Read Dagara, Northern Ƴɛ̀r-dɩrbɛ 13 Bible Online

Ƴɛ̀r-dɩrbɛ 13 - Dagara, Northern bible

Ƴɛ̀r-dɩrbɛ 13

¹A Ɩsɩrayɛl nɩbɛ tɩ lɛb'a maal tĩ ɩrɛ a bɛ pɛlɛ a Sore pʋɔ ɩ, a Sore de bɛ ƴãw a Filisɩtɛ̃ mɩnɛ nuru pʋɔ, yome lɩz'a ayi.

²Dan dɔwlʋ nɩr kãw tɩ be n be, yi Sorea, a yúor dɩ kɛ́ Manoa. A ʋ pɔw tɩ ɩ n pɔw-ãan, bɛ dɔw bie ɩ.

³Bibir kãw, a Sore malkɩ tɩ sãá nɩ a pɔw ŋa zie yel ʋ à ŋá: «Ɩ̃ bãwnɩ a na fʋ na ɩ pɔw-ãan, ɛ́ bɛ dɔw bie a, ɛcɛ fʋ na tɛr'ɩ pʋɔ dɔw bidɛb.

⁴Dɩ̃a na ta a, gù fʋ tʋɔra vla, taa lɛb nyuur divɛ̃ bɩɩ dã-bɩ̃ɩ kãw za ɩ, ɛ́ taa dɩrɛ bʋ̃-dɩ-dɛwr kãw za ɩ,

⁵fʋ na na tɛr pʋɔ dɔw bidɛb a zũú. Bʋra bɛ tʋɔr a ʋ zu ɛ, bʋ̃ʋ n'ʋ vɛ̃, a ʋ mã púorí daar za n'a a dɛble ŋa na ɩ Naaŋmɩn sób. Ʋlɛ n'ʋ na tĩ faarɛ a Ɩsɩrayɛl a Filisɩtɛ̃ mɩnɛ nuru pʋɔ.»

⁶A pɔw tɩ kul'a tɩ yel a ʋ sɩr: «Naaŋmɩn nɩr kãw wa n a ɩ̃ zie. Ʋ tɩ ŋmɛ̃ na mɛ̃ Naaŋmɩn malkɩ a, ʋ na tɩ ɩrɛ dɛ̃bɩ̃ɛ a ƴãw. Ɩ̃ bɛ sowr'ʋ a ʋ yib zie ɩ, ʋʋ bɛ yel a ʋ yúor kʋ̀ m ɛ.

⁷Ɛcɛ ʋ yel mɛ̃ na: “Fʋ na tɛr'ɩ pʋɔ dɔw bidɛb. Dɩ̃a na ta a, gù fʋ tʋɔra vla, taa lɛb nyuur divɛ̃ nɩ dã-bɩ̃ɩ kãw za ɩ, ɛ́ taa dɩrɛ bʋ̃-dɩ-dɛwr kãw za ɩ, bʋ̃ʋ n'ʋ vɛ̃, a dɛble na ɩ n Naaŋmɩn sób, a ʋ mã púorí daar za tɩ ta a ʋ kũu daar”.»

⁸Lɛ n'a a Manoa tɩ puori a Sore à ŋá: «Yãayãa Sore e, ɩ a Naaŋmɩn nɩr fʋ na tɩ tõ a, ʋ lɛb wa a tɩ zie, wa wul tɩ a lɛ tɩ na na ɩrɛ a dɛble ŋa ƴãw ʋlɛ wa dɔw a.»

⁹A Naaŋmɩn tɩ sàw na de a Manoa puoru, ɛ́ a Naaŋmɩn malkɩ lɛb wa a pɔw zie. Ʋ tɩ be n a pu-pʋɔ, ɛ́ a ʋ sɩr bɛ tɩ be a ʋ zie ɩ.

¹⁰Daadaalɛ, a pɔw tɩ zɔ na cen tɩ yel kʋ̀ a ʋ sɩr: «Nyɛ̃, a nɩr ʋl na daar wa páw mɛ̃ a lɛb'a ɩ k'ɩ̃ nyɛ̃ ʋ.»

¹¹A Manoa tɩ ìr'a tu a ʋ pɔw, cen a nɩr nɛ zie tɩ sowr'ʋ: «Fʋ̃ʋ n'ɩ a nɩr ʋl na ƴɛ̀r a pɔw ŋa zie a?» Ʋ sɔw: «Mãa tɔr za n'ʋ.»

¹²A Manoa yel ʋ: «A na ɩ à ŋá a fʋ ƴɛ̀rʋ na tu a, tub abobe n'a a na fɛr kɛ́ tɩ tuur a dɛble ŋa ƴãw? Ŋmɩŋmɩn n'a a na fɛr kɛ́ tɩ ɩrɛ a ʋ ƴãw?»

¹³A Sore malkɩ tɩ yel'ɩ a Manoa: «A al za ɩ̃ na yel k'aa fʋ pɔw taa ɩrɛ a, ʋ taa ɩrɛ ɩ:

¹⁴ʋ kʋ̃ lɛm divɛ̃ tɩɛ bom kãw za ɩ, ʋ kʋ̃ nyũ divɛ̃ nɩ dã-bɩ̃ɩ ɛ, ʋ kʋ̃ dɩ bʋ̃-dɩ-dɛwr kãw za ɩ. Ʋ na tuur'ɩ a lɛ za ɩ̃ na yel kʋ̀ ʋ a.»

¹⁵A Manoa tɩ yel'ɩ a Sore malkɩ: «Ɩ̃ zɛlɛ fʋ na, sàw tɩ tɛr fʋ, cɔbrɩ bʋle kʋ̀ b.»

¹⁶A Sore malkɩ tɩ yel'ɩ a Manoa: «Fʋ̃ʋ saa tɛr mɛ̃ a, ɩ̃ kʋ̃ dɩ a fʋ bʋ̃-dɩrɩ ɛ, ɛcɛ fʋ̃ʋ wa bɔbr a, fʋ̃ʋ maalɩ nyɩw-a-za-bàwr kʋ̀ a Sore.» Bʋ̃ʋ n'ʋ vɛ̃, a Manoa bɛ tɩ bãw k'aa Sore malkɩ n'ʋ ɛ.

¹⁷A Manoa tɩ sowr'ʋ na: «A fʋ yúor dɩ na kɛ́ bo, tɩ tʋ̃ɔ́ ƴãwnɛ fʋ, a fʋ ƴɛ̀rʋ wa tu baar'a»

¹⁸A Sore malkɩ tɩ sɔw ʋ na: «Bʋ̃ʋ n'ʋ so fʋ sowre mɛ̃ a ɩ̃ yúor? Ʋ bɛ tɛr bãwfʋ ɛ.»

¹⁹A Manoa tɩ de nɩ bʋle nɩ a de-kʋ̀b bome, dɔwlɩ a pìir zu, k'ʋʋ de a kʋ̀ a Sore, a ʋl a ɩb na bɛ tɛr bãwfʋ a. A Manoa nɩ a ʋ pɔw na tɩ jɩ́rɛ

²⁰a bàwr vũu-zɛlɛ na tɩ yi a bàwr-maal-kuur zu dúor a salom zu a, bɛ tɩ nyɛ̃ nɩ a Sore malkɩ ʋ be a vũu-zɛlɛ pʋɔ dúor. Lɛ n'a bɛ tɩ lo vɔblɩ muru.

²¹A Sore malkɩ bɛ lɛb tɩ wul ʋ tʋɔra a Manoa nɩ a ʋ pɔw ɛ, lɛ n'a a Manoa tɩ bãw kɛ́ a Sore malkɩ n'ʋ.

²²A Manoa tɩ yel'ɩ a ʋ pɔw: «A bɛ tɛr à ŋá ɩ, tɩ na kpi na[17], tɩ na nyɛ̃ a Naaŋmɩn a ƴãw.»

²³Ɛcɛ a ʋ pɔw tɩ yel ʋ na: «A Sore tɩ bɔbr k'ʋʋ ɩ tɩ kpi a, ʋ kʋ̃ʋ tɩ sàw de a tɩ nyɩw-a-za-bàwr, nɩ a tɩ de-kʋ̀b bom ɛ. Ʋ kʋ̃ʋ tɩ ɩ tɩ nyɛ̃ a yele á ŋá za tɩ na nyɛ̃ a ɩ, ʋʋ kʋ̃ʋ tɩ yel a yele á ŋá za tɩ na wõ a ƴɛrɛŋa a kʋ̀ tɩ ɛ.»

²⁴A pɔw tɩ dɔw nɩ dɛble, por a yúor kɛ́ Samsɔ̃. A dɛble tɩ baa na, ɛ́ a Sore maal'ʋ.

²⁵A Dan laɩ na be a Sorea nɩ a Ɛsɩtaɔl cara pʋɔ a n'a a Sore Vʋʋrʋ tɩ tĩ damnɛ[18] a Samsɔ̃.