Read Dagara, Northern Ƴɛ̀r-dɩrbɛ 16 Bible Online

Ƴɛ̀r-dɩrbɛ 16 - Dagara, Northern bible

Ƴɛ̀r-dɩrbɛ 16

¹Bibir kãw, a Samsɔ̃ tɩ cen nɩ Gaza. Ʋ tɩ tuor'ɩ pɔw-yɛm kãw a be, cen tɩ gã nɩ ʋ.

²Bɛ tɩ yel'a kʋ̀ a tẽw dem kɛ́ a Samsɔ̃ be n a be. Bɛ tɩ wõ n taa gùre ʋ lɩɛrɛ taa, a tẽw dɩ̃dɔr ƴãw. Ɛcɛ bɛ bɛ tɩ ɩ ʋ bom za a tɩ̃ɩsɔw ɛ, ɛ́ tɩɛrɛ kɛ́ bɛ na tʋ̃ɔ́ na gù a zie vɩɛ bɛ kʋ ʋ.

³Ɛcɛ a Samsɔ̃ tɩ gã na tɩ ta a zi-põ-zɛ̃-taa tɛwr. A zie na wa bɩ põ a, ʋ tɩ ìr'a nyɔw a tẽw dɩ̃dɔr pamɛ a za ayi vɔ̃, lãwnɩ a dàar nɩ a dà-jɩ̀ra, dɔwlɩ a ʋ bawŋman zu, cen nɩ tɩ bin a tãw ʋl na tori a Ebrɔ̃ a zu.

⁴A yele á ŋá pùorí, a Samsɔ̃ tɩ nɔ̃w nɩ pɔw kãw na kpɩɛr a Sorɛkɩ fʋɔla pʋɔ, ɛ́ dɩ Dalila a.

⁵A Filisɩtɛ̃ mɩnɛ nɩ-bɛrɛ tɩ cen na tɩ páw ʋ yel ʋ à ŋá: «Bɛlɩ ʋ bãw be a ʋ fãw kpɛ̃ɛ ŋa na yi a, nɩ lɛ tɩ na na ɩ tʋ̃ɔ́ ʋ, nyɔw ʋ 'lẽ, ʋ ta cãà tɛr fãw a, ɛ́ tɩ kãw za na kʋ̀ b'ɩ salm-pla libie túr dɔwlɩ kʋba (1 100).»

⁶Lɛ n'a a Dalila tɩ yel a Samsɔ̃: «Ɩ̃ zɛlɛ fʋ na, yel a be a fʋ fãw kpɛ̃ɛ ŋa na yi a kʋ̀ m, nɩ bom nɛ bɛ na na 'lẽ nɩ fʋ, tʋ̃ɔ́ fʋ, fʋ ta lɛb ɩ bom za a.»

⁷A Samsɔ̃ sɔw ʋ: «Bɛlɛ 'lẽ nɩ mɛ̃ tam gàn-ɓaar ayopõi na bɛ ko sɛr a, ɩ̃ kʋ̃ tɛr fãw ɛ, ɩ̃ na ɩ na mɛ̃ nɩsaal za a.»

⁸A Filisɩtɛ̃ mɩnɛ nɩ-bɛrɛ tɩ wa n nɩ a tam gàn-ɓaar ayopõi wa kʋ̀ a Dalila, ʋ de 'lẽ nɩ a Samsɔ̃.

⁹Ʋ tɩ sɔwl'ɩ nɩbɛ a dĩó, ɛ́ ŋmɛ cɛl yel a Samsɔ̃: «Samsɔ̃ ɔ̃, gùre Filisɩtɛ̃ mɩnɛ yoo!» A Samsɔ̃ tɩ taw nɩ a tam gànɛ ŋma, mɛ̃ vũu na dɩ fomiwr a. À ŋá n'a bɛ bɛ tɩ tʋ̃ɔ́ bãw a ʋ fãw yib zie ɩ.

¹⁰Lɛ n'a a Dalila tɩ yel a Samsɔ̃: «Fʋ ɩ m'a la, ŋma ziri kʋ̀ m. Ƴɛrɛŋa a, pãa yel bom nɛ bɛ na na 'lẽ nɩ fʋ a kʋ̀ m.»

¹¹Ʋ sɔw ʋ: «Bɛlɛ 'lẽ nɩ mɛ̃ miw-paalɛ bɛ na bɛ tõ n ton za sɛr a, ɩ̃ kʋ̃ tɛr fãw ɛ, ɩ mɛ̃ a nɩsaal za a.»

¹²Lɛ n'a a Dalila tɩ bɔ a miw-paalɛ tɩ 'lẽ nɩ ʋ, ɛ́ ŋmɛ cɛl yel ʋ: «Samsɔ̃ ɔ̃, gùre Filisɩtɛ̃ mɩnɛ yoo!» Nɩbɛ lɛb tɩ maal'a sɔwlɩ a dĩó gù. Ɛcɛ a Samsɔ̃ tɩ ŋma n a mie bɛr a ʋ kpãkpamɛ ƴãw mɛ̃ fomie a.

¹³A Dalila tɩ lɛb'a yel ʋ: «Fʋ lɛb maal'a ɩ m la, ŋma ziri kʋ̀ m. Pãa sɩrɩ yel bom nɛ bɛ na na 'lẽ nɩ fʋ a kʋ̀ m.» A Samsɔ̃ sɔw ʋ: «A ɩ̃ zukɔbr na pàl gbɛlɛ ayopõi a, fʋ̃ʋ wa nyɔw a wob'ɩ a fomi-wobre fomi-gbɛ́lɛ́ a, ɛ́ caw a nɩ fomi-wobre cáara a, ɩ̃ kʋ̃ tɛr fãw ɛ, ɩ mɛ̃ nɩsaal za a.»

¹⁴A Dalila tɩ ɩ na a Samsɔ̃ gúr gã, ʋʋ nyɔw a ʋ zukɔbr na pàl a gbɛlɛ ayopõi a, wob'ɩ a fomi-wobre fomi-gbɛ́lɛ́, ɛ́ caw a nɩ a fomi-wobre cáara, ɛ́ ŋmɛ cɛl yel a Samsɔ̃: «Samsɔ̃ ɔ̃, gùre Filisɩtɛ̃ mɩnɛ yoo!» A Samsɔ̃ tɩ zaw na ìr vɩr a za ŋma: a cáara, a pɛn-bʋ̃-wobra, nɩ a fomi-gbɛ́lɛ́ tõ-ƴãwfʋ zie.

¹⁵A Dalila tɩ yel ʋ na: «Ŋmɩŋmɩn n'a fʋ na tʋ̃ɔ́ yel kɛ́ fʋ nɔnɛ mɛ̃ na, ɛ́ bɛ sàw ƴãw a fʋ tɩɛrʋ za a ɩ̃ ƴãw? Gb'a ata n'ɩ á ŋá fʋ na ɩ m la, ɛ́ bɛ sàw yel kʋ̀ m a be a fʋ fãw kpɛ̃ɛ ŋa na yi a ɩ.»

¹⁶Ʋ tɩ bàlɛ nɩ a Samsɔ̃ yaga za bibie za, nɩ a ƴɛ̀r-bie á ŋá, ʋ bɛ tɩ cãà laar ɛ, wa bãw gù,

¹⁷ɛ́ yel a ʋ yel-sɔwla kʋ̀ ʋ à ŋá: «Bʋra bɛ dãw tɔ a ɩ̃ zu ɛ, bʋ̃ʋ n'ʋ vɛ̃, a ɩ̃ mã púorí za n'a ɩ̃ ɩ a Naaŋmɩn nɩ-sora. Bɛlɛ põ a ɩ̃ zu a, a ɩ̃ fãw na baar'a, ɩ̃ lɛb ŋmɛ̃ mɛ̃ nɩsaal za a.»

¹⁸A Dalila na tɩ bãw k'ʋʋ pãa yel'ɩ a ʋ yel-sɔwla kʋ̀ ʋ a, ʋ tɩ ƴãw na bɛ yel a Filisɩtɛ̃ mɩnɛ nɩ-bɛrɛ à ŋá: «Ƴɛrɛŋa ʋl a, nyɩ na tʋ̃ɔ́ na wa, ʋ yel'ɩ a ʋ yel-sɔwla kʋ̀ m.» Bɛ tɩ tɛr'ɩ a libie cen nɩ a Dalila zie.

¹⁹A Dalila tɩ ɩ na a Samsɔ̃ gúr gã a ʋ gbɛ́ɛ zu, ʋʋ bʋɔlɩ nɩr kãw ʋ wa ŋma a Samsɔ̃ zukɔbr na pàl gbɛlɛ ayopõi a bɛr. Lɛ n'a a Dalila tɩ tĩ tʋ̃ɔ́nɛ ʋ, bʋ̃ʋ n'ʋ vɛ̃, a Samsɔ̃ fãw tɩ yi na.

²⁰Lɛ n'a a Dalila tɩ cɩɩrɩ yel ʋ à ŋá: «Samsɔ̃ ɔ̃, gùre Filisɩtɛ̃ mɩnɛ yoo!» Ʋ tɩ zaw na ìr, ɛ́ tɩɛr k'ʋʋ na faa nɩ ʋ tʋɔra mɛ̃ a dãwdãw a, ɛcɛ ʋ bɛ tɩ bãw k'aa Sore yi na zaa a ʋ zie zãá nɩ ʋ ɛ.

²¹A Filisɩtɛ̃ mɩnɛ tɩ nyɔw ʋ na cɔ̀r a mimie kpol. Bɛ tɩ tɛr ʋ na cen nɩ a Gaza, tɩ de kur-zɩɛ bamɛ 'lẽ nɩ ʋ, ɛ́ fɛr ʋ ƴãw ʋ viire a nɩɛr a gaso pʋɔ ƴɛ́rɛ nɩ a ble.

²²Ɛcɛ a ʋ zukɔbɛ bɛ na tɩ põ bɛr a, tɩ tĩ na lɛb búle.

²³Bibir kãw, a Filisɩtɛ̃ mɩnɛ nɩ-bɛrɛ tɩ ɓã n taa kɛ́ bɛ maalɩ bàwr kʋ̀ a bɛ ŋmɩn Dagon, ɛ́ maalɩ cuw, bɛ na zɛb tʋ̃ɔ́ a ƴãw. Bɛ tɩ yiele na: «A tɩ ŋmɩn ƴãw nɩ a Samsɔ̃, a Filisɩtɛ̃ mɩnɛ dɔ̃ sob, a tɩ nuru pʋɔ.»

²⁴A nɩbɛ na tɩ nyɛ̃ a Samsɔ̃ a, bɛ tɩ zɛw nɩ a bɛ ŋmɩn yúor yere nɩ: «A tɩ ŋmɩn ƴãw nɩ a Samsɔ̃, a Filisɩtɛ̃ mɩnɛ dɔ̃ sob, a tɩ nuru pʋɔ, a sob nɛ na tɩ sãwnɛ a tɩ tẽw a, na tɩ kʋrɛ a tɩ nɩbɛ báarɛ a.»

²⁵A bɛ nʋ̃ɔ̀ pʋɔ a, bɛ tɩ yel'a kɛ́ bɛ tɛr a Samsɔ̃ wa n, ʋ wa man laarʋ ƴãw bɛ. Bɛ tɩ tɛr'ɩ a Samsɔ̃ yi n a gaso pʋɔ wa n, ʋ wa manɩ a laarʋ ƴãw a nɩbɛ, al pùorí bɛ ƴãw ʋ a ŋmɩn-yir kpule cará.

²⁶A Samsɔ̃ tɩ yel'ɩ a dɛble ʋl na tɩ nyɔw ʋ a nũú a: «Tɛr mɛ̃ ɩ̃ tɩ tɔ a kpule na tɩɛ a ŋmɩn-yir tɛr a, ɩ̃ tʋ̃ɔ́ dɩ́ɛlɩ a.»

²⁷Zɩ̃ kɛ́ dɛbr nɩ pɔwbɛ tɩ paal'ɩ a ŋmɩn-yir. A Filisɩtɛ̃ mɩnɛ nɩ-bɛrɛ tɩ be n be, nɩ nɩbɛ na ta túr-ata (3 000) na tɩ be a garʋ́ jɩ́rɛ a Samsɔ̃ na manɛ a laarʋ a.

²⁸Lɛ n'a a Samsɔ̃ tɩ puori a Sore à ŋá: «Sore Naaŋmɩn i, ɩ̃ zɛlɛ fʋ na, lɛb tɩɛrɩ a ɩ̃ yele, lɛb kʋ̀ m a fãw a ƴɛrɛŋa yõ ƴãw, Naaŋmɩn i, ɩ̃ tʋ̃ɔ́ yáa a ɩ̃ mimie ayi san daƴen daadaa, a Filisɩtɛ̃ mɩnɛ zie.»

²⁹Al pùorí, a Samsɔ̃ tɩ gbaal gbaal'ɩ a kpule ayi al na tɩɛ a ŋmɩn-yir tɛr a. Ʋ tɩ tɩɛ nɩ a kãw nɩ a ʋ dʋrʋ nũu, ɛ́ tɩɛ a kãw nɩ a ʋ gʋba nũu,

³⁰ɛ́ ŋmɛ cɛl yel: «Mãa nɩ a Filisɩtɛ̃ mɩnɛ, tɩ lãw kpi!» Ʋ tɩ dáa na nɩ a ʋ fãw za, a ŋmɩn-yir lo pàw a nɩ-bɛrɛ nɩ a nɩbɛ za na tɩ be a ʋ pʋɔ a. A nɩbɛ ʋ na tɩ kʋ lãw kpi n a tɩ zuo nɩ a bɛl ʋ na tɩ kʋ a ʋ cãafʋ daar a.

³¹A ʋ yɛbr nɩ a ʋ yir dem za tɩ wa na wa ɓáw a ʋ kũu, cen nɩ tɩ ũù a ʋ sãà Manoa yaa pʋɔ, a Sorea nɩ a Ɛsɩtaɔl cará. Yome lɩzɛr'a a Samsɔ̃ tɩ ɩ a Ɩsɩrayɛl nɩbɛ ƴɛ̀r-dɩrɛ.