Read Dagara, Northern Ƴɛ̀r-dɩrbɛ 17 Bible Online

Ƴɛ̀r-dɩrbɛ 17 - Dagara, Northern bible

Ƴɛ̀r-dɩrbɛ 17

¹Efarayim tan vuo pʋɔ nɩr kãw tɩ be n be, a yúor dɩ kɛ́ Mɩkayehu.

²Bibir kãw, ʋ tɩ yel'ɩ a ʋ mã: «Bɛ na tɩ zu a fʋ salm-pla libie túr dɔwlɩ kʋba (1 100) a, fʋ ŋmɛ na ƴãw a nyãnyuge a ɩ̃ niŋé ɩ̃ wõ, fʋ cãà na bãwnɩ a? Mãa n'ʋ tɛr a libie á ŋá, mãa n'ʋ tɩ de a.» Lɛ n'a a ʋ mã tɩ yel ʋ: «Ɩ̃ bie e, a Sore, ʋ maalɩ fʋ!»

³A Mɩka tɩ kʋ̀ n a salm-pla libie túr dɔwlɩ kʋba (1 100) al a ʋ mã. Ɛcɛ a ʋ mã tɩ yel ʋ na: «Mãa mɩŋa de nɩ a libie á ŋá kʋ̀ a Sore, a fʋ̃ʋ ɩ̃ bidɛb ƴãw, a na sõw na bɛ maal'ɩ tɩɩb bɛ na na nyɩl kure pàw a. A lɛ pʋɔ a, ɩ̃ lɛb'a dier a kʋ̀rɛ fʋ a ƴɛrɛŋa.»

⁴Ɛcɛ ʋ tɩ lɛb'a kʋ̀ a libie a ʋ mã, ʋ ír salm-pla libie kɔbr ayi tɩ kʋ̀ a kur-nyɩlɛ, ʋ maal'ɩ tɩɩb bɛ na nyɩl kure pàw a, bɛ de bin a Mɩkayehu yir.

⁵Zɩ̃ k'aa nɩr ʋl, a Mɩka, tɩ tɛr'ɩ puoru zie a ʋ yir. Ʋ tɩ ƴãw na bɛ maalɩ tɩɩb kãw nɩ yir ŋmɩn dasul-cãpili ƴãw pʋɔ, ʋʋ ƴãw a ʋ bidɛb kãw ɩ a ʋ bàwr-maalɛ.

⁶A lɛn daar, nãà bɛ tɩ ka be a Ɩsɩrayɛl tẽw ɛ, ŋa za mɩ́ tɩ ɩrɛ nɩ lɛ na pɛlɩ a ʋ pʋɔ a.

⁷Levitɩ pɔlbile kãw na tɩ ɩ nʋʋra a, tɩ kpɩɛr'ɩ a Bɛtɩlɛm na ɩ a Zuda dɔwlʋ tẽw kãw a.

⁸Ʋ tɩ bɛr'ɩ a Bɛtɩlɛm, ɛ́ yi bɔbr kpɛb zie zi-yũo. Ʋ na tɩ lo a sɔ́r cere a, ʋ tɩ ta n a Mɩka yir a Efarayim tãw vuo pʋɔ.

⁹A Mɩka tɩ sowr'ʋ na: «Nyɩnɛ n'a fʋ yi waar?» Ʋ sɔw: «Zuda tẽw Bɛtɩlɛm levitɩ nɛ m, kpɛb zie n'a ɩ̃ bɔbr.»

¹⁰A Mɩka lɛb yel ʋ: «Alɛ wa ɩ lɛ a, fʋ̃ʋ kpɩɛr a ɩ̃ zie ka, ɛ́ ɩ bàwr-maalɛ nɩ sãà a ɩ̃ ƴãw. Yũon za, ɩ̃ na mɩ́ kʋ̀ b'ɩ salm-pla libie pie, lãwnɩ a bʋ̃-suuri nɩ a bʋ̃-dɩrɩ lɛ za a na sɛw a.» A levitɩ tɩ kpɛ na,

¹¹ɛ́ sàw be a Mɩka zie, ʋ de ʋ mɛ̃ a ʋ bidɛb a.

¹²A Mɩka tɩ ka n nũu ƴãw a levitɩ, ʋ ɩ a ʋ bàwr-maalɛ, kpɩɛr a ʋ yir.

¹³A Mɩka tɩ tɩɛr'ɩ ʋ pʋɔ: «Ƴɛrɛŋa a, bʋnʋ bɛ ka be ɩ, a Sore na maalɩ mɛ̃ na, levitɩ na ɩ a ɩ̃ bàwr-maalɛ a ƴãw.»