dɔ̃ sob'ɩ à ŋà: ʋ na zawrɛ a Sãà nɩ a Bie za a.

²³Sob nɛ za na zawrɛ a Bie a, mɩ̀ bɛ tɛr a Sãà ɩ. Ɛ́ sob nɛ za na sàw a Bie a mɩ̀ tɛr'ɩ a Sãà.

²⁴A na ɩ à ŋá a, nyɩ maal tɛr a ƴɛ̀rʋ nyɩ na wõ a pɛr-tib daar za a. A ʋlɩ bom nɛ nyɩ na wõ a pɛr-tib daar za wa be a nyɩ zie a, a nyɩɩm mɩ̀, nyɩ na lãw nɩ nɩ a Bie nɩ a Sãà.

²⁵Ɛ́ a ʋlɩ bom nɛ a Kɩrɩta na yel k'ʋʋ na kʋ̀ tɩ na a n'ɩ a nyɔ-vʋʋrʋ na be kʋralɛ a.

²⁶À á ŋá n'a ɩ̃ yel k'ɩ̃ɩ sɛb kʋ̀ nyɩ càar'ɩ a bɛlɩ dem na mɩ́ bɔbr kɛ́ bɛ tuli nyɩ a.

²⁷A nyɩɩm a, a Vʋʋrʋ Sõw nyɩ na páw a Kɩrɩta zie a, ʋ be n a nyɩ zie, ɛ́ nyɩ bɛ gù kɛ́ nɩr kãw za wule nyɩ ɛ. Bʋ̃ʋ n'ʋ vɛ̃, a Vʋʋrʋ wule nyɩ nɩ bom za: ʋ wule nyɩ nɩ a yel-mɩŋa, ziri bɛ n'a ʋ wule nyɩ ɛ, lɛ so nyɩ ɩrɛ a lɛ ʋ na wul nyɩ a: nyɩ lãw nɩ a Kɩrɩta.

²⁸Ɩ̃ bibiir i, a ƴɛrɛŋa a, nyɩ lãw nɩ nɩ a Kɩrɩta, kɛ́ ʋlɛ wa sãá a, tɩɩm ɓãá ƴãw bɛr tɩɛrʋ, ɛ́ ta nyɛ̃ vĩ àr zãá nɩ ʋ, a ʋ waa daar ɛ.

²⁹Nyɩ na bãwnɩ a k'aa Kɩrɩta ɩ n nɩ-mɩŋa a, nyɩ sàw kɛ́ sob nɛ za mɩ̀ na tuur a mɩnʋ sɔ́r a, ɩ n Naaŋmɩn bʋ̃-dɔwra.