Read Dagara, Northern Ƴɛ̀r-dɩrbɛ 12 Bible Online

Ƴɛ̀r-dɩrbɛ 12 - Dagara, Northern bible

Ƴɛ̀r-dɩrbɛ 12

¹A Efarayim nɩbɛ tɩ ɓã n taa, gãw a Zurdɛ̃ cen a Safon. Bɛ tɩ yel'ɩ a Zɛfɩte: «Bʋ̃ʋ n'ʋ so fʋ cen tɩ zɛb'ɩ a Amɔ̃ tẽw dem ɛ́ bɛ bʋɔlɩ tɩ? Tɩ na nyɩw nɩ fʋ̃ʋ nɩ a fʋ yir za bɛr.»

²A Zɛfɩte tɩ sɔw bɛ na: «Mãa nɩ a ɩ̃ nɩ-bʋʋrɛ, a tɩ yele nɩ a Amɔ̃ tẽw dem yele tɩ kpɛmɛ na bɛ dɩ vuo ɩ. Ɩ̃ na wa bʋɔlɩ nyɩ a, nyɩ bɛ faa tɩ a bɛ nuru pʋɔ ɩ.

³Ɩ̃ na tɩ nyɛ̃ nyɩ bɛ waar a ɩ̃ sõwfʋ a, ɩ̃ bãwnɩ nɩ a ɩ̃ kũu, ɛ́ cen tɩ zɛb'ɩ a Amɔ̃ tẽw dem, a Sore ƴãw bɛ a ɩ̃ nuru pʋɔ. Ɛ́ ƴɛrɛŋa a, bʋnʋ ƴãw n'a nyɩ zɛbr'ɩ mɛ̃?»

⁴A Zɛfɩte tɩ bʋɔl'ɩ a Galaadɩ nɩbɛ za ɓã taa, k'ʋʋ zɛb'ɩ a Efarayim nɩbɛ. A Galaadɩ nɩbɛ tɩ zɛb'a tʋ̃ɔ́ a Efarayim nɩbɛ. Bʋ̃ʋ n'ʋ vɛ̃, a Efarayim nɩbɛ tɩ yel'a: «A nyɩɩm Galaadɩ nɩbɛ a, a Efarayim dɔwlʋ pʋɔ n'a nyɩ yi, ɛ́ zɔ cen a Manase dɔwlʋ pʋɔ.»

⁵A Galaadɩ nɩbɛ tɩ zɛb'a de a Zurdɛ̃ gãwfʋ ziir, a Efarayim lowr. Efarayim nɩr za na mɩ́ tɩ zɔrɛ waar k'ʋʋ wa tɔl a, a Galaadɩ nɩbɛ mɩ́ tɩ sowr'ʋ na: «Efarayim nɩr nɛ b bɩɩ?» Ʋlɛ wa sɔw kɛ́ ʋ̃ʋ'hʋ̃ a,

⁶bɛ mɩ́ yel'a k'ʋʋ yel “Kɩbolɛtɩ[14].” A nɩr nɛ mɩ́ tɩ yel'a kɛ́: “Sɩbolɛtɩ”, bʋ̃ʋ n'ʋ vɛ̃, bɛ bɛ tɩ tʋ́ɔr yere a ƴɛ̀r-bir ŋa vla ɩ. Lɛ n'a bɛ mɩ́ tɩ nyɔw ʋ kʋ a Zurdɛ̃ gãwfʋ ziir ƴãw be. A Efarayim nɩbɛ bɛ na kʋ a lɛn daar a, tɩ faar'a na ta nɩbɛ tùr-lɩz'a ayi nɩ ayi (42 000).

⁷A Zɛfɩte tɩ ɩ n a Ɩsɩrayɛl nɩbɛ ƴɛ̀r-dɩrɛ yome ayʋɔb. Al pùorí, ʋ tɩ kpi na, bɛ ũù ʋ a ʋ tẽ-dɔwra pʋɔ, a Galaadɩ tẽw Misɩpa.

⁸A Zɛfɩte pùorí a, Bɛtɩlɛm[15] tẽw Ɩbɩsan n'ʋ tɩ lɩɛr'ʋ ɩ a Ɩsɩrayɛl nɩbɛ ƴɛ̀r-dɩrɛ.

⁹Ʋ tɩ tɛr'ɩ bidɛbr lɩzɛr'ɩ pie, nɩ pɔwyaar lɩzɛr'ɩ pie. Ʋ tɩ ƴãw nɩ a ʋ pɔwyaar kul sɩrbɛ dɔwlʋ yũo pʋɔ, ɛ́ mɩ̀ ƴãw a ʋ bidɛbr kul dɔwlʋ yũo pɔwyaar. Yome ayopõi n'a ʋ tɩ ɩ a ƴɛ̀r-dɩrɛ a Ɩsɩrayɛl nɩbɛ ƴãw,

¹⁰al pùorí, ʋ kpi, bɛ ũù ʋ a Bɛtɩlɛm.

¹¹A Ɩbɩsan pùorí a, Zabulɔ̃ dɔwlʋ nɩr Elon n'ʋ tɩ ɩ a Ɩsɩrayɛl nɩbɛ ƴɛ̀r-dɩrɛ yome pie.

¹²Al pùorí, ʋ kpi bɛ ũù ʋ a Elon, a Zabulɔ̃ tẽw.

¹³A Elon pùorí a, Pireyaton tẽw, Hɩlɛl bidɛb Avidon n'ʋ tɩ ɩ a Ɩsɩrayɛl nɩbɛ ƴɛ̀r-dɩrɛ.

¹⁴Ʋ tɩ tɛr'ɩ bidɛbr lɩz'a ayi nɩ yan lɩzɛr'ɩ pie na zɔmnɛ[16] bòn lɩz'a ata nɩ pie a. Yome ani n'a a Avidon tɩ ɩ a Ɩsɩrayɛl nɩbɛ ƴɛ̀r-dɩrɛ.

¹⁵Al pùorí, a Pireyaton tẽw, Hɩlɛl bidɛb Avidon tɩ kpi na, bɛ ũù ʋ a Pireyaton, a Efarayim tẽw, a Amalesitɩ mɩnɛ tãw zu.