Read Dagara, Northern 1 Zã 4 Bible Online

1 Zã 4 - Dagara, Northern bible

1 Zã 4

¹Ɩ̃ bá mɩnɛ ɛ, nyɩ ta mɩ́ sàw de a bɛlɩ dem za na mɩ́ yel kɛ́ bɛ tɛr'ɩ Naaŋmɩn Vʋʋrʋ a ɩ. Ɛcɛ, nyɩ mɩ́ ɩ bɛ kaa nyɛ̃ a vʋʋrʋ bɛ na tɛr a wa sɩrɩ yi a Naaŋmɩn zie a. Bʋ̃ʋ n'ʋ vɛ̃, naaŋmɩn-ƴɛ̀r-man-bɛlbɛlbɛ yɛ́r a pàw a tẽ-daa.

²À ŋá n'a nyɩ na mɩ́ bãw Naaŋmɩn Vʋʋrʋ wa n'ʋ a: sob nɛ za na yere kɛ́ a Yeezu Kɩrɩta sɩrɩ na lɩɛbɩ nɩsaal a, ʋ tɛr'ɩ a Vʋʋrʋ na yi a Naaŋmɩn zie a.

³Ɛcɛ sob nɛ za na bɛ sàw de a Yeezu Kɩrɩta à à ŋá a, ʋ bɛ tɛr a Vʋʋrʋ na yi a Naaŋmɩn zie a ɩ, a Kɩrɩta dɔ̃ sob nyɩ na wõ bɛ yel k'ʋʋ waar'a a, a ʋ vʋʋrʋ n'ʋ ʋ tɛr. Ɛcɛ a ƴɛrɛŋa a, a Kɩrɩta dɔ̃ sob be n a tẽ-daa zu baarɩ.

⁴Ɩ̃ bibiir i, a nyɩɩm a, Naaŋmɩn so nyɩ, ɛ́ nyɩ zɛb'a tʋ̃ɔ́ a naaŋmɩn-ƴɛ̀r-man-bɛlbɛlbɛ bɛ ŋa, bʋ̃ʋ n'ʋ vɛ̃, a sob nɛ na be a nyɩ sɔgɔ a ɩ n kpɛ̃ɛ zuo a sob nɛ na be a tẽ-daa zu a.

⁵A nɩbɛ bɛ ŋa ɩ n a tẽ-daa nɩbɛ, alɛ so bɛ mɩ́ ƴɛ̀rɛ mɛ̃ a lɛ a tẽ-daa na mɩ́ ƴɛ̀rɛ a, ɛ́ a tẽ-daa bɛrɛ wone a bɛ ƴɛ̀rʋ.

⁶Ɛcɛ a tɩɩm a, Naaŋmɩn so tɩ. Sob nɛ na bãw a Naaŋmɩn a mɩ́ bɛrɛ na wone a tɩ ƴɛ̀rʋ. Ɛ́ sob nɛ a Naaŋmɩn na bɛ so a bɛ mɩ́ bɛrɛ wone a tɩ ƴɛ̀rʋ ɛ. À ŋá n'a tɩ mɩ́ bãw a yel-mɩŋa Vʋʋrʋ nɩ a tulu vʋʋrʋ.

⁷Ɩ̃ bá mɩnɛ ɛ, nyɩ ɩ tɩ nɔnɛ taa, bʋ̃ʋ n'ʋ vɛ̃, a nɔ̃wfʋ yi n a Naaŋmɩn zie. Nɩr za na tɛr a nɔ̃wfʋ a ɩ n Naaŋmɩn bie, ɛ́ bãw a Naaŋmɩn.

⁸Sob nɛ na bɛ tɛr nɔ̃wfʋ a, ʋ bɛ bãw a Naaŋmɩn ɛ, a Naaŋmɩn na ɩ nɔ̃wfʋ a ƴãw.

⁹À ŋá n'a a Naaŋmɩn wul a ʋ nɔ̃wfʋ ʋ sãá a tɩ zie: ʋ tõ n a ʋ Bi-been a tẽ-daa zu k'ʋʋ wa ɩ tɩ vʋʋrɛ.

¹⁰À ŋá n'a a nɔ̃wfʋ ŋmɛ̃: tɩmɛ bɛ nɛbɛ nɔ̃w a Naaŋmɩn ɛ, ʋlɛ n'ʋ nɔ̃w tɩ, ɛ́ tõ a ʋ Bie k'ʋʋ wa de ʋ tʋɔra maal'ɩ bàwr a tɩ yel-bebe suur-dɩ-kʋ̀b ƴãw.

¹¹Ɩ̃ bá mɩnɛ ɛ, a Naaŋmɩn wa nɔ̃w tɩ à ŋá a, a fɛr'a k'aa tɩɩm mɩ̀, tɩ mɩ̀ nɔnɛ taa.

¹²Nɩr za bɛ dãw nyɛ̃ a Naaŋmɩn ɛ. Tɩmɛ wa nɔnɛ taa a, Naaŋmɩn lãw nɩ tɩ na, ɛ́ a ʋ nɔ̃wfʋ a tɩ zie vɩɛl'ɩ ʋ za.

¹³À ŋá n'a tɩ mɩ́ bãw kɛ́ tɩ lãw nɩ nɩ a Naaŋmɩn, ʋʋ lãw nɩ tɩ: ʋ na kʋ̀ tɩ a ʋ Vʋʋrʋ a ƴãw.

¹⁴Tɩ nyɛ̃ na ɛ́ dɩrɛ a dãsɩɛ k'aa Sãà tõ n a ʋ Bie k'ʋʋ wa ɩ a tẽ-daa faarɛ.

¹⁵Nɩr wa yel k'aa Yeezu ɩ n a Naaŋmɩn Bie a, Naaŋmɩn mɩ́ lãw nɩ nɩ a ʋ sob, ɛ́ a sob mɩ̀ lãw nɩ a Naaŋmɩn.

¹⁶A tɩɩm a, tɩ bãw na ɛ́ sàw de a nɔ̃wfʋ a Naaŋmɩn na tɛr a tɩ ƴãw a. Naaŋmɩn ɩ n nɔ̃wfʋ. Sob nɛ na tɛr a nɔ̃wfʋ a, ʋ lãw nɩ nɩ a Naaŋmɩn, ɛ́ a Naaŋmɩn mɩ̀ lãw nɩ ʋ.

¹⁷A nɔ̃wfʋ wa vɩɛl ʋ za a tɩ zie a, tɩ na bɛr'ɩ tɩɛrʋ a ƴɛ̀rʋ maalʋ bibir, bʋ̃ʋ n'ʋ vɛ̃, a tɩ nyɔ-vʋʋrʋ a tẽw zu ka ŋmɛ̃ na taa nɩ a Yeezu Kɩrɩta dem.

¹⁸Nɔ̃wfʋ bɛ bãw dɛ̃bɩ̃ɛ ɩ. Nɔ̃wfʋ na ɩ nɔ̃wfʋ mɩŋa a mɩ́ diw nɩ a dɛ̃bɩ̃ɛ bɛr. Bʋ̃ʋ n'ʋ vɛ̃, a dɛ̃bɩ̃ɛ mɩ́ wul'a kɛ́ dɔwrʋ na wa na. Ɛ́ sob nɛ na zɔrɛ dɛ̃bɩ̃ɛ a, a nɔ̃wfʋ bɛ vɩɛl ʋ za a ʋ zie ɩ.

¹⁹Tɩɩm a, tɩ nɔnɛ na, a Naaŋmɩn na n'ʋ de niwn nɔ̃w tɩ a ƴãw.

²⁰Nɩr wa yel: «Ɩ̃ nɔnɛ nɩ a Naaŋmɩn», ɛ́ hɩ̃ɛn a ʋ yɛb a, zir-ŋmarɛ n'ʋ. Bʋ̃ʋ n'ʋ vɛ̃, sob nɛ na bɛ nɔnɛ a ʋ yɛb ʋ na mɩ́ nyɛ̃ a kʋ̃ tʋ̃ɔ́ nɔnɛ a Naaŋmɩn ʋ na bɛ mɩ́ nyɛ̃ a ɩ.

²¹A nʋɔr a Kɩrɩta na ƴãw kʋ̀ tɩ a n'ɩ ŋa: sob nɛ na nɔnɛ a Naaŋmɩn a, ʋ mɩ̀ nɔnɛ a ʋ yɛb.